1 Corintios 6

1Canan juctana rimashun. Quiquiqui-pura jagayächinacur, ¿imanirtaj jatunman çhayachinacunqui? ¿Imanirtaj auturdäcunaçhüraj dimandanacunqui? Jutucaj irmänucunapa ricay ñawillançhu ushyacächinquiman. 2Washäcuj Jesús cutimur, nuwanchita çhuramäshun auturdä cananchipaj. Llapan runata maquinchiçhu purichishunpaj. Chaynuy caycaptin, ¿imanirtaj ninshi-ninshillata quiquiqui-pura mana ushyacächinquichu? 3Jesústa mandäshir, anjilcunatapis maquinchiçhu purichishunpaj. Chaymi cay pachaçhu cawashanchicaman imatapis quiquinchi-puralla ushyacächishuwan. 4Cay pachaçhu llapanchi imallapitapis nanächinacunchi. Chaypis ichicllapita marcapa auturdänincunaman ama çhayachinacushunchu. Paycuna Tayta Diosninchiman mana yupachicur, shungun yarpashantapis mana musyanchu. Chaymi auturdäcunaçhüraj imatapis ushyacächinanchi mana camacanchu. 5Llapantapis piñapaj pingacunayquipaj. Irmänucuna, ¿llapaniqui pishi-yarpayyujchu canqui? ¿Mayganiquipis manachu tantiyachinacuyta junqui? 6Jamcuna irmänu-purapis jagayächinacuyllaçhu arurcaycanqui. Jananmanpis auturdäcunaçhüraj dimandanacurcaycanqui. Paycuna Tayta Diosninchitasi mana manchapacunchu. 7Quiquiqui-pura nanächinacurga, pingayllaman çhayashcanqui. Tayta Diosninchipa ricay ñawinçhu alli cawayta munar, ima captinpis ama ticshacäcunquimanchu. Suwapäshuptiquipis, caçhaparinquiman. 8Chaypis waquinniqui llutanta rurarcaycanqui. Irmänuyquicunapa imantapis suwapaycanqui. 9- 10Tayta Diosninchi juchaçhu arujcunata ñaupanman mana çhayachingachu. Chaymi sumaj tantiyacunquiman. Pï-maywanpis cacujcunata, jircacunaman manchapacujcunata, majanta jananpachijcunata, warmi-pura ullgu-pura cacujcunata, mallajcunata, upyallaçhu arujcunata, ashllicujcunata, suwacujcunata janaj pachaçhu Tayta Diosninchi mana cawachingachu. 11Waquinniqui chay-niraj juchaçhu unay arushcanqui. Ichanga Espíritu Santu shacyächishuptiqui, Taytanchi Jesucristupa shiminta çhasquicushcanqui. Chaymi Tayta Diosninchi llapan juchayquita jungasha. Mana yarparannachu. Shungun munashallançhu cawanayquipaj acracushcashunqui. Alli ñawinwan ricaycäshunqui. 12Waquin irmänucuna nin: Shungü munashanta ruracüman. Chaypis mana llapan rurashanchichu Tayta Diosninchipa shungunman tincun. Nuwapis shungü munashanta ruracüman. Ichanga shungü munashallanta ama ruracümanchu. 13Waquin irmänucuna warminar, runanar, nin: Micuy paçhallanchiman çhayan. Paçhanchipis micuyllata shuyan. Ushyacajlla canchi. Chaypis Tayta Diosninchi runata mana camashachu warmi-paçha cananpaj, runa-paçha cananpaj. Manchäga camacächimashcanchi shungun munashannuylla cawananchipaj. 14Tayta Diosninchi munayniyuj cashpan Tayta Jesústa cawarachishan-jina nuwanchitapis cawarachimäshunpaj. 15Nuwanchiga Washäcuj Jesúswan chay shungulla cawanchi. Paywan juc shungulla cawaycar, ¿runan-runan puricuj warmiwanpis cacushuwanchuraj juc shungulla cawananchipaj? Chayga mana camacanchu. 16Pipis runan-runan puricuj warmiwan cacur, juc shungulla ricacun. Tayta Diosninchipa shiminpis nin: Ishcan chay shungulla canga. 17Warmiwan runa yatanacur, juc shungulla cawan. Washäcuj Jesúswanmi ichanga juc shungulla cawanchi shiminta çhasquicushallanchipita. 18Chaymi runan-runan puricuj warmipita witicuy. Waquin jucha runapa shungunman mana çhayanchu. Runan-runan puricuj warmita yataparmi ichanga, jucha aparicushan shungunman çhayan. 19Sumaj tantiyacushun. Runa wasinçhu juyashan-jina Tayta Diosninchipis camacächisha Espíritu Santu nuwanchiçhu juyänanpaj. Payga maquinçhu purichimanchi. Chaymi quiquinchipitanachu mana cawanchi. 20Rantishta-yupay Tayta Diosninchi ricamanchi. Maquinçhu purichimänanchipaj Jesús wañuyninparaj rantimashcanchi. Chaymi ima-imatapis rurar, Tayta Diosninchipa shungunman tincushallanta rurashuwan.

will be added

X\