Hebreos 2

1Chaymi noganchiga nä Jesuspita shumag mayacurayarga imanaypanuysi cäsucuyar cawashun mana pantacashanuy puriyänanchipag. 2Sinaí jircachru angelcunaga cay nipäcuram: “Mana cäsucugcunataga Diosga cunchuchingam”. Nätan nipäcungannuylam Diosga cunchuchira. 3Chaynuymi noganchitas cunchuchimäshun salvacug rimangan chay alisca ali willapata mana cäsucushaga. Chay willapataga Jesús quiquinmi naupataga musyachira, nätan Diospita mayacugcunas chay willapatam nimaranchi. 4Chaura mayacugcunas, jinaman Diossi chay willapa razoncag canganta musyachipäcura Santu Espiritupa munayninwan ima-aygatas ruraypam. Chaynuy rurapäcura Santu Espíritu munangannuylam. 5Chaura Diosga manam angelcunatachu “Mushogman cay pachata muyuchiptï, gammi chaychru mandanqui” nira. 6Antis isquirbishachrüga cay niyanmi: “Tayta Dios, ¿imanirtag gamga runacunata yarparayanqui, jinaman jana pachapita shamusha runata cuidayanqui? 7Nätan gamga chay runata nirayanqui nachrga nachrga angelcunanuy cananpagmi”. Chaypitam niruray: “Alisca munayniyog cananpag, jinaman alisca alipag ricasha cananpag. 8Chaymi lapan ima-aygatas munayninman chruraruray mandananpag” niyanmi. Chauraga manam imalas catushachu, nätan chay mandayangantaga manam shumag ricapunchiragchu. 9Chaura cay niyangäcunataga niyä Jesuspitam. Payga manam alä unaychu angelcunapita mas manacagpag ricasha cara. Manacagpag ricasha cara lapanchita cuyapämarlanchi cunchuyar cruzchru wanurmi. Nätan cananga alisca alinninpag ricasham cayan. 10Chaynuy Jesuswan ruracara ima-aygatas Camag Dios pinsiangannuylam. Chaynuy wanunganpam cananga achca runacuna paywan cawapäcunga. Chaymi canan Jesusga cayan salvacugninchi. 11Chaura Jesusmi noganchitaga raquirayämanchi Diospa runan cananchipag. Chaymi cananga cayan Tayta Diosga taytanchi Jesuspas, jinaman noganchipas. Chaymi Jesusga mana pengacular “Ayllücuna” niyämanchi. 12Chaynuymi isquirbishachru cay niyan: “Tayta Dios, gampita willapashagmi ayllücunata”. Jinaman “Paycunawan parëjum alawashayqui” niyanmi. 13Chaypitas cay niyantan: “Tayta Dios, nogasi gammanmi chaynuyla yupachicushay”. Niratan: “Caychru cayä, gam gomangay castaycunawanmi, nätan paycunaga cayan ayllücunam” niyanmi. 14Chaura Jesusga noganchinuysi runamanmi muyusha. Chaymi wanuras, jinaman chay wanunganpam juchäcachimagninchi Asyagtas yalira. 15Chaynuypam Asyagpa munayninchru, Diospita raquicasha cayasha jorgamasha canchi. 16Musyanganchinuysi Jesusga manam aywamura angelcuna yanapagchu, antis aywamura noganchi Abrahampa castancunata yanapämagninchim. 17Chaymi Jesusga noganchinuy runaman muyura. Chaynuypam payga cara Diospa sacerdötin, alisca cuyapacug, jinaman Dios ningannuy cawag. Chaura Jesusga lapan runacunapa juchanpita wanura, Dios mana piñasha cananpagmi. 18Payga noganchinuy runa carmi juchäcachiy munashas cara, nätan manam juchäcushachüga. Chaymi yanapämanchi paynuysi mana juchaman ishquinanchipag.

will be added

X\