1 Tesalonicenses 2

1Irmänucuna, allipaj watucuj shamushäta musyanqui. 2Musyashayquinuypis Filipos marcaçhu runacuna ashllir ushyamasha. Sumaj ñacachimasha. Ñacachimash captinsi, Tayta Diosninchiman yupachicur shiminta willapänä-raycur jamcunaman çhayamushcä. Marca-masiquicuna chapata ruramaptinsi, paypa alli willapanta willapashcaj. 3Mana mishquichipallarchu riguichishcaj. Mana pantachicurchu willapashcaj. Yaçhachirpis, mana llutantachu yaçhachishcaj. 4Shungüta Tayta Diosninchi musyapan. Payga shiminta willapäcunäpaj çhuramasha. Chaymi runacunata mana cushicachinalläpächu willapäcuycä; manchäga Tayta Diosninchipa shungunman tincunanpaj. Payga llapan runapa shungunta musyapan. 5Irmänucuna, mana jatun-tucushäta musyanqui. Mana jillay-raycullarchu willapäcushcä. Chaytaga Tayta Diosnillanchipis musyan. 6Runacuna manchapacamar: Taytallau tayta nimänanta may-chayçhusi mana ashishcächu. 7Washäcuj Jesúspa caçhan caycar, alli-tucuyta alli-tucüman caran. Chaypis mana alli-tucushcächu. Manchäga juc mama wamranta alli ricashan-jina jamcunatapis llaquipashcaj. 8Yaçhänacushpanchi Jesúspa alli willapanta willapänaj-raycur imamanpis çhayäman caran. Mana willapashalläwanchu ushyaranga. Manchäga wañuytasi jina tarïman caran. 9Irmänucuna, nuwacuna sumaj arushätapis, ñacashätapis ama junganquimanchu. Tayta Diosninchipa alli willapanta willapäcushä wichan sumaj arur, pagas-junajpis jamayta mana tarishcächu. Arushcä mana runapa-cajllaman ricaränäpächu. 10Manchapacur cawapäcushäta jamcunapis, Tayta Diosninchipis musyan. Ricay ñawinçhüpis, ricay ñawiquiçhüpis allillata rurar cawapäcushcä. Mana imaçhüpis juchallicushcächu. 11Jamcunata wamräta-yupay ricashcaj. 12Chaymi shacyächipaycar, willapaycar, anyapaycar, llapaniquiwan juyashcä. Tayta Diosninchipa shungun munashannuy cawanayquipaj yaparir-yaparir willapashcaj. Paymi acracamashcanchi maquinçhu imaycamanpis cushishalla cawananchipaj. 13Irmänucuna, Tayta Diosninchipa shiminta willapaptï, çhasquicärishcanqui: Paycuna Tayta Diosninchipa shiminta willapaycämanchi; mana runapa yarpayllanpitachu nir. Tayta Diosninchipa shimin captin, shunguyquiman çhayasha. Payman yupachicuptiqui, maquinçhüna puriycächishunqui shungun munashannuy cawanayquipaj. Chaymi jamcunapita mana yamacällar nï: Taytallau Tayta, ima allish shimiqui shungunman çhayasha. Chaymi çhasquicärishcashunqui. 14Chaypis marca-masiquicuna ñacachishcashunqui Washäcuj Jesúsman yupachicur Tayta Diosninchipa maquinçhu cawashayquipita. Judea quinrançhu jutucaj irmänucunata Israel marca-masincuna ñacachishan-jina jamcunatapis ñacaycächishunqui. 15Judea marcacunaçhu Tayta Diosninchipa willacujnincunatapis, Tayta Jesústapis wañuchiran. Nuwacunatapis jaticaçhämar ushyamasha. Paycuna chiqui runa. Tayta Diosninchita ullgüchin. Runa-masincunapa cunçhan jatarin. 16Chiquicuj Israel runacuna chapata ruraman. Juclä marcacunaçhu Tayta Diosninchipa shiminta mana ricsijcunata willapänätapis miçhäman. Maquinçhu cawananpaj Tayta Diosninchi jishpichinantapis mana munanchu. Juchaçhu arurpis, juchanta miraycächin. Chay-niraj cashanpita Tayta Diosninchipis ullgur ñacayman jaycurij-jaycurijllana caycan. 17Irmänucuna, jamcuna-cajpita aywacur, sumaj llaquicushcä. Jamcunapaj yarparar, llapaniquiwan tincuyta sumaj munashcä. 18Nuwacuna watucuj shamuyta sumaj munashcä. Quiquïpis achca cuti shamuyta munashcä. Chaypis Supay chapata llapanïta ruramasha. 19- 20 Ichanga Tayta Diosninchiman yupachicushayquipita, maquinçhu cawashayquipita sumaj cushicü. Jesúspa ñaupançhüpis tincushunpaj. Taytanchi Jesús cutimur arushanchipita tapumaptinchi, jamcunapita sumaj cushicur, shungücunapis achicyacäcunga.

will be added

X\