Hechos 12

1Chay wichan mandaj Herodes ishcay-quimsa irmänucunata charichisha ñacachinanpaj. 2Juanpa wauguin Santiagupa cuncanta ruguriptin, 3waquin Israel runacuna jatunpa cushicuran. Chaymi Libadüraynaj tantata micuna fiestata rurashan wichan Pedrutapis chariran. 4Charircur, carsilman wiçhgaran: Pascua fiesta ushyayraj llapan runa ricay tapushun nir. Çhuscu jutuy murucucunapa maquinman çhuraran. Täparanpis çhuscuj murucu-caman. 5Pedruta sumaj täparcaycaran. Chaypis jutucaj irmänucuna Pedrupaj mana yamacällar Tayta Diosninchita mañacurcaycaran. 6Chaura mandaj Herodes ñauquinan warämuj Pedro ishcaj murucupa çhaupinçhu puñuycaran. Ishcay cadinawan wataraycächiran. Waquin murucucunapis puncuçhu täparcaycaran. 7Täparcaycaptin, Tayta Diosninchipa anjilnin achic-achicyaycar ricaripuran. Pedruta tapsirir: Juclla jatariy niptin, wataraycächishan cadinapis pascacäcuran. 8Jinarcur niran: Pedro, juclla cinturunniquita watacuy. Llanguiquitapis jaticuy. Anjil nishanta änir Pedro ruraran. Jatarcuptin, niran: Punchuyquita ushtucurcur, jipalläta llucshimuy. 9Chaura anjilpa jipallanta Pedro llucshiran. Ichanga mana tantiyacur, yarpaçhacuran: ¿Rasunpachu llucshiycä? ¿Nuspaycächu? nir. 10Ruri puncucunata täpaycaj murucucunatapis çhancarir-çhancarir jawa puncuman çhayaran. Jawa puncuman çhayaptin, jïru puncu quiquillan quiçhacäcuran. Chaura wajtaçhüna ricacuran. Carunijcaman pusharcur, anjil illaricäcuran. Quiquillanna Pedro ricacuran. 11Tantiyacurir, Pedro niran: Cananmi ichanga Tayta Diosninchi anjilninta caçhamushanta rasunpa musyä. Mayur Israel runacunapita, mandaj Herodespita jishpirachimasha. Wañuchimänanpita washämasha. 12Chaura carsilpita llucshishanta sumaj tantiyacurir, Maríapa wasinman aywacuran. Paymi Marcos nishan Juanpa maman caran. Maríapa wasinçhu irmänucuna Pedrupaj Tayta Diosninchita mañacurcaycaran. 13Chaura sawan puncupita Pedro jayacuriptin, pï cashantapis musyananpaj yanapäcuj jipash Rodesa llucshiriran. 14Pedrupa shiminta wiyar, jatunpa cushicuran. Puncu quiçhapuytapis jungaycur, cuticuran: Pedro çhayamusha nir. 15Willaptin, llapan niran: Supayçhi pucllacushcashunqui. Niptinpis, yapayraj niran: Mana llullacüchu. Rasunpa Pedro. Chaura niran: Alman-imataçhi wiyapacushcanqui. 16Puncuta mana quiçhapuptin, yaparir-yaparir Pedro jayacuycaran. Puncuta quiçharir, Pedruta ricashpan tantiyacuyta mana atiparanchu. 17Chaura Pedro upällachiran. Jinarcur carsilpita Tayta Diosninchi jurgushanta willacuran. Chaypita jucläpa aywacuran: Llucshimushäta waquin irmänunchicunatapis, Jesúspa wauguin Santiagutapis willanqui nir. 18Chaura carsilçhu Pedro mana warämuptin, quiquin-puralla täpaj murucucuna ullgüpänacuran ¿Mayraj Pedro? nir. 19Pedro mana captin, wacpa-caypa mandaj Herodes ashichiran. Täpacuj murucucunatapis sumaj tapuran. Pedruta mana tariptin, quiquin täpaj murucucunata wañuycachiran. Jinarcur Judea quinranpita Cesarea marcamanna Herodes tiyaj aywacuran. 20Mandaj Herodes Tiro marca runacunatapis, Sidón marca runacunatapis juyupa chiquipacurcuran. Chiquipaptin, parlaj aywariycur Blastuta mañacuran: Tayta Blasto, capuralnin cashpayqui mandaj Herodeswan yaçhänacunqui. Ullguynin jasacänanpaj parlapaycallämay, ari. Marca-masïpaj micuyta apaptï, ama miçhämanmanchu nir. Chaymi Blasto parlapaptin, änir mandaj Herodespa ullguynin jasacaran. Juc junajpaj jitaparan: Tiro runacunawan, Sidón runacunawan parlanacunäpaj shamuchun nir. 21Sisyunpaj jitapashan junaj çhayamuptin, achic-achicyaycaj müdananta ushtucurcur, runacunapa ñaupançhu mandaj Herodes jamacuycuran. Cushichipayllapa rimaran. 22Rimashanta wiyar, japarir-japarir runacuna niran: Taytallau Tayta, Munayniyuj Tayta Diosninchi canqui. Imaypis mana ushyacanquipächu. 23Runacuna alliman çhuraptin, Herodes sumaj cushicuran. Quiquin Tayta Diosninchiwan tincuchiptinsi, mana miçharanchu. Chaypitam Tayta Diosninchipa anjilnin wañurachiran. Mandaj Herodes aycha curu ushyaypa wañucuran. 24Tayta Diosninchita wiyacujcunam ichanga Jesúspa shiminta chay-tucuyçhu willapäcuycaran. Runa achcajmi Tayta Jesúspa shiminta çhasquicuran. 25Chay wichan Bernabíwan Saulo cuyachicuycunata Jerusalén marcaman çhayachiran. Jinarcur Marcos nishan Juanta pushacurcur, Antioquía marcaman cuticuran.

will be added

X\