Hechos 1

1Tayta Teófilo, yapay cartacallämuj. Ñaupata cartacamurä Jesús willacushancunata, rurashancunata musyanayquipaj. Llapanta willacamurä. 2- 3 Jesús wañushanpita cawarcamur janaj pachaman Tayta Diosninchi shuntacushancaman çhuscu çhunca (40) junajcamanraj achca cuti caçhancunata ricaripuran. Paycunata quiquin acracusha. Espíritu Santu yanapaptin, imata rurananpäpis willaparan. Rasunpa cawarishantapis tucuy-jinanpa musyachicuran. Tayta Diosninchipa maquinçhu cawananpäpis sumaj willaparan. 4Juc junaj caçhancunallawan juturpaycashançhu Tayta Diosninchi aunishanta yarpächir, Jesús niran: Espíritu Santu mana charishushayquicaman cay Jerusalén marcapita ama aywacärinquirächu. 5Ñaupata Tayta Diosninchipa maquinçhu cawayta munajcunata yacullawan Juan ushyachiran. Ichanga waracunallana Espíritu Santuwan Tayta Diosninchi ushyachishunquipaj shungun munashannuy cawanayquipaj. Mayna llapanta tantiyachishcaj. 6Chaura llapan juturpajcuna tapucuran: Tayta Jesús, jäpa runacunapa maquinpita, ¿cananchuraj Israel marcantïta jishpichimanqui? ¿Imayraj maquiquiçhu purichimanqui marcanchi yapay munayniyuj cananpaj? nir. 7Jesúsna niran: Musyanayqui mana camacanchu. Tayta Diosnillanchi musyan imay junaj camacächinantapis. Munayninçhu caycan. 8Sumaj wiyacuy. Espíritu Santu maquinçhu charäshuptiquim ichanga, munayniyuj ricacunquipaj. Shungun munashanta ruranayquipaj yanapäshunquipaj. Nuwapita willapäcunquipaj Jerusalén marcaçhu, Judea quinrançhu, Samaria quinrançhu, chay-tucuy marcacunaçhu. 9Parlayta ushyarcuptin caçhancuna ricapaycaptillan, Tayta Diosninchi Jesústa shuntacuran. Janaj pachaçhu pucutay chapacurcuran. Mana ricarannachu. 10Jesús janaj pachaman aywacushanta ricaraycaptin, achic-achicyaycaj müdanash ishcaj runa ñaupançhu ricariparcur 11niran: Galilea runacuna, janaj pachaman ama ricaraynachu. Aywacujta ricashayquinuylla janaj pachapita Jesús cutimungapaj. 12Chaypita Jesúspa caçhancuna Ulïbus puntapita Jerusalén marcaman cuticuran. Chay puntapita Jerusalén marcaman pullan lïwalla caran. Chayllata diyawardaçhu Israel runacuna purij. 13Jerusalén marcaman çhayaycärir, pacharashan altusman jigaran. Jigaran: Pedro, Juan, Santiago, Andrés, Felipe, Tomás, Bartolomé, Mateo, Alfeupa wamran Santiago, Marcanpaj nanachicuj nishan Simón, Santiagupa wamran Judas. 14Chay wasiçhu jutucaj Tayta Diosninchita mañacunanpaj. Jutucaj Jesúspa wauguincunapis, maman Maríapis, waquin warmicunapis. 15Chay junajcuna irmänucuna paçhac ishcay çhuncawan-ima (120) shuntacaran. Llapan juturpaycaptin, Pedro niran: 16Irmänucuna, Espíritu Santu musyachiptin, mandaj David rimashan çharcucaycan. Rimashan çharcucänanpaj Judas Iscariote runacunata pusharan Jesústa charinanpaj. 17Judasga caran purïshimaj-masinchi, willacäshimaj-masinchi. 18Chaypis Jesústa wañuyman jitarpusha. Jillayta çhasquishanwanna juc çhacrata rantisha. Chayçhu uray-singaypa tunir, wañucurisha. Paçhan pashtaptin, chinchilluncunapis mashtaypa-mashtacaran. 19Chayta musyar, Jerusalén marca runacuna chay çhacrata jutichaparan: Yawar pata nir. Rimayninçhu: Yawar pata ninanta: Hakeldamá nin. 20Judaspaj rimar, Salmos libruçhu isquirbiraycaran: Wasinpis ragäyächun. Pipis ama tiyachunchu nir. Juc Salmuçhüna nin: Aruyninmanpis jucta çhurachun. 21- 22 Chaymi paypa aruyninman juctana çhurashuwan. Jesúswan puriyta jallaycushanchipita-pacha purïshimajninchicuna caycan. Juan ushyachicushanpita-pacha janaj pachaman Jesús aywacushancaman purïshimajninchicuna cayçhu juturpaycan. Paycunapita jucta acrashun Tayta Jesús cawarishanta willacäshimänanchipaj. 23Chaynuy niptin, ishcajta acraran. Acraran:Justo nishan José Barsabástawan Matíasta. 24Ishcanta acrarcur, Tayta Diosninchita mañacuran: Taytallau Tayta, llapanïpa shungüta musyanqui. Maygan acracushayquitapis canan musyaycachillämay, ari. 25Acracushayqui runana willacäshimanga. Purïshimanga. Judasga juchata aparicur, Jesúspa maquinçhu puriycarpis, witicurisha. Chaynuypa shungun apashanman aywacusha nir. 26Mañacuriycur, surtita jitasha. Jitaptin, surti llucshimuran Matíaspaj. Chaymi Matíaswan çhunca ishcaywanna (12) Jesúspa caçhancuna caran.

will be added

X\