1 Corintios 15

1Irmänucuna, Tayta Jesúspa shiminta ama junganquimanchu. Ñaupata Jesúspita willapaptij, çhasquicärishcanqui. Maquillançhu cawarcaycanqui. Cananga ama witicunquichu. 2Chayraj Tayta Diosninchipa maquinçhu imaycamanpis cawanquipaj. Witicuptiquim ichanga Jesúspa shiminta çhasquicushayquipis yangallapaj canga. 3Nuwapis alli willapata wiyashätam willapashcaj. Tayta Diosninchipa shimin rimashannuylla juchanchi jungacänanpaj Washäcuj Jesús wañuyman çhayasha. 4Ayantapis pampaycusha. Wañushanpita quimsa junajta shimin rimashannuylla Tayta Diosninchi cawarachimusha. 5Cawarircur, Pedrutapis, çhunca ishcaywan (12) purïshijnincunatapis ricaripusha. 6Chaypita pichga paçhac-ima (500) irmänunchicunata ricaripusha. Waquin irmänunchicuna cawarcaycanraj. Waquinmi ichanga wañucusha. 7Chaypita Santiaguta ricariparcur, llapan caçhancunatana ricaripusha. 8Chaypitaraj ricaripamasha. Chaymi nï: Jesúspa caçhan carpis, ushyapillanna caycä. 9Chaymi: Jesúspa caçhan caycä niytapis pingacü. Waquin caçhancunamanpis mana tincüchu. Jananmanpis jutucaj irmänucunata chiquir jaticaçhashcä. 10Chaypis Tayta Diosninchi llaquipämashpan camacächisha shiminta willapäcur purinäpaj. Sumaj yanapämasha. Waquin caçhancuna mana aypämashachu. Ichanga mana quiquilläpitachu rurashcä. Llaquipämashpan Tayta Diosninchi llapanta camacächisha. 11Llapanïmi Tayta Diosninchipa shimillanta willapäcushcä. Chay alli willapata jamcunapis çhasquicärishcanqui. 12Nuwacuna willapäcärishcä: Washäcuj cawarisha nir. Chaypis waquinniqui mana auninquichu: Wañushcuna mana cawaringachu nir. 13Chaymi tapushayqui: Wañushcuna mana cawaringachu niptinchi, ¿Washäcuj Jesúspis chaura manaçhi cawarishachu? 14Washäcuj Jesús mana cawarish caycaptin, manacajllapäçhi willapäcurpis puriycä. Jamcunapis yangallapäçhi shimïta çhasquicur, Jesúsman yupachicuycanqui. 15Washäcuj Jesús rasunpa mana cawarish caycaptin, llullacurçhi puriycä. Washäcuj Jesústa cawarachimusha niptïsi Tayta Diosninchi wañushcunata mana cawarachiptin, quiquin Tayta Diosninchitaçhi tumpaycä. 16Wañushcunata mana cawarachimungachu niptinchi, Washäcuj Jesústapis manaçhi cawarachimushachu. 17Washäcuj Jesústa mana cawarachimush caycaptin, manacajllapäçhi Tayta Diosninchimanpis yupachicuycanchi. Jucha aruyllaçhüräçhi cawaycanchi. 18Washäcuj Jesústa mana cawarachimush caycaptin, wañush irmänunchicunapis ushyacäcushanaçhi. 19Nuwanchipis llaquicuypäçhi cawashunpaj Washäcuj Jesús cay pachallaçhu ushyacash caycaptin. 20Runacuna tucuyta yarpaptinpis, Tayta Diosninchi rasunpa Washäcuj Jesústa cawarachimusha. Payga llapan wañushcunata ñaupapar, puntata cawarimusha. Cawarachimush carmi, wañushcunata cawarachimunantapis musyachimanchi. 21Adán-janan llapan runapis wañuyman çhayan. Cananga Washäcuj Jesúspita llapan runapis cawaringa. 22Adánpa llupinpa aywar, llapan runa wañuyta tarin. Washäcuj Jesústa çhasquicurmi ichanga, imaycamanpis cawayta tarishunpaj. 23Llapanta Tayta Diosninchi camacächisha. Washäcuj Jesús cawariyta ñaupapämashcanchi. Pay cutimuptinraj, shiminta çhasquicujcunapis cawarishunpaj. 24Chaypita cay pacha ushyacanga. Washäcuj Jesús llapan munayniyujcunatapis, mandajcunatapis, auturdäcunatapis illarachinga. Nircur maquinçhu llapan purichishancunata Tayta Diosninchipa maquinman çhuranga. 25Washäcuj Jesús llapallanta maquinçhu purichinga cunçharyuncunata içhipur ushyacächishancaman. 26Chaypita wañuytapis illarachinga. 27Chaura shiminçhu isquirbiraycächishannuylla llap-llapallanta maquinçhu purichinanpaj Tayta Diosninchi camacächisha. Quiquin Tayta Diosninchim ichanga Washäcuj Jesúspa maquinçhu mana purinchu. Manchäga Tayta Diosninchipita llapanpis cawan. 28Chaura maquinman llapanta çhurashanpita Wawan Jesúspis Tayta Diosninchipa maquinman llapanta çhurangapaj. Chaypita llap-llapantapis maquillançhüna Tayta Diosninchi purichinga 29Mä, yapay tapushayqui: ¿Imapäraj wañushcunapa juchan-janan ushyacärinqui? Wañushcunata cawarachimunan mana caycaptin, yangallapäçhi ushyacärinquipis. 30Nuwacunapis wañuy-caway willapäcur, yangallapäçhi purï. 31Irmänucuna, achca cuti wañuypita jishpishcä. Ichanga willapäcuptï Taytanchi Jesucristupa shiminta çhasquicuptiqui, jatunpa cushicü. 32Willapäcur puriptï, Éfeso marcaçhüpis tucuy-jinanpa wañuchimayta munasha. Micucuj uywacuna-yupay ushyamayta munasha. Wañucur mana cawarinanchi caycaptin, ¿imapäraj willapäcüpis? Waquin runacuna-jinaçhi nïman: Micur, upur puricushun. Warasi-chicasi ushyacäcushunganaçhi. 33Irmänucuna, pantachicujcunapa shiminta ama çhasquipanquimanchu. Rimaypis purin: Juchaçhu arujcunanash juchaman çhayachimanchi nir. 34Sumaj tantiyacunquiman. Juchata ama aparicunquimanchu. Waquinniqui Tayta Diosninchipa shungunta mana musyar, yarpashantapis mana musyanquichu. Chaymi wanacunayquita munar, piñapashpä pingaymansi çhayachishayqui. Llapaniquita piñapaj pingayman çhayaptiqui, wanacunayquita munar. 35Sumaj tantiyachiyta munaptïsi, waquinniqui yarpaçhacurcaycanqui: ¿Imanayparaj wañushcunata cawarachimunga? Cawarachimush caycaptin, ¿ima-nirajraj janan canga? nir. 36Upa canqui-llapa. Llutanta yarparcaycanqui. Murutapis pampanchiraj wiñamunanpaj. 37Mana rïgupa tulluntachu allpaman jatinchi. Manchäga murullanta murunchi. 38Chaypita murunman-tupu Tayta Diosninchi wiñachimun. Llapan muruta murunman-tupu wiñamunanpaj camacächin. 39Cay pachaçhu juc-niraj juc-niraj cawanchi. Runawan uywa mana tincunchu. Pichuysacunawan piscädupis mana tincunchu. 40Cay pachaçhu cawaywan janaj pachaçhu cawaypis mana tincunchu. Cay pachaçhüga Tayta Diosninchi camacächishannuylla llap-llapan cawan. Janaj pachaçhu cawajcunatapis juc-niraj-juc-nirajta camasha. 41Musyanchi intipa, quillapa achicyayninpis juc-niraj-juc-niraj cashanta. Istrïllacunapis juc-niraj-juc-niraj achicyämun. 42Chaymi Tayta Diosninchi cawarachiptin, cawarijcunapis juc-niraj-juc-niraj cawarimunga. Cawajcuna imayllapis wañur, pampacunga. Cawarimujcunam ichanga imaycamanpis cawacunga. 43Cawajcuna wañucur, millanaypaj. Cawarimujcunam ichanga cuyayllapaj. Cawajcuna wañunächi. Cawarimujcunam ichanga mañaypa-mañaycar cawacunga. 44Wañuptinchi, ayallanchita pampan. Tayta Diosninchi cawarachimaptinchim ichanga, juc-nirajna ricacushunpaj. Chaymi cay pachaçhu cawashanchi-jina janaj pachaçhüpis cawashunpaj. 45Tayta Diosninchipa shiminçhu nin: Cay pachaçhu runa ricarinanpaj Adánta puntata Tayta Diosninchi rurasha. Adánmi cawayta çhasquisha. Jipa-caj Adán nishan Jesúsmi ichanga cawachicuj. Paymi wañushcunata cawarachin. 46Chaypis cawarinanchipaj wañunanchiraj. 47Ñaupa-caj Adánta allpapita ruraran. Ushyacajlla caran. Jipa-caj Adán nishan Jesúsmi ichanga janaj pachapita shamusha. 48Allpapita-cajcuna Adán-jina llapanchi wañuyta tarishun. Janaj pachaman shuntacamaptinchi, Jesúsmanna ricchacushunpaj. 49Cananga wañucuj Adánman ricchacunchi. Jesús shuntacamaptinchim ichanga, paymanna ricchacushunpaj. 50Irmänucuna, sumaj tantiyacushun. Jananchiga ushyacajllam. Ayanchipis ismunga. Ushyacaj jananchicunata janaj pachaman Tayta Diosninchi mana shuntangapächu. Wañucujcunaga imaycamanpis mana cawangapächu. 51Chaymi Tayta Diosninchipa shungun imata yarpashantapis tantiyacushun. Mana llapanchichu wañuyta tarishun. Chaypis llapanchita juc ñipchiyllaçhu Tayta Diosninchi juc-niraj cawayman ticrachimäshunpaj. 52Jesús cutimuptin curnïta suynaramuptin, wañushcuna cawaricarcamunga imaypis mana wañunanpäna. Cawaycajcunatapis juc-niraj cawaymanna ticrarachimäshunpaj. 53Ushyacaj cashanchipita mana ushyacajmanna ticrachimäshunpaj. 54Wañucuj cashanchipita mana wañucujman ticrasharaj Tayta Diosninchipa shimin çharcucash canga. Paypa shiminçhu nin: Ima cushicuyraj wañuyta içhipushäpita. Wañuyta illarachishcä. 55Cananga pipis mana llaquicunganachu: ¿Wañuy apacamangachuraj? ¿Ñacachimangachuraj? nir. 56Juchata aparicur, wañuyta manchacunchi. Wañuyman çhayananchi cashantapis tantiyanchi Tayta Diosninchipa shiminta mana wiyacushanchipita. 57Tayta Diosninchim ichanga Washäcuj Jesústa caçhamusha wañuypita washämänanchipaj. Jesúsmi nuwanchi-raycur wañuyman çhayar, wañuyta içhipusha. Ima allish Taytanchi Jesucristuwan Tayta Diosninchi llapanta camacächisha. 58Irmänucuna, llapaniquita llaquipaj. Chaymi Tayta Diosninchiman sumaj yupachicushun. Ama llutäpacunquichu: ¿Imamanraj çhayashaj? nir. Manchäga Taytanchi Jesúspa maquinçhu cawar, shungun munashanta rurar cawashun. Chaynuy cawaptinchi, ima-imata rurashanchitapis Taytanchi Jesús sumaj mirachinga.

will be added

X\