1 Corintios 3

1- 4 Irmänucuna, apaycaçhänacuyllaçhu, chiquinacuyllaçhu arushayqui rinrïman çhayamusha. Sumaj mana tantiyacur, shunguyqui yarpashallançhu cawarcaycanqui. Sapu wamra-yupay apaycaçhänacurcaycanqui: Nuwa Pablupa maquinçhu cawä nir. Waquinniqui nircaycanqui: Nuwa Apolupa maquinçhu cawä. Chaypita alli shimilläpa willapashcaj Washäcuj Jesúspita sumaj tantiyacunayquipaj. Sumaj tantiyacushun. Wamra itilla cashancaman lïchillata chuchun. Chucru micuyta mana micunrächu. Chaymi jamcunatapis pishi wamrata-yupay alli shimilläpa tantiyachishcaj. Chaura, ¿imanirtaj jucta taytachacunqui? ¿Shunguyqui munashallantachu imatapis munarcaycanqui? 5Apolutapis, nuwatapis ama taytachacamanquimanchu. Nuwacunata Tayta Diosninchi mincacamasha Jesúspita willapäcunäpaj. Jucnï-jucnïpis Tayta Diosninchi nimashallanta rurashcä Jesúsman yupachicunayquipaj. 6Mincacamaptin, muruta machij-yupay willapäcur purishcä. Apoluna parguj-yupay llapanta ricar purisha. Tayta Diosninchim ichanga muruta wiñachij-yupay cawachimanchi. 7Chaymi willacujtapis, ricajtapis ama taytachacushuwanchu. Manchäga cawachicuj Tayta Diosninchita taytachacushuwan. 8Mincaycunapis muruj-yupay, parguj-yupay ima-imata rurarsi, jucpa maquinçhu cawan. Tayta Diosninchim ichanga pitapis arushanman-tupu alliman çhuranga. 9Apolupis mincay-masillä. Ishcanï Tayta Diosninchipa maquinçhu cawarcaycä. Jamcunanana Tayta Diosninchi murupacushan-yupay, Tayta Diosninchi tiyanan wasi-yupay carcaycanqui. 10- 11 Tayta Diosninchi llaquipämashpan mincacamasha tiyanan wasita jatarachinäpaj. Chaymi simintu rumita jamachij-yupay Washäcuj Jesúspita willapäcuyta jallarishcä. Jucna wasita pirgaj-yupay Tayta Diosninchipa shiminta sumaj tantiyachicun. Tantiyachicujpis, willacujpis mana shungunchi munashallantachu ruranchi. Manchäga Jesúsllaman yupachicushpanchi payllapita tantiyachicunanchi. Payga simintu jallarij rumi-yupaymi. 12- 13 Chaymi simintu aywashallanpa wasita jatarachij-yupay Jesúspa llupillanpa pipis aywanman. Jesúspa llupinpa aywä nir Tayta Diosninchipa shungun munashannuylla cawar, shiminta tantiyachicärinman. Tantiyachicushanman-tupu llapan ricay Tayta Diosninchi jurgapanga. Wasita nina ushyashan-jina ushyacay junaj imanuy cawashanpis, imata tantiyachicushanpis ricsicanga. Pay munashannuylla cawar tantiyachicushanpis juri-jina, jillay-jina, cuyayllapaj rumi-jina mana ushyacangachu. Janan shungulla cawar tantiyachicushanmi ichanga jiru-jina, shugush-jina, ucsha-jina ushyacanga. 14Shungun munashannuylla cawar tantiyachicushan mana ushyacaptin, llapan wiyacushanpita Tayta Diosninchi alli cawayta tarichinga. 15Ushyacaptinmi ichanga, ushyapacayman çhayachinga. Imatapis mana çhasquingapächu. Imata mana çhasquirsi, Tayta Diosninchipa ñaupanman çhayanga ninapita jishpij-yupay. 16Sumaj tantiyacushun. Tayta Diosninchipa wasin-yupay carcaycanchi. Paypa wawan cashpanchi Espíritu Santuwan maquinçhu purichimanchi. 17Chaymi wawancunata pipis llutanta tantiyachiptin, ushyacayman Tayta Diosninchi çhayachinga. Payga wawancunata sumaj rican quiquillanpaj captin. Nuwanchi paypa wawan caycanchi. 18Chaymi sumaj tantiyacushun. May-jina yaçhaj carpis, ama yaçhaj-tucushunchu. Manchäga Tayta Diosninchipa shungun yarpashanta tantiyacushun. Chayraj yarpay-sapa cashunpaj. 19Shungun yarpashanta mana musyaptin, Tayta Diosninchi pitapis pampaman çhuran. Chaymi shiminçhüpis nin: Yaçhaj-tucujcunapa upa cayninta quiquincunapa shimillanpita Tayta Diosninchi jurgapan. 20Jananmanpis nin: Yaçhaj-tucujcunapa upa yarpayninta Tayta Diosninchi musyan. 21- 22 Chaymi maygan tantiyachicujtapis ama taytachacunquimanchu. Jamcuna-raycur Apolutapis, Kefastapis, nuwatapis Tayta Diosninchi çhuramasha. Canan wichanpis, shamuj watacunapis, cay pachaçhu cawaypis, wañuypis mana manchachishunquipächu. Llap-llapanta allipaj maquiquiman çhurasha. 23Llapanchi Washäcuj Jesúspa maquinçhu cawarcaycanchi. Washäcuj Jesúsna Tayta Diosninchipa maquinçhu cawaycan.

will be added

X\