1 San Juan 3

1Sumaj tantiyacushun. Tayta Diosninchi sumaj-sumaj llaquipämanchi. Wamrachacamashcanchi: Wawämi canqui nir. Waquin runam ichanga Tayta Diosninchipa maquinçhu cawayta mana munashpan paypa wawan cashanchitapis mana tantiyanchu. 2Irmänucuna, Tayta Diosninchipa wawan captinchisi, Jesúswan tincunanchi pishïmanchiraj. Pay cutimuptinmi ichanga, ñawinchiwanraj ricashunpaj. Quiquinwan tincur, quiquin-niraj ricacushunpaj. 3Jesúswan tincuyta yupachicur, pay cawashan-jina Tayta Diosninchipa shungun munashallanta rurashuwan. Jesúsga Tayta Diosninchipa shungun munashannuylla cawan. 4Juchallaçhu arujcunam ichanga Tayta Diosninchita tincupan. Paycuna Tayta Diosninchipa shiminta wasguipar juchata aparicun. 5Jesús juchaynaj car, llapan runapa juchanta aparicunanpaj shamusha. 6Chaymi Jesúspa maquinçhu cawar, juchacullar mana cawanchinachu. Juchaçhu arujcunam ichanga Jesús pï cashantapis mana tantiyacunchu. Maquinçhüpis mana cawanchu. 7Wawacuna, pipis pantachirushunquiman. Tayta Diosninchipa shungun munashannuy cawajcuna Jesústa ricacun. Payga allillata ruran. 8Juchata aparicullar cawajcunam ichanga supaypa maquinçhu cawan. Supayga cay pachata camashanpita-pacha juchallaçhu arun. Chaymi Tayta Diosninchipa Wawan Jesús shamusha supay camacächishanta illarachinanpaj. 9Tayta Diosninchipa maquinçhu cawajcuna wawan cashpan juchaçhu mana cawannachu. Manchäga wawan cashpan Tayta Diosninchipa shungun munashallanta rurar cawan. 10Ricsipaylla Tayta Diosninchipa wawancunapis, supaypa wawancunapis. Supaypa wawancuna mana Tayta Diosninchipa shungun munashantachu ruran. Irmänucunatapis mana llaquipanchu. 11Unaypita-pacha jucninchi-jucninchipis llaquipänacärinanchipaj Tayta Diosninchi willapämashcanchi. 12Caínpa llupinpa ama jatishunchu. Payga supaypa maquinçhu cawar, wauguin Abelta wañuycachiran. Imapita wañuchishantapis musyanqui, ¿au? Wauguin Abel Tayta Diosninchipa shungun munashanta ruraran. Caínmi ichanga juchallaçhu aruran. Chaypita wauguinta chiquir, wañurachisha. 13Irmänucuna, juchaçhu aruj runacuna chiquishuptiquisi, ama upatacäcunquichu. 14Irmänu-pura llaquipänacushanchi Tayta Diosninchipa maquinçhu cawaycashanchita musyacächin. Irmänuta chiquipajcunam ichanga supaypa maquinçhu cawashanpita wañuyman çhayanga. 15Chiquicuptinchi, wañuchicujta-jina Tayta Diosninchi ricaycämanchi. Ñaupançhüpis mana imaypis cawashunpächu. 16Llaquipäcuyta yaçhacunanchipaj nuwanchi-raycur wañuyman Jesús çhayasha. Chaymi nuwanchipis irmänunchicuna-raycur wañuytapis ama manchacushunchu. 17Waquin irmänu pishipacuyçhu cawaycaptin, micuy janançhu cawaycar mana imatapis tarichir, llaquipäcuyta mana yaçhanchichu. Tayta Diosninchi llaquipäcuj cashantapis mana tantiyacunchirächu. 18Wawacuna, janan shungulla ama llaquipänacärishunchu. Manchäga llapan shungunchiwan llaquipänacur yanapänacushun. 19Llaquipänacuptinchiraj, Tayta Diosninchipa wawan cashpanchi shungun munashannuypis cawaycanchi. Chayrämi shungunchipis Tayta Diosninchipa shungunman tincun. 20Juchallicushanchipita shungunchi llaquish caycaptinsi, alli ñawinwan Tayta Diosninchi ricamanchi. Alli shungu car, shungunchitapis musyan. 21Wawacuna, Tayta Diosninchi: Juchaynaj caycanqui nimaptinchi, shungunchipis mana nimäshungachu: Juchaçhu aruycanqui nir. Manchäga: Tayta Diosninchipa maquinçhu cawä nir mana manchacullarna payman yupachicunchi. 22Shiminta wiyacuptinchipis, shungun munashallanta rurar cawaptinchipis, llapan mañacushanchita tarichimäshun. 23Shiminta çharcunanchipaj Wawan Jesucristupa shimintaraj çhasquicunanchi. Irmänunchicunawanpis llaquipänacärinanchi. Chayta Tayta Diosninchipa shimin nin. 24Shiminta wiyacur, Tayta Diosninchipa maquinçhu juc shungulla cawaycanchi. Payga mana imaypis caçharimäshunchu. Maquinçhu cawashanchita tantiyacunanchipäpis Espíritu Santuta caçhamusha yanagämänanchipaj.

will be added

X\