3 San Juan 1

1Tayta Gayo, nuwa mayur irmänu cashpä cartacallämü. Jamta llapan shungüwan llaquij. 2Yaçhänacushanchi-janan maquinçhu alli cawashayquipita Tayta Diosninchita mañacapuycä ima rurashayquipis alli llucshinanpaj, jishyapis mana charishunayquipaj. 3Irmänunchicuna watucamar, jampita willamasha: Tayta Diosninchipa shungun munashanta rurar cawaycan nir. Chaymi sumaj cushicushcä. 4Irmänucuna wawä-yupay cashpan Tayta Diosninchipa maquillançhu cawaptin, jatunpa cushicü. 5Taytallau Gayo, irmänunchicunata yanapar, allita ruraycanqui. Jucläpita captinsi yanapar, sumaj allita ruraycanqui. 6Paycuna cayman çhayamur irmänunchicunatawan jutucar, llaquipäcuj cashayquita willapasha. Sumajshi yanapashcanqui paycuna purir mana pishipacunanpaj. Chaynuy yanapaycaptiqui, Tayta Diosninchipis sumaj cushicun. 7Chay irmänucuna Washäcuj Jesúspa shiminta willapäcur purircaycan. Tayta Diosninchipa shiminta mana çhasquicuj runacunapitam ichanga mana imatapis çhasquiparanchu. 8Chaymi yanapäshuwan Jesúspa shiminta chay-tucuyçhu willapäcur purinanpaj. Tarichirga, willapäshiycanchi. 9Juturaj irmänunchicunaman cartacamurä. Diotrefesmi ichanga nishan-nishanta rurar mana çhasquicamashachu. Manchäga quiquin alliçhu llucshiyta munar, pampamanpis çhuramasha. 10Shamur, rurashanman-tupu piñacushaj. Payga nuwacunapa washäta rimallar purin. Irmänunchicuna çhayaptinpis, mana pachächinchu. Pachächiyta munajcunatapis miçhan. Waquin irmänunchita jutucaj irmänunchicunapita jargun. 11Taytallau Gayo, paypa llupinpa ama jatinquichu. Manchäga allillata ruranqui. Allita rurajcuna Tayta Diosninchipa wawan. Juyucunata rurajmi ichanga Tayta Diosninchi pï cashantapis mana musyanchu. 12Demetriupämi ichanga alli cawashanpita, Tayta Diosninchipa shungun munashannuy cawashanpita llapanpis alli riman. Chaymi nuwacunapis payta alliman jurgü. Pitapis Tayta Diosninchipa shungun munashannuy cawaptin, alliman jurgü. 13Willapänajpaj achcaraj caycan. Isquirbiyllapam ichanga llapanta mana isquirbimümanchu. 14Manasi aycällata watucushayquipaj. Tincur, sumaj parlanacushunpaj. 15Allilla juyaycullay, ari. Ricsinacushanchicuna wamayäshunqui. Irmänunchicunatapis ninqui: Wamayaycäshunquish. Chayllana.

will be added

X\