1 Iconio marcaman çhayarna, Pabluwan Bernabé Israelcunapa shuntacäna wasinman aywaran. Paycuna willapäcuptin, Israel runacunapis, jäpa runacunapis Jesúspa shiminta çhasquicuran. 2 Waquin Israel runacunam ichanga Jesúspa shiminta wasguir, waquin jäpa runacunata shimiyaran irmänucunata chiquipänanpaj. 3 Imanuy captinpis, unaylla Iconio marcaçhu Jesúspa caçhancuna juyapäriran. Tayta Jesúsman yupachicur pitasi mana manchacullar willapäcuran: Tayta Diosninchi llaquipäcuj car, acracushan Jesústa caçhamusha washämänanchipaj nir. Tantiyachishannuylla willapäcur, jishyaçhucunata allchacächir, supaycunata jargur, tucuy-jinanpa Tayta Diosninchi munayniyuj cashantapis, llaquipäcuj cashantapis musyachicuycaran. 4 Iconio marca runacuna quiquin-puralla ticrapanacuran. Waquin runa Jesúspa caçhancunata çhasquicuran; waquinmi ichanga mana. Mana wiyacuj Israelcunapa shiminta wiyacur, mana çhasquicuranchu. 5 Mana çhasquicujcuna mayur Israel runacunapis marca-masintin, jäpa mayur runacunapis marca-masintin parlanacuran Pablutawan Bernabíta sajmar ushyananpaj. 6 Parlanacushanta mayar, jishpicäriran. Aywaran Licaonia quinran Derbe marcaman, Listra marcaman, waquin marcacunamanpis. 7 Chay marcacunaman çhayar, Tayta Diosninchipa shiminta willacur Jesúspita willapäcuran. 8 Listra marcaçhu cumllu runawan tincuran. Yuriyninpita-pacha cumllu car, puriyta mana camäpacuranchu. 9 Payga Pablo willacushanta wiyaraycaran. Chaura cumlluta ricärir tantiyacuran: Cay runa allchacayta munar, llapan shungunwan Tayta Diosninchiman yupachicun nir. Chaymi Pablo niran: 10 Muguyquicunata chutapacuy. Jatariy. Niptin, cumllu runa juclla jataricurcuran. Allina puriran. 11 Chaura Pablo allchacächishanta ricar, quiquincunapa rimayninçhu Licaonia runacuna ninacuran: Yaya taytanchi runa-tucullar watucamashcanchi. 12 Manchapacur, Bernabípaj niran: Caymi yaya taytanchi Zeus. Pablupäna willacuj captin, niran: Caymi yaya taytanchi Hermes. 13 Listra marca yaycunaçhu caycaran yaya tayta Zeuspa capillan. Chay capillaçhu aruj cüra marca-masintin Jesúspa caçhancunata cuyachicuynincunata jarayta munar, waytan wallgash türucunata apamuran. 14 Chaura: Yaya tayta nir jarayta munaptin, Pabluwan Bernabé juyupa mancharicäcuran. Müdanantapis raçhir ushyarir, runacunapa çhaupinpa ushtucuycur wiyacächiypa llapan runata niran: 15 Taytacuna, yaya taytayquiman ama tincuchimaychu. Nuwacunapis runa-masillayquim caycä. Rasunpa-caj Tayta Diosninchi caçhamasha shiminta willapänäpaj. Payga cawan. Camasha janaj pachatapis, cay pachatapis, yacucunatapis, llapan imacunatapis. Chaymi manacaj jircacunaman ama manchapacunquimanchu. Manchäga quiquin Tayta Diosninchita manchapacunquiman. Paylla munayniyuj. 16 Unayga quiquin yarpashannuylla runacuna cawaran. Imanuy cawaptinpis, Tayta Diosninchi mana miçharanchu. 17 Jamcunapis chaynuy cawaptiquisi, Tayta Diosninchi llaquipäshurayqui. Llaquipäcuj car, tamyachimun micuyniquicuna sumaj waçhananpäpis, sumaj wayunanpäpis. Yanapaycäshunqui cushi-cushilla cawanayquipaj. 18 Runacuna jarayta munaycaptin, Pabluwan Bernabé tucuy-jinanpa tantiyachirraj miçharan. 19 Listra marcaçhu caycaptin, chiquicuj Israel mayur runacuna çhayaran Pisidia quinran Antioquía marcapita, Iconio marcapita. Paycuna Jesúspa caçhancunata chiquichinan-cashallan runacunata shimiyaran. Shimiyaptin, Pabluta sajmar ushyaran. Wañush-jina jitacäcuptin: Wañuycachirunchi nir marca wajtanman jançharcur wicapariran. 20 Chaypis irmänucuna jutuparaycaptin, cawarcamuran. Jinarcur marcaman Pablo cutiran. Warannin Bernabíwan ishcanin Derbe marcaman aywacuran. 21 Derbe marcaçhu willapäcuptin, achcaj runa Tayta Jesúspa shiminta çhasquicuran. Paycunata sumaj willapariycur, aywashan caminullapa cuticuran Listra marcapa, Iconio marcapa, Antioquía marcacaman. 22 Chay marcacunaman çhayar, Tayta Diosninchita mana yamacänanpaj irmänucunata shacyächir niran: Tantiyacunquiman. Tayta Diosninchipa ñaupanman mana çhayashanchicaman runacuna chiquir ushyamäshunpaj. 23 Cutishan marcacunaman çhayar, jutucaj irmänucunata ricananpaj mayur irmänucunata çhuraran. Ayunar Tayta Diosninchita mañacuran: Taytallau Tayta, mayur irmänucuna aruyninta çharcunanpaj yanapaycullay, ari. Paycuna maquiquiçhümi cawan nir. 24 Chaypita Pisidia quinranpa aywaycur, ishcanin Panfilia quinranman çhayaran. 25 Jinarcur Perge marcaçhu Jesúspa shiminta willapäcuriycur, Atalía marcamanna yarpamuran. 26 Willapäcuyta ushyarcur, bütiwan Antioquía marcaman cuticuran. Chay marcapita llaquipäcuj Tayta Diosninchipa maquinman çhuraycuptin, Pabluwan Bernabé willacuj llucshipäcuran. 27 Chaura llucshishan marcaman çhayar, jutucaj irmänucunata jayarcur, willaparan: Jesúspa shiminta willacuptï, sumaj Tayta Diosninchi yanapämasha. Chaymi jäpa runacunapis shungun shacyäcuptin, Tayta Jesúspa shiminta çhasquicäriran. Paycuna Tayta Diosninchipa maquinçhu cawarcaycan nir. 28 Llapallanta willapariycur, wiyacuj-masincunawan unaylla juyapäriran.
