2 Corintios 9

1Jerusalén marcaçhu irmänunchicunapaj cuyachicuyniquita çhuranayquipaj alläpa mana rimacümanchu. Chayta musyanqui. 2Alli shungu cashayquitapis musyä. Chaymi Macedonia quinran irmänucunata jurgapashcä: Janyan watapita-pacha Acaya quinran Corinto irmänucuna shacya-shacyalla cuyachicuynincunata camaricuycan nir. Jamcunata jurgapaptï, paycunapis yanapamayta munarcaycan. 3Cananga alli shungu cashayquita ricananpaj quimsaj irmänunchicunata caçhaycämü. Manchä: Pablo llullacun niramanquiman. Chaymi camaricushalla shuyanqui. 4Macedonia quinranpita yanagämajcunawan çhayamuptï cuyachicuyniquita mana çhuraptiqui, pingayçhu llucshishunpaj. Mana quiquillächu pingayçhu llucshishaj. Manchäga quiquiquicunapis pingay-tucush llucshinquipaj. 5Pishipacujcunapaj cuyachicuynïcunata çhurashaj nir aunimaptiqui, yanagämaj irmänucunata caçhaycämü. Imatapis llutäpacuptiqui, paycuna yanapäshunquipaj. Chaymi cuyachicuyniquicunata çhurar, achca-achcata çhuranqui; ama ichic-ichicllataga. Achca-achcata çhuraptiqui: Alli shungu nishunquipaj. Ichic-ichicllata çhuraptiquim ichanga: Miçha nishunquipaj. 6Mä, sumaj yarpaçhacushun. Ichicllata murur, ichicllata pallanchi. Achcata mururmi ichanga, achcata pallanchi. 7Cuyachicuyninchita çhurayta munar, shungunchi munashannuylla çhurashuwan. Llaquish caycar, ama çhurashuwanchu. Pipis piñapaypa: Mä, çhuray nimaptinchi, ama çhurashuwanchu. Tayta Diosninchi shacya-shacyalla çhurajcunallata alli rican. 8Payga tarichicujmi. Sumaj yanapämäshunpaj imanchicunapis mana pishïmänanchipaj. Aypäpacushunpaj pitapis tarichinanchipaj. 9Tayta Diosninchipa shiminçhu nin: Pishipacujcunata puchuy-puchuyta tarichin. Puchuy-puchuypa tarichishanpita imay-imaypis mana jungangapächu. 10Tayta Diosninchi llapançhüpis yanapämanchi. Murutapis, micuytapis tarichimanchi. Pishipacujcunata puchuy-puchuyta tarichinanchipäpis sumaj yanapämäshunpaj. 11Puchuy-puchuyta tarichimaptinchi, puchuy-puchuyta çhurashun. Cuyachicuyniquita çhayachiptï, irmänunchicuna jatunpa cushicunga. Tayta Diosninchitapis sumaj alliman çhuranga. 12Cuyachicuyniquita çhayachiptï, irmänucuna pishipacushanta tarichinquipaj. Chaura cushicushpan llapan shungunwan Tayta Diosninchitapis alliman çhuranga: 13Ima allish Tayta Diosninchi mana jungamanchichu. Corinto irmänucunapis llapan shungunwan Washäcuj Jesúspa shiminta çhasquicusha. Chaymi puchuy-puchuytapis apaycächillämun. Waquincunapäpis tariycächin nir. 14Chaymi jamcunapaj llapan shungunwan mañacunga: Taytallau Tayta, ima allish Acaya quinrançhu irmänucunata llaquipar sumaj yanapashcanqui nir. 15Ima allish llaquipäcuj Tayta Diosninchi yanapaycämanchi. Tantiyayta mana atiparsi, sumaj-sumaj cushicunchi.

will be added

X\