Hechos 11

1Chaura Judea quinrançhu Jesúspa caçhancunapis, irmänucunapis mayaran waquin jäpa runacunapis Tayta Diosninchipa shiminta çhasquicushanta. 2Chaymi Jerusalén marcaman Pedro çhayaptin, Israel-masin irmänucuna jamurpar niran: 3¿Imanirtaj jäpa runacunapa wasinçhu pachacushcanqui? ¿Imanirtaj micupacärishcanqui? 4Jamurpaptin, llapallanta willar, Pedro niran: 5Jope marcaçhu Tayta Diosninchita mañacuycashäçhu ricapacurä. Janaj pachapita jatun jacu çhuscun puntan icsish yarpaycämuran. Ñaupäman çhayamuran. 6Sumaj ricapärir, ricarä tucuy-niraj uywacunata, micucuj uywacunata, paçhanpa purijcunata, altullapa pärijcunata. 7Ricapaycaptï, janaj pachapita nimaran: Pedro, jatariy. Ricashayquita llapanta pishtay micunayquipaj. 8Chaura nishcä: Mana micümanchu. Tayta Diosninchi millanäcushan, asyächicushan uywacunata imaypis mana micurüchu. 9Yapay janaj pachapita nimaran: Tayta Diosninchi alli ricashanta ama millanäcunquichu. 10Chaynuy quimsa cutipa nimaran. Jinarcur janaj pachaman jipita chutacurcuran. 11Niycaptillan, Cesarea marcapita quimsaj jäpa runacuna ashimar, pacharashäman çhayamuran. 12Chaura mana manchacullar aywanäpaj Espíritu Santu shacyächimaran. Chaymi sujtaj irmänunchicunawanpis aywarä. Cesarea marcapita jayachimaj runapa wasinman çhayarä. 13Wasiyujna willamaran: Wasïçhu anjil ricariparcamar, nimasha: Jope marcaman caçhacuy. Pedro nishan Simónta jayachimuy. 14Pay willapäshunquipaj llapaniqui Tayta Diosninchipa maquinçhu cawanayquipaj. 15Willapaycaptilläna, nuwanchita ñaupata charicarcamashanchi-jina paycunatapis Espíritu Santu charicurcusha. 16Chayraj Tayta Jesúspa shiminta yarpärirä. Pay niran: Ushyachicuj Juan yacullawan ushyachicusha. Jamcunatam ichanga Espíritu Santuwan Tayta Diosninchi ushyachishunquipaj shungun munashannuy cawanayquipaj. 17Chaura Tayta Jesúspa shiminta çhasquicuptinchi, Espíritu Santu yanapämashanchi-jina paycunatapis yanapaycan. Tayta Diosninchi camacaycachiptin, mana miçhämanchu. 18Chaynuy Pedro willaptin, pipis mana jamurparannachu; manchäga Tayta Diosninchita alliman çhuraran: Jäpa runacuna wanacunantapis Tayta Diosninchi camacächin. Paycunasi wanacuptin, maquinçhu imaycamanpis cawachinga nir. 19Canan tantiyacushun. Estebanta wañuycachishan wichan Jesúspa shiminta wiyacuj irmänucunata jaticaçhar ushyaptin, aywacäriran Fenicia marcacunaman, waquin Chipre marcacunaman, waquinna Antioquía marcaman. Chay marcacunaçhu Israel-masincunallata Jesúspita willaparan. 20Waquin irmänucunam ichanga jäpa runacunatapis willaparan. Willacujcuna caran Chipre marcacunapita, Cirene marcapita. Paycunana Antioquía marcaçhu jäpa runacunatapis Tayta Jesúspita willaparan. 21Willapäcunanpaj Tayta Diosninchi sumaj yanaparan. Chaymi achcaj jäpa runa jucha aparicuypita wanacuran. Jesúspa shiminta çhasquicuran. 22Chayta mayar, Jerusalén marcaçhu jutucaj irmänucuna Antioquía marcaman Bernabíta caçharan. 23Çhayar, jäpa runacuna Jesúspa shiminta wiyacushanpita sumaj cushicuran. Paycunata Tayta Diosninchi llaquipashanta tantiyacuran. Chaymi shacyächiran mana yamacällar Jesúspa shiminta wiyacunanpaj. 24Achcaj runa Jesúspa shiminta wiyacäriran Bernabé alli runa captin, Tayta Diosninchita manchapacuptin, Espíritu Santupa maquinçhu puriptin. 25Antioquía marcapita Tarso marcamanna Bernabé aywaran Saulo ashij. 26Tarir, Antioquía marcaman pushacuran. Jutucaj irmänucunawan ishcan juc wata juyapäriran. Tayta Diosninchipa shiminta achcaj runata tantiyachiran. Chay marcaçhüraj Jesúspa maquinçhu cawajcunata Cristianucunash nir jutichaparan. 27Chay wichan Tayta Diosninchipa willacujnincuna aywaran Jerusalén marcapita Antioquía marcaman. 28Chay marcaçhu Espíritu Santu rimachiptin, willacuj Agabo jatarcur musyachiran: Chay-tucuyçhu juyupa muçhuy cangapaj nir. Chaura musyachishannuylla änir çharcucaran. Roma marcacunata mandaj Claudio maquinçhu purichishan wichan änir muçhuy caran. 29Muçhuy captin, Antioquía marcaçhu irmänucuna parlanacuran Judea marcaçhu irmänucunata taripacushan-tupulla tarichinanpaj. 30Chaymi cuyachicuynincunata shuntariycur, Sauluwan, Bernabíwan Jerusalén marcaman apachiran. Çhayachirga, mayur irmänucunapa maquinman inçhigaycuran.

will be added

X\