2 Pedro 1

1Irmänucuna, nuwa Simón Pedro, Washäcuj Jesúspa mandu-rurajnin cashpä caçhan cashpä cartacallämü. Ima allish jamcunapis Jesucristupa shiminta çhasquicushcanqui. Payga Tayta Diosninchi, Washäcujninchi. Quiquin camacächisha jamcunatapis, caçha-masintïta Tayta Diosninchi alli ñawinpa ricamänanchipaj. 2Cananga Tayta Diosninchi llaquipayculläshunqui. Alli cawayman çhurayculläshunqui. Waran-waran Tayta Diosninchipa maquinçhu cawar, Taytanchi Jesúspa maquinçhu cawar, shungun yarpashantapis sumaj tantiyacushuwan. 3Munayniyuj cashpan Tayta Diosninchi yanapaycämanchi shungunta tantiyacunanchipaj, shungun munashannuy cawananchipaj. Munayniyuj cashpan, alli shungu cashpan maquinçhu puriycächimanchi. 4Quiquinmi tucuy-jinanpa yanapaycämanchi. Aunishanta çharcur, shungunman tincunanchipaj, jucha aparicuypita witicunanchipaj yanapaycämanchi. 5Chaymi Tayta Diosninchiman sumaj yupachicushuwan. Yupachicurna, cuyay-munaypaj cawashuwan. Cuyay-munaypaj cawarna, Tayta Diosninchi pï cashantapis sumaj tantiyacushuwan. 6Sumaj tantiyacurna, munashallanchita ama rurashuwanchu. Munashallanchita mana rurarna, mana yamacällar Tayta Diosninchiman yupachicushuwan. Mana yamacällar yupachicurna, Tayta Diosninchipa shungun munashallanta rurashuwan. 7Shungun munashallanta rurarna, irmänunchiwanpis llaquipänacärishuwan. Llaquipänacuycarna, runa-masinchicunatapis llapan shungunchiwan llaquipäshuwan. 8Willapashajcuna shunguyquiman çhayash captin, Taytanchi Jesucristupa shimintapis allipämi çhasquicushcanqui. Chaura allillata rurarna cawanquipaj. Chaymi jampaj pipis mana ningachu: Manacajllapaj Jesúspa shiminta çhasquicusha. Shungun munashantapis mana ruranchu. 9Willapäcushäta mana çharcujcunam ichanga japra runa mana tantiyaj-jina caycan. Jucha aparicushanta Tayta Diosninchi jungashantapis mana yarparannachu. 10Irmänucuna, Tayta Diosninchi acracushushayquipis, maquinçhu cawashayquipis musyacänanpaj payta manchapacur cawanquiman. Maquinpita ama witicunquichu. Mana witicur, juchacuymanpis mana çhayanquipächu. 11Taytanchi Jesucristu Washämajninchi. Paypa maquinçhu cawanayquipaj mana sasächicunquipächu. Maquinçhu imay-imaycamanpis cawanayquipaj quiquin Tayta Diosninchi cushish çhayachishunquipaj. 12Chaymi: Llapanta tantiyacushcä niptiquisi, tantiyaycächishayqui Tayta Diosninchipa shiminta sumaj wiyacunayquipaj. 13Alli cawanayquipaj cawashäcaman piñacuycäshayqui. 14Wañuy janäçhüna. Tayta Jesús musyachimasha: Shuntacunajpaj wallcallana pishin nir. 15Ichanga llapanta tantiyacunayquipaj sumajraj piñapäshayqui. Chayrämi wañucuptïpis, shimïta yarparanquipaj. 16Washäcuj Jesús munayniyuj. Cutimunga nir willapäcushäga mana ninshi-ninshillachu. Munayniyuj cashanta musyä. Ñawïwanraj achic-achicyaycajman ticracurishanta nuwacuna ricarä. 17Tayta Diosninchi alliman çhuraran. Alliçhu jurguran. Quiquin munayniyuj Tayta Diosninchi nimuran: Payga cuyay Wawämi. Shungüman tincuptin, acracushcä. 18Rinrïwan nuwacuna wiyarä. Jirca puntaçhu juturpaycaptï, Tayta Diosninchi rimamuran. 19Chaymi cananraj unay willacujcuna rimashanman sumaj yupachicunchi. Rimashanga achqui-yupay achicyapaycämanchi rimashanta tantiyacunanchipaj. Sumaj wiyacunanchi Jesús cutimunan junajcaman. Cutimur, waraj istrïlla-yupay cushicachimäshunpaj. Shungunchipis achicyacäcunga. 20Chaypis sumaj tantiyacunquiman. Unay willacujcuna rimashanta pipis shungun munashannuylla mana tantiyachicunmanchu. 21Willacujcuna mana quiquillanpitachu willapäcuran. Mana umallanpitachu isquirbiran. Manchäga Espíritu Santu rimachiptin, Tayta Diosninchipa shiminta willapäcuran.

will be added

X\