1 Corintios 7

1Jamcuna cartacamashcanqui: ¿Allichuraj pipis mana majachacaptin? nir. Chaymi cartacamashayquipita willapäshayqui. Pipis mana majachacaptin, alli canman. 2Ichanga pï-maywanpis mana cacunanpaj warmi ullgupis majachacanman. 3Majachacar, warmi ullgupis mishquilla juyanman. Ujllanacunman. Ama jishpipänacunmanchu. 4Ama miçhänacunmanchu. Warmiga runanpa maquinçhu juyan. Runapis warminpa maquinçhu juyan. 5Chaymi majayujcuna ama miçhänacunmanchu. Jamaycur Tayta Diosninchita mañacuyta munarmi ichanga, majanwan parlanacurir yata juyapärinman. Jinarcur yapay majanwan mishquilla puñunman. Ujllanacunman. Manchäga Supay jucta ricachinga. 6Majanwan yata-yata juyapärinanpaj mana Tayta Diosninchipa shiminpitachu rimä, manchäga quiquilläpita. 7Ima alliraj canman llapaniquipis nuwaman llucshiptiqui. Japallä cushish cawanäpaj Tayta Diosninchi yanapäman. Llaquipämashpanchi llapaninchita yanapämanchi imanuypis cawananchipaj. 8Japallacuna, biyüdacuna, nuwa-jina japalla juyäcunman. 9Majanayta mana içhipurmi ichanga, majachacaptin alli canman. Majachacar, majanaypita mana wañunganachu. 10Majayujcunatam ichanga Tayta Jesúspa shiminpita willapäshaj; mana quiquilläpitanachu. Warmiga majanta ama jaguirinmanchu. 11Warmi ullgupis majanta jaguirir, jucwan ama majachacanmanchu. Majanar jaguirishan majallanwan shuntanacurcur, yapay juyäcunman. 12Cananga Tayta Jesúspa shiminçhu mana rimacuptinsi, shungü yarpashanta willapärishayqui. Warmiqui Tayta Jesúsman mana yupachicur jaguiriyta mana munashuptiqui, ama jaguirinquimanchu. 13Chaynuypis runayqui Tayta Jesúsman mana yupachicur jaguiriyta mana munashuptiqui, ama jaguirinquimanchu. 14Majayuj captiqui jucniqui Tayta Jesústa mana wiyacuptiquisi, ishcaniquita alli ñawinwan ricashunqui. Wamrayquicunatapis acracusha. Mana caçharingapächu. Llapanchita Tayta Diosninchi wamrachacamanchi. 15Tayta Jesústa wiyacushayqui-janan majayqui aywacuyta munaptin-imarga, ama miçhanquimanchu. Tayta Jesústa mana wiyacur, aywacunan camacan. Allilla cawananchita Tayta Diosninchi munan. 16Chaypis juclla ama raquicanquichu. Mana raquicar, majayquitapis Tayta Diosninchipa ñaupanmançhi çhayachinquipaj. 17Tayta Diosninchi runa piwan majachacänanpäpis, japallan cacunanpäpis camacächin. Chaymi Tayta Diosninchipa shiminta çhasquicur, ama yarpaçhacunmanchu: ¿Piwanraj juyäshaj? ¿Mayçhüraj juyäshaj? ¿Imawanraj cawashaj? nir. Cayta may-chayçhüpis jutucaj irmänucunata willapä. 18Jïrucush caycar Jesúspa shiminta çhasquicush caycar, ama chäpacunquichu. Jïrucüni caycar Jesúspa shiminta çhasquicush carpis, ama jïrucunquichu. 19Jïrucush carsi, jïrucüni carsi, Tayta Diosninchipaj mana imananchu. Payga shiminta wiyacunanchita munan. 20Chaymi Tayta Jesúspa shiminta çhasquicushan junaj cawashannuylla pipis cawanman. 21Chaynuypis patrunpa maquinçhu caycar Jesúspa shiminta çhasquicush car, chayllaçhu juyanman. Patrun caçhariyta munaptinmi ichanga, jina llucshicunman. 22Patrunpa maquinçhu caycaptiqui Tayta Diosninchi acracushcashuptiquipis, Jesúspa mandunta ruranayquita pipis mana chapäshunquipächu. Patrunniynajta Tayta Diosninchi acracushcashuptiqui, Washäcuj Jesúspa mandunta ruranayqui. 23Llapan runapis Tayta Diosninchipa maquinçhu cawan. Jesús wañuyninpa rantishcashunqui. Chaymi runa-masiquita wichaypa-uraypa ama purichinquichu. 24Irmänucuna, pï captiquipis, imanuy juyaptiquipis, Tayta Diosninchi wamrachacushcashunqui. Chaymi ricay ñawinçhu alli cawanayquipaj waquin runa wichaypa-uraypa yarpashanta ama ruranquinachu. 25Japallacunata willapänäpaj Tayta Jesús mana rimacush captinsi, quiquï yarpashäta tantiyachishayqui. Nuwata llaquipämar, willacujnin canäpaj çhuramasha. Canan nuwamanpis yupachicamanquiman. 26- 27 Nuwapita alli canman japalla-cajcuna mana majachacaptin, majayujcunapis mana raquicaptin. Ñacayçhu juyaycanchi. Chaymi japallacunapis, majayujcunapis cacushannuylla cacunman. 28Chaypis maja ashiy mana juchachu. Majayujcunam ichanga ñacay captin, llaquipaypaj cawanga. Mayganiquipis ñacayman çhayanayquita mana munächu. 29Irmänucuna, yupash watalla juyaj aywanchi. Chaymi majayuj carpis, japalla carpis, 30wañupacurpis, cushish cawarpis, ima-aycayuj carpis Tayta Diosninchipa shungun munashallanta ruranquiman. 31Alli cawayllata ama ashishunchu. Manchäga cawashanchicaman Tayta Diosninchipa shungun munashallanta rurashun. Cay pacha ushyacangapänam. 32Nuwallapita warmi ullgupis japalla juyaptin, alli canman. Japalla runa llapan shungunwan imatapis ruran Tayta Diosninchipa ricay ñawinçhu alli llucshinanpaj. 33Majayuj runam ichanga sumaj yarpaçhacun majanpa ricay ñawinçhu alli llucshinanpaj. Shungunçhu ishcayta yarpan. Tayta Diosninchipa ricay ñawinçhüpis, majanpa ricay ñawinçhüpis alli llucshiyta munan. 34Japalla warmipis sumaj yarpaçhacun Tayta Diosninchipa ricay ñawinçhu alli llucshinallanpaj, juchaynajlla cawananpaj. Majayuj warmicunam ichanga yarpaçhacun wamrancunata ricanallanpaj, runanta alli ricanallanpaj. 35Llapantapis rimä mana majachacänayquita miçharchu; manchäga Tayta Diosninchipa shungun munashanta rurar alli cawanayquita munar. 36Chaymi pipis parlay-masinwan ashinacunan junaj çhayamuptin shungun munaptin, ashinman. Maja ashiy mana juchachu. 37Pipis parlay-masinwan ashinacunan junaj çhayamuptin shungun mana munaptin, ama ashinmanchu. 38Mana ashirga, allita ruraycan. Ashiptinpis, alli caycan. 39Warmicuna majan cawashancaman runanpa maquinçhu cawan; runan wañucuptinmi ichanga manana. Yapapacuyta munar, yapapacunman Tayta Diosninchipa maquinçhu cawaj runallawan. 40Chaypis nuwapita alli canman mana yapapacuptin. Cushish cawanga. Chayta yarpä Espíritu Santu yarpächimaptin.

will be added

X\