1 Pedro 5

1Mayur irmänucuna, Washäcuj Jesús ñacashanta ñawïwanraj ricashcä. Munayniyuj cashpan achic-achicyaycaj cutimuptinpis, jatunpa cushicushaj. Chaymi anyapäshayqui. 2Uyshïru uyshanta ricashan-jina irmänunchicunata sumaj ricanquiman. Paycunata Tayta Diosninchi maquiquiman çhurasha mana jillanällar ricanayquipaj. Manchäga cushi-cushilla ricanayquita munaycan. Jillayllata ama ricaranquimanchu. 3Nishayqui-nishayqui imatapis ama rurachinquimanchu. Manchäga ricacushunayquipaj Tayta Diosninchita manchapacur cawanquiman. 4Jesús cutimur, mayur irmänucunata ricaj cashpan, alli cawayman çhuramäshunpaj. Alli cawayman çhuramashanchi imaypis mana ushyacangachu. 5Müsucuna, jamcunapis mayur irmänucunata wiyacunquiman. Ama alli-tucunquimanchu. Manchäga tantiyanacur imaçhüpis yanapänacunquiman. Tayta Diosninchipa shiminpis nin: Tayta Diosninchi alli-tucujcunata mana yanapanchu. Alli shungucunatam ichanga llaquipar yanapan. 6Llapanchipis mana alli-tucullar Tayta Diosninchipa maquinçhu cawashun. Paymi munayniyuj. Shungun munaptinraj, alliçhu jurgamäshunpaj. 7Llaquipämanchi. Chaymi imapitapis ama yarpaçhacushunchu. Manchäga paypa maquinçhu cawar, llapanta willashun. 8Sumaj tantiyacushuwan. Ricchaycar purishun. Supay chigaypa chiquimanchi. Yargaj liyun-jina purin ricashanta ushyarinanpaj. 9Chaymi sumaj içhipushun. Jesúspa maquinpita ama witicushunchu. Cay pachaçhu mana nuwallanchichu ñacarcaycanchi. Waquin irmänunchicunapis ñacarcaycan. 10Chaypis llapanchita llaquipämashpanchi quiquin Tayta Diosninchi Washäcuj Jesúspa maquinman çhuramashcanchi imaycamanpis cawananchipaj. Chaymi ñacapäriptinchisi, Tayta Diosninchi jatarachimäshun. Payman sumaj yupachicunanchipaj yanapämäshun. Yanapämaptinchi, maquinpita mana witicushunpächu. Shimintapis mana jungashunpächu. 11Payga sumaj munayniyuj. Payllata imay-imaypis alliman çhurayculläshun. Chaynuy caycullächun. 12Cay cartata irmänunchi Silvano isquirbipämasha. Payga Tayta Diosninchipa ricay ñawinçhu alli cawan. Payman sumaj yupachicü. Shacyächinajpaj cartacamü. Tayta Diosninchi sumaj llaquipämanchi. Chaymi maquinpita ama witicunquichu. 13Babilonia marcaçhu jutucaj irmänunchicuna wamayäshunqui. Marcosnïpis wamayäshunqui. 14Quiquiquicunapis llapallayqui wamayänacunqui, ari. Tayta Jesucristupa maquinçhu cawajcuna llapaniqui allilla cawaycullay, ari. Chayllana.

will be added

X\