2 Timoteo 1

1Timoteo, nuwa Pablo cartacamü. Washäcuj Jesúspa caçhanmi caycä. Tayta Diosninchi camacächiptin, shiminta willapäcur puriycä. Washäcuj Jesúspa shiminta çhasquicuptinchi, paymi alli cawayta tarichimänanchi. 2Timoteo, wamrä-yupaymi canqui. Tayta Diosninchipis, Tayta Jesucristupis yanapayculläshunqui. Llaquipayculläshunqui. Allilla cawaycachilläshunqui. 3Unay yawar-masïcuna llapan shungunwan manchapacushan-jina nuwapis llapan shungüwan Tayta Diosninchita manchapacü. Shungüçhu ima juchatapis mana pacarächïchu. Timoteo, pagas-junajpis jampaj Tayta Diosninchita mañacuycä. Mana jungajchu. 4Llaquicur wagashayquita yarpar, yapay tincuyta sumaj munaycä. Tincur, jatunpa cushicushäpaj. 5Awillayqui Loidapis, mamayqui Eunicipis llapan shungunwan Tayta Diosninchita wiyacushanta musyä. Chaymi jampis Tayta Diosninchita llapan shunguyquiwan wiyacushayquita yupachicü. 6Umayquiman maquïta çhuraycur mañacuptï, Tayta Diosninchi yaçhayta camapushcashunqui. Ama jasacanquimanchu. Manchäga yaçhacushayquiman-tupu imatapis sumaj ruranquiman. 7Tayta Diosninchi Espíritu Santuwan yanapaycämanchi. Chaymi imatapis ama manchacushuwanchu. Imaman çhayaptinchisi, payga shacyächimanchi. Yanapämanchi runa-masinchitapis llaquinanchipaj, imatapis sumaj tantiyacurir rurananchipaj. 8Chaymi Taytanchi Jesúspita willapäcushan-janan, carsilman wiçhgachimashan-janan pampaman çhurashuptiquisi, ama pingacunquichu. Manchäga Tayta Diosninchi shacyächimashanchiman-tupu shiminta willapäcushun runacuna ñacachimaptinchisi. 9Tayta Diosninchi jishpichimashcanchi. Acracamashcanchi maquillançhu cawananchipaj Mana allita rurashanchipitachu acracamashcanchi. Manchäga llaquipämashpanchi shungun munaptin acracamashcanchi. Jishpichimänanchi-raycur Washäcuj Jesústa caçhamusha. Mana imasi caycaptillan, llapanta camacächisha. 10Tayta Diosninchi llaquipäcuj cashanta tantiyacushcanchina. Washäcuj Jesús ricarimushana. Payga Washämajninchi. Wañuytasi illarachisha. Alli willapatapis tantiyachimashcanchi. Shiminta wiyaptinchi, shungunchipis achicyacäcusha. Mana ushyacaj cawaytapis tarichimanchi. 11Caycunata willapäcunäpaj Tayta Diosninchi cargüman çhuramasha. Quiquin acracamasha caçhan canäpaj, shiminta willapäcunäpaj, shiminta tantiyachicunäpaj. 12Cananga Tayta Diosninchipa shiminta willapäcur purishäpita carsilçhu ñacaycä. Chaypis mana pingacüchu. Nuwaga Tayta Diosninchiman yupachicü. Paypa maquinçhu cawaycä. Cargüta çharcushä junajcaman mana caçharimangachu. 13Chaymi Tayta Diosninchipa shungun munashanta ruranayquipaj shimïta wiyacunquiman. Washäcuj Jesúsman yupachicur, runa-masiquitapis llaquipanquiman. 14Jesúspita willapäcushaga sumaj alli. Chaymi carguyquita çharcunayquipaj Espíritu Santu yanapaycäshunqui. Payga maquinçhu purichimanchi. 15Musyashayquinuypis Asia marcacunaçhu irmänucuna llapan-yupay jaguiraycamasha. Figeluwan Hermógenespis jaguiraycamasha. 16Irmänu Onesíforutam ichanga wasinpa Tayta Jesús sumaj yanapaycullächun. Onesíforuga mana yamacällar shacyächimasha. Carsilarächimaptinsi, mana pingacushachu. 17Manchäga Roma marcacaman shamusha. Mana tarimashancaman jamaytapis mana tarishachu. 18Éfeso marcaçhu puriptïpis, sumaj yanapämasha. Yanapämashanta musyanqui. Chaymi payta llaquipashpan cutimushan junaj Tayta Jesús alli cawayman çhuraycullächun.

will be added

X\