1 Washäcuj Jesús ñacash caycaptin, ñacayta ama manchacushunchu. Pay-jina ñacar, jucha rurayta mana munapäshunnachu. 2 Juchaçhu aruj runacuna-jina ama cawashunchu. Manchäga Tayta Diosninchipa shungun munashallanta imaypis rurashun. 3 Unayga jamcunapis juchallaçhu arushcanqui. Shunguyqui munashallanta rurashcanqui. Warminar, runanar puricushcanqui. Tünallaçhu arushcanqui. Paçhallayquipaj ashishcanqui. Upyallaçhu arur, marca-pingay cawashcanqui. Moiséspa shiminçhu miçhaycäshuptiquisi, jircacunata taytachacur manchapacushcanqui. 4 Cananga mana tallupaptiqui, tantiyayta mana atipashpan juchaçhu arujcuna washayquita riman. Ashllir ushyashunqui. 5 Chaypis Tayta Diosninchi ima rurashantapis llapanta jurgapangapaj. Mana chapangapächu. Cawajcunapis, wañushcunapis maquinçhu caycan. 6 Chaypämi wañushcunata Jesúspa shiminta willapäcuran. Paycuna cawaycällar, jucha aparicushanpita wañucuran. Chaypis Tayta Diosninchipa ricay ñawinçhu cawarcaycanraj. 7 Cay pacha ushyacangapaj. Chaymi imatapis sumaj tantiyacuy. Tayta Diosninchita mañacullar caway. 8 Jucniqui-jucniquipis llaquinacäriy. Llaquinacur tucuy-jinanpa nanächinacursi, juclla ushyacächinqui. Ama yarparanquinachu. 9 Pipis pachacuyta ashiptin, mana jamurpällar pachächiy. 10 Tayta Diosninchi yaçhayta camapushushayquiman-tupu yanapänacunqui. Tucuyta yaçhananchipaj yarpayta jumashcanchi. Chaymi llaquipämashanchi-jina sumaj yanapänacunqui. 11 Pipis willapäcur, Tayta Diosninchipa shimillanta willapäcuchun. Pipis yanapäcur, Tayta Diosninchi tarichishanman-tupulla yanapäcuchun. Imatapis rurar, Tayta Diosninchita alliman çhurashun. Alliman çhurashanchita Washäcuj Jesús camacächin. Chaymi imay-imaypis munayniyuj Tayta Diosninchita alliman çhurayculläshun. Chaynuy caycullächun. 12 Irmänucunallau irmänu, ima ñacayman çhayarpis, ama llaquicärinquichu: ¿Imanirraj ñacaycä? nir. 13 Manchäga Washäcuj Jesús ñacashan-jina ñacar, cushicärinquiman. Pay munayniyuj cashpan achic-achicyaycaj cutimuptin, jatunpa cushicushunpaj. 14 Washäcuj Jesústa çhasquicushayquipita pipis ashllishuptiqui, ama llaquicunquichu. Munayniyuj Espíritu Santu yanapaycämanchi. 15 Runa-masiquita wañuchishayquipita, suwacushayquipita, juyu cashayquipita, mitichi cashayquipita runacuna ñacachishuptiqui, pingayman çhayanayqui camacan. 16 Washäcuj Jesústa çhasquicushayquipita ñacachishuptiquim ichanga, ama pingacunquichu. Manchäga cushicur Tayta Diosninchita ninquiman: Taytallau Tayta, ima allish Jesúspa maquinçhu cawaycächimanqui nir. 17 Cananga Tayta Diosninchipa maquinçhu cawajcunataraj ñacachiyta jallaycusha. Nuwanchipis ñacayman çhayaycaptinchi, ¿Jesúspa shiminta wasguipajcuna imamanraj çhayanga? 18 Wiyacujcuna ñacarraj Tayta Diosninchipa maquinman çhayaptin, ¿mana manchapacuj juchaçhu aruj runacuna imamanraj çhayanga? 19 Ñacananchipaj Tayta Diosninchi camacächiptin-ima paypa maquillançhu cawashun. Allillata rurar cawashun. Payga shiminta çharcun. Llapanta Camaj Tayta Diosninchi mana imaysi caçharimäshunpächu.
