2 Corintios 1

1- 2 Corinto marcaçhu, Acaya quinrançhu jutucaj irmänucuna, nuwa Pablo, Washäcuj Jesúspa caçhan cashpä irmänunchi Timoteuwan ishcanï cartacallämü. Tayta Diosninchi camacächiyninpa Jesúspa shiminta willapäcur puriycä. Tayta Diosninchipis, Tayta Jesucristupis yanapayculläshunqui. Allilla cawaycachilläshunqui. 3Tayta Diosninchita alliman çhurayculläshun. Payga Taytanchi Jesucristupa Taytan. Alli shungu cashpan sumaj llaquipämanchi. Shacyächimanchi. 4Tucuy-jinanpa ñacaptïpis, shacyächiman. Shacyächimashan-jina ñacajcunatapis shacyächinä camacan. 5Washäcuj Jesús-janan sumaj ñacachimashan-tupu nuwacunata Tayta Diosninchi sumaj shacyächiman. 6Shacyaycächimaptin, jamcunata shacyächinajpis camacan. Jamcuna-raycur ñacayman çhayashcä. Tayta Diosninchim ichanga llaquipämashpan shacyächiman. Canan jamcunatapis llaquipar, shacyächijman Tayta Diosninchiman sumaj yupachicunayquipaj, jishpichishunayquipaj. Chaymi jamcunapis ñacayman çhayar, ama yamacanquichu. 7Washäcuj Jesús-janan llapanchi ñacayman çhayashcanchi. Tayta Diosninchim ichanga llaquipämashpanchi shacyächimanchi. Chaymi shacyächishunayquita sumaj musyä. 8Irmänucuna, Asia quinrançhu imanuy-imanuy ñacashätapis willashayqui. Juyupa ñacachimaptin, mana içhipushcächu. Cawaytapis mana yarpashcächu. 9Wañuy janäçhu caycasha. Chaycuna çhayapamaptin, cawaynïpis, wañuynïpis mana nuwapitachu cashanta tantiyacushcä. Chayraj Tayta Diosninchiman sumaj yupachicuyta yaçhacushcä. Payga wañushcunatapis cawarachin. 10Quiquinmi wañuypitapis washämasha. Washämashannuylla imaypis jishpichimanga. Cananga imaman çhayarpis, jishpichimänanta sumaj yupachicü. 11Washämänanpaj Tayta Diosninchita mañacärinqui, ari. Mañacärishayquita wiyaptin, achcaj runapis Tayta Diosninchita ninga: Taytallau Tayta, ima allish Pablutawan Timoteuta sumaj yanapashcanqui nir. 12Irmänucuna, tincupämajcuna imata rimamaptinsi, mana llullacushcächu. Shungüpis musyan. Ricay ñawiquiçhüpis alli cawashcä. Tayta Diosninchipa maquinçhu cawar, mana alli-tucüchu. Mana runacuna ashishantachu willapäcur puriycä. Manchäga llaquipämashanpita Tayta Diosninchipa shiminta willapäcuycä. 13Cartacamurpis, shungü yarpashanta mana pacallar cartacamushcä. Cartacamushäta liguir, sumaj tantiyacärinquiman. 14Waquinniqui mayna shungüta musyapashcanqui. Chaymi Taytanchi Jesús cutimuptin, nuwacunapaj ninquipaj: Ima allish Jesúspita willapämasha. Jamcunapäna nishaj: Ima allish Jesúspa shiminta çhasquicusha. 15- 16 Jamcunata musyapajmi. Chaymi ishcay cutipa watucuyta yarparsi Macedonia quinranpa aywar, çhayamuyta yarpashcä. Cutimurpis, çhayamuyta munashcä. Chaypitaraj Judea quinranpa cuticüman caran. Cuticuptï, jamcunapis yanapämanquiman caran. 17Mana çhayamuptïmi ichanga, ama yarpanquichu: Chay runa shiminta mana çharcunchu nir. Nuwa mana ishcay-quimsatachu rimä. 18Tayta Diosninchi shiminta çharcushan-jina nuwapis shimïta çharcü. Aunir, mana jipaman cutiricüchu. 19Washäcuj Jesúspis Tayta Diosninchipa Wawan cashpan shiminta çharcuran. Paypita willapäcurcaycä Timoteuwan, Silvanuwan quimsanï. 20Washäcuj Jesús Tayta Diosninchi aunishanta llapallanta çharcun. Aunishanta çharcushanpita: Chaynuy caycullächun nir Tayta Diosninchita alliman çhuranchi. 21Paymi acracamashcanchi Washäcuj Jesúspa maquinçhu cawananchipaj. Shungun munashannuy cawananchipäpis yanapaycämanchi. 22Canan wawan cashanchi musyacänanpaj Espíritu Santu maquinçhu puriycächimanchi. 23Irmänucuna: Watucushayqui nirpis llaquicuyman çhayanayquita mana munar, Corinto marcaman mana shamushcächu. Jamcunawan alli ricanacuyta munashäta Tayta Diosninchipis musyan. 24Tayta Jesúspa maquinçhu cawaycaptiqui, maquichacunaj mana camacanchu. Manchäga alli shimilläpa imatapis tantiyachishayqui llapan shunguyquiwan Tayta Diosninchipa maquinçhu cushishalla cawanayquipaj.

will be added

X\