1 Timoteo 1

1Timoteo, nuwa Pablo cartacamü. Washäcuj Jesúspa caçhan caycä. Shiminta willapäcur purinäpaj Washäcuj Jesúswan Tayta Diosninchi caçhacamasha. Paymi jishpichimanchi. Yupachicuptinchi, Jesús alli cawayta tarichimäshun. 2Timoteo, shimïta wiyar Jesústa çhasquicushayquipita wamräta-yupay ricaj. Tayta Diosninchipis, Taytanchi Jesucristupis llaquipayculläshunqui. Yanapayculläshunqui. Allilla cawaycachilläshunqui. 3Timoteo, Éfeso marcapita ama llucshinquichu. Macedonia quinranman manaräsi aywallar, llapanta willapashcaj. Irmänunchicunata ama caçharinquichu. Pipis llutanta tantiyachicuptin, miçhanqui. 4Auquilluyquicuna yarpashan-janan ama tincupänacunquichu. Pï-pï auquilluyqui cashantapis ama jurgapänacunquichu. Jurgapänacur, piñanacuyllaman pipis çhayan. Tayta Diosninchipa shungun yarpashanmanpis mana tincunchu. Llapan shungunchiwan shiminta çhasquicurraj, paypa maquinçhu cawanchi. 5Chaymi llapan shunguyquiwan llaquipäcuj canayquita munar, willapaycaj. Llaquipäcuj caycar, llapan shunguyquiwan llaquinacäriyta yaçhanquiman. Shunguyquiçhu ima juchatapis ama pacarächinquimanchu. Tayta Diosninchiman yupachicur, ama janan shungulla yupachicunquimanpishchu. 6Waquin runa llutanta yarpashpan mana llaquipänacärinchu. Chaymi jurgapänacullar, tincupänacullar cawan. 7Moiséspa shiminta sumaj tantiyä nir yaçhaj-tucurpis, imata rimashantapis mana tantiyanchu. 8Imapaj rimashantapis sumaj tantiyaycuptinchiga, Moiséspa shimin alli quiquin Tayta Diosninchipa shimin cashpan. 9Moiséspa shimin mana Tayta Diosninchipa shungun munashannuy cawajcunatachu piñacun; manchäga mana wiyacujcunata, juyu runacunata, jucha aparicujcunata, Tayta Diosninchita mana manchapacujcunata, quiquinpa shungun munapashanta ashijcunata, runa-masinta wañuchicujcunata, maman-taytanta wañuchijcunata, 10jucwan-jucwan cacujcunata, warmi-pura, ullgu-pura cacujcunata, runa-masinta suwajcunata, llullacujcunata, tumpacujcunata, Jesúspa shiminta ticrapujcunata. Chay-niraj runacunata Tayta Diosninchi piñacun. 11Shiminta willapäcunäpaj caçhacamaptin, Jesúspa alli willapanta willapäcur puriycä. Munayniyuj Tayta Diosninchita alliman çhurayculläshun. 12Ima allish Taytanchi Jesucristu shacyächiman shiminta willapäcur purinäpaj. Maquinçhümi purichiman. Yupachicamar, munashanta ruranäpaj çhuramasha. 13Unayga: Allita ruraycä nir Jesústa ashllir ushyarä. Paypa shiminta çhasquicujcunatapis jaticaçhar ushyarä. Chiqui runa carä. Chaypis payman mana yupachicuynïpa, upa caynïwan rurashäpita Jesús llaquipämar, llapan juchäta jungasha. 14Llaquipämashpan yanapaycäman llapan shungüwan payman yupachicunäpaj, llapan runa-masïtapis llaquipar alli ricanäpaj. 15Sumaj tantiyacushun. Shungunchimanpis sumaj çhuracushun. Jucha-sapacunata washänan-raycur Washäcuj Jesús cay pachaman shamusha. Llapan runa jucha-sapa caycaptinsi, jucha-sapa caynïman pipis mana tincuranchu. 16Jucha-sapa caynïman pipis mana tincuptin, llaquipämashpan Washäcuj Jesúspa maquinçhu cawanäpaj Tayta Diosninchi camacächisha. Chaynuypa pipis ricacamar, tantiyacunga: Jucha-sapa caycaptinchisi, Tayta Diosninchi llaquipämanchi. Washäcuj Jesústa çhasquicuptinchi, imaycamanpis maquinçhu cawachimäshun nir. 17Tayta Diosnillanchita imay-imaypis alli ricayculläshun. Alliman çhurayculläshun. Mandaj cayninga imaypis mana ushyacajmi. Imay-imaycamanpis cawacujmi. Payga mana ricacajmi. Payllam Tayta Diosninchi. Chaynuy caycullächun. 18- 19 Wawallau Timoteo, imaman çhayarpis, willapashajta ama junganquichu. Imata ruranayquipäpis Tayta Diosninchi mayna musyachicusha. Chaymi payman llapan shunguyquiwan yupachicunquiman. Shunguyqui shacyächishantapis ruranquiman. Waquin irmänucuna Tayta Diosninchi shungunta musyaycächiptinsi, mana wiyacunchu. Mana imasi jucullar, quiquinpa shungun munashallanta ruracun. 20Mana wiyacushanpita Alejandrutapis, Himeneutapis Supaypa maquinman çhurashcä. Chayrämi Tayta Diosninchita yapay mana apärinanpaj tantiyacunga.

will be added

X\