Apocalipsis 5

1Chay trönuchru tayayagpa derëcha maquinchrümi ricapurü röllu ninganta jananpas ruyinpas isquirbishata, cërawan ganchrispaypa shumag shumag wichrgashata. 2Jinamanmi ricapurü juc munayniyog angelta gayachracuypanuy cay nir tapuyämugta: “¿Pitag cayan alisca alinnin, cërashanta paquircur rölluta quichrananpag?” 3Niptinga manam pisi alinnin canagchu, ni jana pachachrüsi, ni cay pachachrüsi, ni wanushacunacagchrüsi, chay rölluta quichrananpag, ni quichrarcur ricanalanpagsi. 4Chaura nogaga wagacü aliscam, chay rölluta quichrananpagsi, ni ricanalanpagsi mana pisi alinnin captin. 5Jinarcurmi chay mandag runacunapita jucga cay niman: “Ama wagaychu. Shumag mayamay, Judäpa castanchru leonnuysi cayag Davidpa castan aywagmi yalisha. Paymi rölluta chay ganchris cëracunawan wichrgashacunata quichranga” niman. 6Chaura rircarirga ricapurü chay trönutam, chay chruscu angelnuysi cayagcunatam, jinaman ishcay chrunca chruscuyog chay mandag runacunatam. Paycunapa chraupinchrümi juc Achrcashtanuysi wanuchipäcunganga shayayänag. Paypagga wagran canag ganchrismi, jinaman ganchristan ñawinsi canag. Chaycunaga canag cay pachaman cachramungan Diospa ganchris Espirituncunam. 7Chaura chay Achrcashnuysi cayagmi aywarcur charirun rölluta chay trönuchru tayayagpa derëcha maquinpita. 8Nä rölluta chariruptinga, angelnuysi chay chruscu cayagcunaga, jinaman chay ishcay chrunca chruscuyog mandagcunaga, chay Achrcashnuysi cayagpa naupamanmi gongorpacayärin. Paycunaga lapanmi charapäcunag arpata, jinamanmi öru cöpachru junta perfümita. Chay perfümiga canag Diosman yupachicugcunapa manacuynincunam. 9Jinamanga cantapäcunag juc mushog cantatam cay nir: “Gamlam canqui chay röllu charigsi, nätan chay cërashacunata quichragsi. Gamga wanuchisham caray, jinaman yawarniquita jichrangaypam chay ima-aygapitas jorgararcayämanqui tucuy casta runacunata, tucuy rimayniyog camata, jinaman maychru chaychru yachragcunatas Diospa runan capäcunanpag. 10Paycunatam gamga yaycarachinqui Diospa munayninchru cawapäcunanpag, chaynuypa sacerdöticunanuysi servipäcushunaypag, jinaman mandapäcungas lapan runacunatam cay pachachru” nir. 11Chaypitam rircärirga, mayarü achca angelcunapa shiminta. Chaycunaga capäcunag, trönuchru tayayagpa, chay chruscu angelcunanuysi cayagpa, chay mandagcuna cayagpa muyurigninchrümi. Chaycunaga carcayänag alisca chranin mana yupaysi atipänam. 12Paycunaga gayachracuypanuymi cay nipäcunag: “Juc Achrcashnuysi wanuchishaga alisca alim. Payga alawasha cachun, munayniyog capogniyog yachrayniyog calpayog canganpita. Payta alisca alinninpag ricashun, alawäshun, jinaman ‘Alisca alim payga’ nishun”. 13Chaypitas mayarütan, Dios chay lapan ima-aygas camangancuna, jana pachachru cagsi, cay pachachru cagsi, pampa ruyichru cagsi, jatun gochrachru cagsi cay nir alawapäcugta: “Trönuchru tayayagwan, Achrcashnuysi cayagga capäcuchun ali nisha, alinninpag ricasha, alawasha, nätan munayniyogpag ricasha imaypita imaycamas” nipäcugta. 14Nipäcuptinga chay chruscu angelnuysi cayagcunaga “Au, chaynuy cachun” nirärinmi. Nätan ishcay chrunca chruscuyog mandagcunaga gongorpacuyurmi umansi pampaman tupangancama lipucuyur alawarärin.

will be added

X\