MATEO 1

1Caicunami Jesucristopac ñaupacuna; pai Davidmanta Abraanmantapash mirai carca. 2Abran Isaacpac yaya carca, Isaacca Jacobpac yaya, Jacobca Judapac paipac huauquicunapacpash yaya carca. 3Judaca Faresta Zaratapas Tamarmanta charirca. Faresca Esronpac yaya carca, Esronca Aranpac yaya carca. 4Aranca Aminadadpac yaya, Aminadadca Naansonpac yaya carca, Naasonca Salmonpac yaya carca. 5Salmonca paipac huarmi Rahabmanta Boozta charirca; Boozca Obedta charirca Rutmanta. Obedca Isaipac yaya carca. 6Isaica Apu Davidpac yaya carca; Apu David Uriaspac huarmimanta Salomonta charirca. 7Salomonca Roboanpac yaya carca, Roboanca Abiaspac yaya carca, Josafatca Joranpac yayacarca. 8Azaca Josafatpac yaya carca, Josafatca Joranpac yaya, Joranca Uciaspac yaya carca. 9Uciasca Jotanpac yaya carca, Jotanca Acazpac yaya, Acazca Ecequiaspac yaya carca. 10Ecequiasca Manasespac yaya carca, Manasesca Amonpac yaya, Amonca Josiaspac yaya carca. 11Josiasca Jeconiaspac paipac huauquicunapacpash yaya carca Israel runacuna, japi tucushpa, Babilonia lactaman pushai tucushcapi. 12Chai huasha Jeconias Salatielpac yaya carca, Salatielca Zorobabelpac yaya carca. 13Zorobabelca Abiudpac yaya carca, Abiudca Eliaquinpac yaya, Eliaquinca Azorpac yaya carca. 14Azorca Sadocpac yaya carca, Sadocca Aquinpac yaya, Aquinca Eludpac yaya carca. 15Eliudca Eleazarpac yaya carca, Eleazarca Matanpac yaya, Matanca Jacobpac yaya. 16Jacobca Josepac yaya carca; Joseca Mariapac cari carca: Mariami Jesus "Cristo" nishcapac mama. 17Chashna cacpi, Abraanmanta Davidcama chunca chuscu miraicuna canurca; chashnallata, Davidmanta pacha israelitacuna Babiloniaman pushai tucushcacama chunca chuscu miraicuna canurca; chaimanta Cristo pacarishcacama chunca chuscu miraicuna. 18Jesucristo pacarina cashnami carca: Paipac mama Maria, Josehuan maqui japichishca cashpa, paihuan mana llutarishcapi, santo Samaipac ushaihuan huicsayuc tucurca. 19Paipac cari Jose alli runami carca. Mariapi tucushcata apucunaman mana huillasha nishpa, pacalla paita saquinata yuyarca. 20Chashna yuyacucpi, shuc angel paiman ricurimurca, cashna nishpa: —Jose, Davidpac churi, Mariata canpac huarmi japincapac ama manchaichu: paipac huicsapi tiyac huahua Santo Samaimantami. 21Shuc cari huahuata charinca, paita "Jesus" shutichinqui, runacunata juchacunamanta quishpichinca mari. 22Chai tucui chasna tucurca Dios rimashca pactarincapac, profeta cashna mari quillcashca carca: 23Shuc malta huarmi huicsayuc tucunca, cari huahuata pacarichinca; chai huahuata Emanuel shutichinunca. (Emanuel nishpa "Dios ñucanchihuanmi" nin). 24Jose riccharishpa, angel rimashcata uyashpa, Mariata paipac huarmita japirca. 25llutarishcapica, Maria shuc huahuata aparca; Joseca paita Jesus shutichirca.

will be added

X\