Hechos 15

1Chay wichan Judea quinranpita Antioquía marcaman aywarcur, waquin Israel irmänucuna willapäcuycaran: Jäpa runacuna, Tayta Jesúspa shiminta çhasquicush carsi, Moiséspa shimintaraj çharcunquiman. Jïrucunquiman. Chayraj maquinçhu Tayta Diosninchi purichishunquipaj nir. 2Pabluwan Bernabími ichanga paycunawan sumaj tincupänacuran. Chaymi Antioquía mayur irmänucuna Pablutapis, Bernabítapis, waquin irmänucunatapis Jerusalén marcaman caçharan. Caçhaptin, Jesúspa caçhancunawan, mayur irmänucunawan parlanacuj aywaran. 3Chaura Antioquía marcaçhu jutucaj irmänucuna caçhaptin, Fenicia uranpa, Samaria uranpa aywacäriran. Waquin irmänucunawan tincur, willaparan: Jäpa runacunapis Tayta Diosninchipa shiminta çhasquicun nir. Willapaptin, jatunpa cushicäriran. 4Pabluwan Bernabé Jerusalén marcaman çhayaptin, Jesúspa caçhancunapis, mayur irmänucunapis, jutucaj irmänucunapis cushi-cushilla çhasquicäriran. Chaura Pablo tucuy-jinanpa Tayta Diosninchi yanapashanta willaparan. 5Waquin Tayta Jesúspa shiminta çhasquicuj fariseucunam ichanga niran: Jäpa runacuna Tayta Jesústa çhasquicurpis, Israel ullgucuna-jina jïrucuchun. Moiséspa shimintaraj llapanta çharcuchun. 6Chaynuy niptin, Jesúspa caçhancunawan llapan mayur irmänucuna-ima parlanacäriran. 7Sumaj apaycaçhänacuptin, Pedro jatarcur niran: Irmänucuna, jäpa runacunata willapänäpaj Tayta Diosninchi acracamashanta musyanqui. Acracamasha Jesúspa alli willapanta willapaptï, jäpa runacunapis çhasquicunanpaj. 8Tayta Diosninchi llapan runapa shungunta musyapan. Chaymi yanagämashanchi-jina jäpa runacunatapis acracushpan Espíritu Santu maquinçhu puriycächin. 9Jesúspa shiminta çhasquicuptinchi, Israel runacunatapis, jäpa runacunatapis maquinçhu Tayta Diosninchi purichimanchi. Paypäga llapanchipis jucnaylla caycanchi. Jäpa runacunapa juchantapis jungashana. Alli ñawinpana rican. 10Chaymi Tayta Diosninchita chapata ama rurashunchu. Jesúspa shiminta wiyacuptin, jäpa runacunata ama nishuwanchu: Moiséspa shimintaraj çharcuy. Moiséspa shiminta unay auquillunchicuna mana çharcuranchu. Nuwanchipis çharcuyta mana camäpacunchichu. 11Tayta Diosninchim ichanga llaquipäcuj cashpan washämanchi. Washämänanchi-raycur Tayta Jesús wañuyman çhayashanpita nuwanchitapis, jäpa runacunatapis alli ricamanchi. 12Chaypita Pabluwan Bernabé Tayta Diosninchi imanuy-imanuy yanapashantapis willaran: Jäpa runacunata willapäcuptï, Tayta Diosninchi camacächiyninpa jishyaçhucunata allchacächishcä. Supaycunatapis jargushcä nir. Chaynuy niptin, llapan runa wiyarpararan. 13Llapanta willaptin, Santiagupis niran: Irmänucuna, mä, wiyaycallämay. 14Simeón Pedro cananraj willapämashcanchi jäpa runacunatapis unaypita-pacha Tayta Diosninchi llaquipaycashanta. Paycunatapis acracusha maquinçhu cawananpaj. 15Chaynuy cananpaj Tayta Diosninchipa unay willacujnincunapis musyachicur niran: 16Tayta Diosninchi nimanchi: Juc junaj cutimushaj. Mandaj Davidpa marcan ushyacash captinsi, mandjnin mana captinsi, yawar-masillanpita juc mandajta çhurashaj. Maquillançhu marca-masincunata purichishaj. Ushyacash marcantapis quiquin-purallapita yapay marcayächishaj. 17Chaynuy camacächiptï, llapan runa ashimanga. Acracushä jäpa runacunatapis maquïçhu purichishaj. 18Chaynuy cananpaj quiquin Tayta Diosninchi unaypita-pacha auniran. 19Irmänucuna, chaymi jäpa runacunapa umanta alläpa ama nanächishunchu. Ama pantacächishunchu. Quiquincuna yarpashannuylla Tayta Diosninchita wiyacunman. Israel runacuna yarpashantapis llapallanta ama çharcunmanchu. 20Manchäga Tayta Diosninchiwan alli ricanacunanpaj cartacushun: Jircacunata jarashanta ama micunquimanchu. Ricashayqui warmitapis ama yatapanquimanchu. Ricashayqui runatapis ama çhasquipanquimanchu. Maticuypa wañush uywatapis, yawartapis ama micunquimanchu nir. 21Chaycunata unaypita-pacha Moiséspa shiminta liguiycur, willapäcuran. Canan wichanpis diyawarda junajcunaçhu marcan-marcan shuntacäna wasicunaçhu Moiséspa shiminta willapäcun. 22Chaura chaynuy niptin, Jesúspa caçhancunapis, mayur irmänucunapis, llapan jutucaj irmänucunapis cushish çhasquicärisha. Pabluwan Bernabé Antioquía marcaman cutiptin, aywäshinanpäpis juc-ishcay mayur irmänucunata acraran. Acraran Barsabás nishan Judastawan Silasta. 23Paycunawan cartata apachiran Antioquía marcaman, Siria quinranwan Cilicia quinran marcacunaman. Tayta Jesúspa shiminta çhasquicuj jäpa runacunata cartacuran. Cartaçhu niran: Irmänucuna, ¿allillachu juyaparcaycanqui? Jesúspa caçhancunawan mayur irmänucunawan-ima cartacaycämü. 24Waquin irmänunchicuna umayquita nanächinallanpaj cashanta mayashcä. Mana caçhaycämuptïsi, sharcamur willapashcashunqui: Moiséspa shimintaraj çharcuy. Janayquitapis jïrucuy nir. 25Chaymi sumaj parlanacuriycur, juc-ishcay irmänunchicunata caçhaycämü. Shaycämun yaçhänacushanchi Bernabíwan Pablo. 26Paycuna wañuytapis mana manchacullar, Taytanchi Jesucristupa shiminta willapäcurcaycan. 27Chaynuypis irmänunchi Judastawan Silasta caçhamushcä. Cartacamushäta shiminwanpis tantiyachishunquipaj. 28Espíritu Santupis, nuwacunapis chapata mana rurämanchu. Ichanga Espíritu Santu shacyächimaptin, ichicllatapis anyapärishayqui. 29Jircacunaman jarashanta ama micunquimanchu. Uyshata pishtar, yawarninta shutuchinquiman. Ima yawartapis ama micunquimanchu. Ricashayqui warmiwanpis, ricashayqui runawanpis ama cacunquimanchu. Willapashäcunata çharcur, allina cawanquipaj. Chayllata cartacamü. 30Chaynuypa carta apajcuna Antioquía marcaman aywacuran. Çhayar, llapan irmänucunata shuntaycur, cartata juycuran. 31Cartata liguipaptin shacyächishanta wiyar, jatunpa cushicäriran. 32Silaswan Judaspis Tayta Diosninchipa willacujnin car, shiminpawanraj llapan irmänucunata sumaj shacyächiran. 33Chaypita unayllata carta apajcuna Jerusalén marcaman cuticäriran. Cuticuptin, niran: Allilla cutiycullay, ari. Jerusalén marcaçhu irmänunchicunatapis wamayapämanqui, ari. 34Jucnin cuticuptinsi, Silas mana cuticuranchu. 35Pabluwan Bernabípis mana cuticuranchu. Manchäga waquin irmänucunawan Antioquía marcaçhu juyar, Tayta Diosninchipa shiminta willapäcuran. Jesúspita tantiyachicuran. 36Chaypita unayllata Pablo niran: Bernabé, irmänunchicuna watucuj cutishun. Tayta Diosninchipa willacuyninta willapäcur purishanchi marcacunata watucushun. Mä, ¿imanuyshi caycan? 37Cutishun niptin, Bernabé niran: Marcos nishan Juantapis pushashun. 38Pablum ichanga mana munaranchu ñaupata Panfilia quinranpita cuticushanpita, mana purïshishanpita. 39Chay janan Pabluwan Bernabé apaycaçhänacur raquicaran. Bernabíwan Marcos ishcanin bütiwan Chipre marcaman aywacuran. 40Pablum ichanga purïshinanpaj Silasta pushacuran. Chaymi Antioquía irmänucuna imaçhüpis yanapaycunanpaj Tayta Diosninchipa maquinman çhuraran. 41Chaura Siria quinrançhüpis, Cilicia quinrançhüpis jutucaj irmänucunata shacyaycächir Pabluwan Silas puriran.

will be added

X\