1 Irmänucunallau irmänu, Tayta Diosninchi wamrachacamänanchipaj mayna aunimashcanchi. Chaymi juchata ama rurashunchu. Shungunchiçhüpis ima llutancunatasi ama pacarächishunchu. Manchäga Tayta Diosninchita manchapacushun. Shungun munashallanta rurar cawashun. 2 Irmänucuna, llaquinacur cawashuwan. Nuwacuna mana mayganiquitapis pampaman çhurashcajchu. Mana jagayächishcajchu. Mana imayquicunatapis ushyapashcajchu. 3 Llapantapis rimä mana nanapararchu. Jamcunata wañuy-caway llaquishayqui. 4 Chaymi jamcunaman sumaj yupachicü. Jamcunapita sumaj cushicü. Jamcuna-raycur ñacayman çhayaptïpis, llaquicuyman çhayaptïpis, shungü ancashyärin. Jatunparaj cushicurï. 5 Macedonia marcaman çhayamushäpita-pacha jamayta mana tarishcächu. Manchä tucuy-jinanpa ñacashcä. Runacuna ticrapamashanpita llaquicushcä. Jamcuna-raycur yarpaçhacur llutäpacushcä. 6 Tayta Diosninchim ichanga llutäpacujcunata shacyächin. Tituwan tincuchimar, nuwatapis shacyächimasha. 7 Tito çhayamur, cushicushpan nimasha: Corinto marca irmänucuna manchapacur cawarcaycan. Ichanga ñaupata ticshaparänacushayquipitash jatunpa llaquicun. Cananga jamwan tincuytash munaycan. Chaynuy willamaptin, jatunpa cushicushcä. 8 Ñaupata cartacamushä llaquicuymanshi çhurashcashunqui, ¿au? Quiquïpis llaquicurishcäraj; cananmi ichanga, mana. 9 Manchäga jatunpa cushicü. Pingayman çhuraypa piñacuptijraj, wanacushcanqui. Cananga llapan shunguyquiwan Tayta Diosninchiman yupachicurcaycanqui. Chaymi cushicunquiman: Piñacamänanchipaj allipäçhi Tayta Diosninchi camacächisha nir. 10 Tayta Diosninchi camacaycachiptin, piñacamashanchicunatapis çhasquicushuwan. Piñacamashanchicuna alli caycan llaquicuyman çhayananchipaj. Llaquicur wanacuptinchi, jishpichimashpanchi Tayta Diosninchi alli cawayta tarichimanchi. Llaquicur mana wanacuptinchim ichanga, wañuymanpis çhayashunpaj. 11 Chaymi rasullanta rimashcanqui: Pingayman çhuramänanchipaj allipäçhi Tayta Diosninchi camacächisha nir. Chaynuy captin, allipaj piñacushcaj. Cananga alli ñawiquiwan ricarcaycämanqui. Ticrapamaj runa pampaman çhuramaptinsi, sumaj nanachicamashcanqui. Paycuna chay-niraj nir rimay puriptinpis, sumaj llaquicushcanqui. Tayta Diosninchita manchapacur, chay runatapis sumaj piñacushcanqui. Cananga paypa shungun munashannuy cawaptiqui, sumaj cushicü. 12 Cartacamurpis, mana wiyächipashcajchu. Manchäga Tayta Diosninchipa ricay ñawinçhu nuwacunapaj yarpaçhacunayquipaj cartacamurä. 13 Mana jungamaptiqui, shungüpis jatunpa cushicusha. Titupis cutimur, shacyächillämasha. Ima allish jamcunapis payta shacyächishcanqui. 14 Allipaj Tituta nirä: Corinto marcaçhu irmänunchicunata alli ñawïpa ricä. Quiquinpis alliçhu jurgushcashunqui. Jamcunata willapäshaj-jina Titupis chaynuylla willamasha: Paycuna rasunpa Tayta Diosninchipa shungun munashannuylla cawarcaycan nir. 15 Jamcunaga Titupa shungunman sumaj tincunqui. Manchapacur çhasquicushayquipita, shiminta wiyacushayquipita paypis jatunpa cushicun. 16 Chaynuy cawashayquipita jamcunaman sumaj yupachicü.
