1 Corintios 9

1Irmänucuna, sumaj tantiyacunquiman. Mana pipis maquichacamanchu. Tayta Diosninchim acracamasha caçhan canäpaj. Taytanchi Jesúspis ricaripamasha. Paypa shiminta willapäcuptï, çhasquicärishcanqui. 2Waquin runacuna pampaman çhuramaptinsi, jamcunapaj Tayta Diosninchipa caçhan caycä. Chaymi willapashajta çhasquicur, Taytanchi Jesúspa maquinçhu cawarcaycanqui. 3Pampaman çhuramajcunapis sumaj tantiyacunman. 4Nuwacunapis micush-upush purinä camacan. 5Tayta Diosninchiman yupachicuj warmiwan majachacänäpis camacan. Kefas nishan Pedrupis, waquin Taytanchi Jesúspa caçhancunapis, paypa wauguincunapis warmintin purircaycan. 6Ichanga Bernabítawan nuwata micush-upush purinäta miçharcaycämanqui. Nuwacunalla arunäta munarcaycanqui. 7Llapanchi musyanchi murucucunapis micush-upush purishanta, çhacra arujpis çhacrapa wawanpita cawashanta, uywa michijcunapis uywanpita cawashanta. 8Rimashäga mana runapa yarpayllanchu. Manchäga Moiséspa shiminta rimä. 9Shiminçhu isquirbiraycan: Türuta yargaycajta ama aruchinquichu nir. Chaynuy niycaptin, ¿türucunallatachuraj Tayta Diosninchi llaquipaycan? 10Mana. Nuwacunapaj isquirbichiran. Chay-jina çhacra arujcunapis, pallapacujcunapis arushanpita cawan. 11Nuwacuna murupacuj-yupay Tayta Diosninchipa alli willapanta willapashcaj. Chaymi çhacra arujcunata-jina imatapis tarichimänayqui camacan. 12Waquin caçhacunata tariycachir, nuwacunatapis tarichimanquiman. Taytayqui-yupaymi caycä. Ichanga canancamanpis ñacayçhu cawarsi, mana imatapis mañacushcajchu. Paçhan-raycullar Washäcuj Jesúspa alli willapanta willapäcun nir pipis jamurpämänanpita mana imatasi ashishcächu. 13Tayta Diosninchipa wasinçhu aruj cüracunapis arushanpita cawan. Uywata rupachij cüracunapis Tayta Diosninchita jarashanpita waquinta micun. 14Tayta Jesúspis tantiyachicusha: Alli willapäta willapäcujcuna micush-upush purinan camacan nir. 15Chaypis mana imatapis mañacushcajchu. Cartacamursi, mana imatapis ashïchu. Paçhalläta ashinäpita jina wañucümanpis. Imata nimaptinpis, shimïta mana cutiricushächu. 16Mana alli ricash caytachu ashiycä. Manchäga imanuypapis Jesúspa alli willapanta willapäcüman. Jamacuyta munarpis, mana camäpacümanchu. Alli willapanta mana willapäcuptï, ñacaymançhi jaycamangapaj. 17Chaymi quiquilläpita mana willapäcuptï, imata ashinäpis mana camacanchu. Tayta Diosninchi caçhamaptin, shiminta çharcuycä. 18Tayta Jesúspa alli willapanta willapäcushalläwan cushish cawä. Mana imatapis shuyänachu. Chaymi caçhan carsi, imatapis mana mañacüchu. 19Runacunapis mana maquichacamanchu. Chaypis Jesúspita willapänä-raycur llapan runapa maquinçhu-yupay cawaycä. Jesúspa shiminta çhasquicärinanta munaycä. 20Chaymi Israel runacunata willapänä-raycur Israel runacuna-jina cawashcä. Paycuna-jina Moiséspa shimintapis çharcushcä. Ichanga mana Moiséspa shiminta çharcushanchipitachu Tayta Diosninchi alli ñawinwan ricamanchi. 21Chaynuypis jäpa runacunata willapänä-raycur, jäpa runacuna-jina cawashcä. Washäcuj Jesúspa shiminta çhasquicush carsi, Tayta Diosninchipa shimintapis çharcuycä. 22Mushuj irmänucunata willapänä-raycur paycuna-jina cawashcä. Pï-maypis Tayta Diosninchipa shiminta llapan shungunwan çhasquicunanta munar, imatapis rurashcä. Llapanwan-yupay paycuna-jina cawashcä. 23Nuwata jishpichimänanpäpis Jesúspa alli willapanta pï-maytapis willapashcä. Imatapis llapan shungüwan rurashcä. 24- 25 Musyashanchinuypis llallinacujcuna llapan shungunwan llallinacun. Llallinacunanpaj waran-waran yaçhacun shungun mana ushyacänanpaj. Pipis puntata çhayaptin, alli ñawinwan ricar: Llallishcanqui nir umanman jaçhapita pilltash curünallata jatipan. Ichanga chaquicäcushpan ushyacan. Llallijcuna yaçhacushan-jina Tayta Diosninchipa shungun munashannuy cawashun. Chaynuy cawaptinchi, Tayta Diosninchi alli ricamäshun. Mana ushyacaj cawaytapis tarichimäshun. 26-27 Chaymi ushyacajcunata mana yarpächu. Manchäga waran-waran Tayta Diosninchipa shungun munashannuy cawä. Ñacayçhu juyarpis, mana llaquicüchu. Maquinpita mana witicüchu. Witicuptï Tayta Diosninchi mana shuntamaptin, willapäcur purishäpis manacajllapäçhi canga.

will be added

X\