2 Corintios 2

1Chaymi watucuyta munarpis: Corinto irmänucunata llaquicuyman çhurarüman nir mana shamushcächu. 2Jamcuna sumaj shacyächimashcanqui. Chaymi piñapar llaquicuyman çhuraptij, ¿piraj shacyächimanga? 3Jamcuna shacyächimänayqui camacan. Llaquicuyman çhuramänayquim ichanga mana camacanchu. Chaymi cartallata apachimushcä. Tantiyacuptiqui, shacyächinacur cushishalla cawashunpaj. 4Piñapaypa cartacamur, juyupa llaquicur wagashcäraj. Mayganiquitapis llaquicuyman çhurayta mana munashcächu. Manchäga sumaj llaquipäshajta tantiyacärinayquita munashcä. 5Achcaman çhayachiyta mana munächu. Chaypis mana upällacümanchu. Tincupämaj runa mana quiquillätachu llaquicuyman çhuramasha. Manchäga jamcunatapis llaquicuyman çhurashcashunqui. 6Ima captinpis, juyu ñawiquiwan ama ricaynachu. Mayna piñapashcanqui. 7Wanacush captin, juchanta ama yarparaynachu. Manchäga shacyächinquiman. Mana shacyächiptiqui, pingay-tucushçhi ushyacanga. 8Chay runata alli ñawiquipana ricaycäriy. Llaquipaycäriy, ari. 9Chaynuypis shunguyquita musyapayta munar, mayna cartacamushcä: ¿Mä, jucpa shimintachush çhasquicunga? ¿Shimïllatachush wiyacunga? nir. 10Chay runapa juchanta mana yarparaptiqui, nuwapis mana yarparäshänachu. Juchacush captinsi, jamcuna-raycur juchanta mayna jungaycushcä. Washäcuj Jesúspis musyaraycanna. 11Chaynuy ruraptinchi, Supay mana maquichacamäshunchu. Supayga llapanchita juchaman jançhayta munaycamanchi. 12Tróade marcaçhu Washäcuj Jesúspa alli willapanta willapäcuj çhayaptï Tayta Diosninchi camacächiptin, llapan runa cushishalla çhasquicallämasha. 13Chaypis irmänu Tituwan mana tincur, llutäpacushcä. Chaymi: Aywacuycäna nir Tróade marcapita Macedonia quinranpa aywacushcä. 14Cananga Tayta Diosninchita alliman çhurayculläshun. Washämänanchi-raycur Washäcuj Jesústa caçhamusha. Payga llapallanta içhipur, Tayta Diosninchipa maquinçhu puriycächimanchi. Chaymi Jesúspita willapäcur puriptï, may-chayçhüpis runacuna wiyarcaycan. 15Tayta Diosninchi camacächiptin, nuwanchi-raycur Jesús wañuyman çhayasha. Chaymi Washäcuj Jesúspita willapäcur puriptï, shiminta çhasquicujcunata jishpichinga. Mana çhasquicujcunatam ichanga ushyacayman çhayachinga. 16Paycunaga Jesúspa shiminta wasguipan. Chaypita wañuymanpis çhayanga. Çhasquicujcunam ichanga Jesúspa shiminta wiyacärin. Chaypita mana ushyacaj cawaymanpis çhayanga. Chaymi Tayta Diosninchipa shiminta sumaj willapäcuycaptïsi, runacuna çhasquicunanpis, wasguinanpis mana nuwapitachu. Tayta Diosnillanchi musyaraycan. 17Waquin runa paçhan-raycullar willapäcur purin. Nuwacunam ichanga llapan shungüwan willapäcuycä. Tayta Diosninchi caçhacamaptin, Washäcuj Jesúspita willapäcur puriycä. Rimashäta quiquin Tayta Diosninchipis musyaraycan.

will be added

X\