1 Timoteo 6

1Irmänucunapis maquinçhu cawashpan patrunninta alli ricanman. Manchäga waquin runa Tayta Diosninchitapis, shiminta tantiyachishätapis pampaman çhuranga. 2Patrunnin irmänu captinpis, alli ricanman. Ama taricunmanchu: Irmänümi nir. Manchäga sumaj arüshinman: Irmänu-masïçhümi aruycä. Paywan yaçhänacümi nir. Timoteo, willapashajta llapan irmänuta willapanqui. Imata rurananpäpis sumaj tantiyachinqui. 3Waquin irmänu: Taytanchi Jesucristupa shiminta willapäcuycä nirpis umanpita jurgurcullar, imatapis riman. Rimashanga Jesúspa shiminwan mana tincunchu. Tayta Diosninchipa shungun munashannuy cawananchipäpis mana tantiyachimanchichu. 4Paycuna yaçhaj-tucullar, shiminman çhayashallanta riman. Upa cayninwan imallatapis tantiyachicun. Tincupänacuyllaçhu arur, cushicärin. Chiquinacärin. Nanaparänacärin. Ticshaparänacärin. 5Maganacärin. Llapantapis ruran Tayta Diosninchita mana wiyacur. Tayta Diosninchipa shiminta willacuycä nir llapanpa janançhu cushish cawayta ashillar purin. 6Tayta Diosninchipa maquinçhu cawar, rasunpa cushish cawanchi. Ichanga tarichimashallanchiwan cushish cawashuwan. 7Llapanchi jinalla yurimushcanchi. Wañucur, imatapis mana apashunchu. 8Chaymi micunanchipaj, jananchipaj caycaptin, cushishalla cawacushuwan. 9Rïcuyayta ashijcunam ichanga, jucha aparicuyman çhayan. Quiquillanpaj imatapis ashir, runa-masinta ñacachin. Chaypitam quiquinpis ñacayman çhayanga. Ushyapacanga. 10Jillayllata ashijcuna jatun juchaman çhayan. Jillayllata ashijcuna achcajnam Tayta Diosninchita mana wiyacunchu. Mana wiyacushanpita tucuy-jinanpa ñacarcaycan. 11Timoteo, chay-niraj runacuna-jina ama cawanquimanchu. Manchäga Tayta Diosninchita manchapacuj runa canquiman. Paypa maquinçhu cawar, shungun munashallanta rurar cawanquiman. Waran-waran sumaj yupachicuyta yaçhacunquiman. Runa-masiquitapis llaquinquiman. Imaman çhayarpis, ama yamacanquichu. Llapan runawan tantiyacuj canquiman. 12Ima captinpis, llapan shunguyquiwan Jesúsman yupachicunquiman. Paypa maquinçhu imaycamanpis alli cawayta tarishana caycar, ama caçharinquimanchu. Tayta Diosninchi acracushcashunqui alli cawayman çhurashunayquipaj. Jampis llapanpa ñaupançhu: Tayta Diosninchipa maquinçhu cawashaj nir Jesústa çhasquicushcanqui. 13Cawachicuj Tayta Diosninchipa ricay ñawinçhüpis, Washäcuj Jesúspa ricay ñawinçhüpis willapaycaj. Mandaj Poncio Pilato tapuptinpis, Jesús mana chapacuranchu. Manchäga rasun-cajllata willaparan. 14Chaymi, Timoteo, Taytanchi Jesucristu cutimushancaman willapashajta ama junganquimanchu. Llapanta sumaj-sumaj çharcunquiman. 15Tayta Diosninchi camacächishan junaj Jesús cutimunga. Paylla alliman çhurash canan. Quiquillan llap-llapanpaj munayniyuj. Maquinçhu llapan mandajcuna cawan. Auturdäcunatapis maquinçhu purichin. 16Paylla imay-imaycamanpis cawacuj. Achic-achicyaycajçhu juyan. Paytaga mana pisi ricashachu. Ricaytapis mana junchu. Tayta Diosninchi alli ricash caycullächun. Imay-imaycamanpis munayniyuj caycullächun. Chaynuy caycullächun. 17Llapan imacunapis ushyacajlla. Chaymi puchuy-puchuy janançhu cawaj irmänucunata willapanqui mana alli-tucunanpaj, rïcu cashanman mana yupachicunanpaj. Manchäga Tayta Diosnillanchiman yupachicunman. Payga mana pishïchimanchichu. Yanapämanchi cushishalla cawananchipaj. 18Chaymi puchuy-puchuy janançhu cawaj irmänucuna allillata rurar cawanman. Alli rurashanga mana imaypis ushyacaj canman. Alli shungu cashpan pitapis tarichinman. Yanapanman. 19Sumaj tantiyacushun. Puchuy-puchuy janançhu cawajcuna alli cawayta munar, allillata imatapis ashin. Alli wasita jatarachinanpäpis simintuta sumaj rurachin. Chay-jina puchuy-puchuy janançhu cawaj irmänucunapis allillata rurar cawanman. Chaynuy cawaptin, Tayta Diosninchipis alli cawayta tarichinga. 20Timoteo, carguyquita çharcushayquicaman Tayta Diosninchipa shimillanta willapäcunquiman. Runacuna umallanpita jurgurcur rimashanta ama çhasquipanquimanchu. Paycuna yaçhaj-tucurpis, manacajllata tantiyachicun. 21Waquin irmänucuna yaçhaj-tucujcunapa shiminta wiyar, Tayta Diosninchiman mana yupachicunnachu. Tayta Diosninchi llaquipayculläshunqui, ari. Chayllana.

will be added

X\