1 San Juan 5

1Yupachicujcuna Tayta Diosninchipa wawan cashpan maquinçhüpis cawan: Jesús Washäcuj nir. Tayta Diosninchipita cawaycar, irmänunchicunawanpis alli ricanacunchi chay Taytallapita cashpanchi. 2Tayta Diosninchita manchapacur maquinçhu cawar, shiminta wiyacur, irmänunchitapis llaquipänanchi chay Taytallapita cashpanchi. 3Tayta Diosninchita manchapacushanchi musyacänanpaj shiminta wiyacunchi. Shiminga mana sasa çharcuychu. 4Tayta Diosninchipa wawancuna maquinçhu cawar, jucha aparicuypita witicärin. Payman yupachicushpanchi supaytapis içhipunchi. 5Içhipunanchipaj Jesústaraj çhasquicunanchi. Payga Tayta Diosninchipa Wawan. 6Jesucristu cay pachaman shamur, yacuçhu ushyacuran. Rusçhu wañur, yawarnintapis jiçharan. Ichanga mana yacuwan ushyacushallanchu Tayta Diosninchipa Wawan cashanta musyachimanchi. Manchäga rusçhu wañur yawarninta jiçhashanpis musyachimanchi. Espíritu Santupis llapanta musyachimanchi. Payga imatapis rasullanta musyachicun. 7Chaymi quimsa yarpay Jesús shamushanta tantiyachimanchi. 8Quimsa yarpay juc yarpaylla caycan. Espíritu Santupis, yacuçhu ushyacushanpis, wañur yawarninta jiçhashanpis, llapan tantiyachimanchi Jesús rasunpa runa cashanta. 9Runa-masinchipa shiminta çhasquiycar, Tayta Diosninchipa shimintapis çhasquicushuwan. Paypa shimin sumaj Wawan Jesúspita tantiyachimanchi. 10Wawan Jesúsman yupachicur, Tayta Diosninchipa shimintapis çhasquicushcanchina. Wawanpita rimaycaptin shiminta mana çhasquicurmi ichanga, Tayta Diosninchitapis llullata-yupay ricaycanchi. 11Wawan Jesúspita rimar, mana ushyacaj cawayta tarichimashanchita musyachimanchi. Chayta tarinchi Wawan Jesúspa maquinçhu cawar. 12Tayta Diosninchipa Wawanpa maquinçhu cawar, mana ushyacaj cawayta tarinchi. Wawan Jesúspa maquinçhu mana cawajcunam ichanga mana cawangachu. 13Irmänucuna, Tayta Diosninchipa Wawan Jesúspa shiminta çhasquicush caycar, mana ushyacaj cawayta tarinayquitapis musyanquiman. Chaytam cartacaycämü. 14Nuwanchi Tayta Diosninchiman yupachicunchi. Mañacushanchi shungunman tincuptin, wiyamanchi. 15Mañacushanchita wiyaptin, llapan camacächishantapis musyanchi. 16Chaura juc irmänu tacsha juchata aparicuptin, Tayta Diosninchita mañacapushun mana wañucunanpaj. Tacsha juchaga Tayta Diosninchipita mana raquicächinchu. Chaymi mañacapuptinchi, mana ushyacaj cawayta Tayta Diosninchi tarichingapaj. Jatun juchata aparicujcunapaj mañacapunayquipämi ichanga mana rimacüchu. Jatun juchaga wañuyman runata çhayachin. 17Tayta Diosninchipa shungunman mana tincushancuna llapanpis jucha. Chaypis mana llapan juchachu wañuyman çhayachimanchi. 18Tayta Diosninchipa maquinçhu cawajcuna juchaçhu mana arunnachu. Tayta Diosninchipa Wawan Jesús washämanchi. Supay mana yatapämanchinachu. 19Tayta Diosninchipa wawan car, maquinçhu cawashanchita musyanchi. Juchaçhu arujcunam ichanga supaypa maquinçhüraj puriycan. 20Tayta Diosninchipa Wawan Jesús cay pachaman shamushanta musyanchi. Paymi Tayta Diosninchi imanuy cashantapis tantiyachimashcanchi. Paypa maquinçhu cawaycar, Wawan Jesucristupa maquinçhüpis cawaycanchi. Payga Tayta Diosninchi. Imaycamanpis maquinçhu cawachimanchi. 21Wawacuna, jircacunata ama manchapacunquimanchu. Chayllana.

will be added

X\