1 Pedro 1

1Irmänucuna, nuwa Pedro Washäcuj Jesúspa caçhan car cartacamü. Tayta Diosninchipa acracushan carpis, jurpay-tucullar juyaycanqui Ponto quinrançhu, Galacia quinrançhu, Capadocia quinrançhu, Asia quinrançhu, Bitinia quinrançhu. Llapaniquiman cartacallämü. 2Unaypita-pacha shungun munaptin, Tayta Diosninchi acracushcashunqui. Shungun munashannuy cawanayquipaj Espíritu Santu yanapaycäshunqui. Chaymi Washäcuj Jesúspa shiminta çhasquicushcanqui. Payga nuwanchi-raycur wañuyman çhayasha Tayta Diosninchiwan allina ricanacunanchipäpis, llapan juchanchi jungacänanpäpis. Tayta Diosninchi llaquipayculläshunqui. Allilla cawanayquipaj yanapayculläshunqui. 3Tayta Diosninchita alliman çhurayculläshun. Paymi Taytanchi Jesucristupa Taytan. Llaquipämashpanchi Washäcuj Jesústa wañuypita cawarachimusha. Cananga Jesucristupa maquinçhu cawaycanchi. Wañushanpita cawarimuyninpa mushuj cawaytapis tarichimashcanchi. Maquinçhu imaycamanpis cawananchipaj llapan shungunchiwan yupachicuycanchi. 4Mushuj cawayta tarichimashpanchi janaj pachaçhu irinsanchitapis jumäshunpaj. Jumänanchi irinsa mana ushyacangachu. Mana janrayangachu. Mana maucayangachu. 5Tayta Diosninchi munayniyuj cashpan shiminta çhasquicushanchipita imapitapis jishpichimanchi. Canan wichan ushyacaptin, jishpichimänanchi imanuy cashantapis tantiyachimäshunpaj. 6Maquinman çhayachimänanchi caycaptin, cushi-cushilla cawanchi. Chaypis camacaptin, tucuy-jinanpa ñacapärishun. 7Ichanga ñacaycunata içhipuptinchiraj, llapan shungunchiwan yupachicushanchi musyacanga. Sumaj tantiyacushun. Juritapis alli cashanta musyananpaj ninawanraj chulluchin. Juriga ushyacajlla. Nuwanchi yupachicushanchim ichanga juripitapis mas alli. Chaymi llapan shungunchiwan yupachicuptinchi, ñacaytapis içhipuptinchi, Washäcuj Jesús cutimur alli ñawinwan ricamäshunpaj. Alliman çhuramäshunpaj. Alliçhu jurgamäshunpaj. 8-9 Jesústa mana ricaycarsi, manchapacunchi. Mana ricaycarsi, llapan shungunchiwan yupachicunchi. Tantiyayta mana atiparsi, jatun-jatunpa cushicunchi. Yupachicushanchipita Tayta Diosninchi jishpichimäshun maquinçhu imaycamanpis cawananchipaj. 10Tayta Diosninchi jishpichimänanchipaj unay willacujcuna sumaj tapucaçharan. Mayacaçharan: ¿Pitaraj Tayta Diosninchi caçhamunga? nir. Jinarcur willacuran: Sumaj llaquipämashpanchi Tayta Diosninchi juc runata caçhamunga washämänanchipaj nir. 11Espíritu Santu rimachiptin, Washäcuj ñacanantapis, wañushanpita cawarircamur alli cayman çhayanantapis musyachiran. Chaymi paycunapis Washäcuj pï cashantapis, imay çhayamunantapis sumaj tantiyacuyta munaran. 12Chaypis tantiyacunan mana camacaranchu. Manchäga nuwanchita willapämaranchi. Tantiyacunanchipaj Tayta Diosninchi camacächisha. Janaj pachapita Espíritu Santuta caçhamusha. Chaymi rimachiptin, waquin willacujcuna Jesúspita willapämashcanchi. Willapämashanchita anjilcunapis tantiyacuyta munaran. 13Chaymi sumaj tantiyacurir, imatapis rimashun. Imatapis rurashun. Mana yamacällar Tayta Diosninchiman llapan shungunchiwan yupachicushun. Washäcuj Jesús cutimuptin, Tayta Diosninchi llaquipämashpanchi sumaj-sumaj yanapämäshunpaj. 14Irmänucuna, llapan shungunchiwan yupachicuycar, wiyacuj wamra-jina cawashun. Unay upa cayninchiwan juchata aparicushcanchi. Chay-jina ama cawashunnachu. 15Manchäga acracamajninchi Tayta Diosninchi allillata rurashan-jina nuwanchipis shungun munashallanta rurar cawashun. 16Shiminçhüpis nin: Juchata mana aparicüchu. Chaynuy jamcunapis juchata ama aparicunquichu. 17Chaymi: Tayta Diosninchipa maquinçhu cawaycä nir cay pachaçhu jurpay-tucullar purirpis, manchapacunquiman. Payga imatapis rurashanman-tupu llapan runapa juchanta jurgapanga. Pipa juchantapis mana chapangachu. 18Jamcuna mamayqui-taytayquipita-pacha juchallaçhu cawarcaycanqui. Jucha aparicuyllaçhu cawaycaptiquisi, Tayta Diosninchi rantiypa-yupay jishpichishcashunqui. Mana juripa çhaninwanchu, jillaypa çhaninwanchu rantishcashunqui; 19manchäga nuwanchi-raycur Washäcuj Jesús wañuyninpam. Wañuptin, allinnin uyshata jarashan-yupay Tayta Diosninchi çhasquisha. 20Cay pachata mana camallarraj, nuwanchi-raycur Jesús wañuyman çhayananpaj Tayta Diosninchi camacächiran. Ichanga jipataraj cay pachaman shamusha. 21Wañushanpitapis Tayta Diosninchi cawarachimusha. Alli ricashpan janaj pachaman jamachisha. Chaypita-pacha Tayta Diosninchiman yupachicunanchipaj, aunishanta shuyaränanchipaj yanapaycämanchi. 22Cananga Jesúspa shiminta çhasquicur, juchapita witicushcanqui. Juchapita witicur, llapan irmänuwan alli ricanacuyta yaçhacushcanqui. Chaymi llapan shunguyquiwan llaquinacäriy; ama janan shungullaga. 23Yapay yurish-yupay carcaycanchi, ichanga mana mama-taytapitachu; manchäga Tayta Diosninchipitana. Mama-taytapita yurish car, ushyacajlla canchi. Shiminta çhasquicuptinchim ichanga, Tayta Diosninchi cawachimanchi. Cawachicuj car, shimin mana imaypis jungacangachu. 24Chaymi nin: Runa jiwa-yupay. Callpayuj cayninpis, camarajlla cayninpis wayta-yupaylla. Jiwa chaquijlla. Waytapis ñallpujlla. 25Taytanchipa shiminmi ichanga imaypis mana jungacangachu. Paypa shimin alli willapa. Jesúspita willapashcashunqui.

will be added

X\