SAN LUCAS 3

1Zacariaspa tsurin Juan chunyag jircacho caycaptinmi Tayta Diosnintsi nergan wilacuyninta wilacunanpag. Tsay witsanmi Tiberio jutiyog runa emperador César caycargan. Paymi chunca pitsga (15) watana lapan nacionpa mandagnin caycargan. Tsaynogpis Poncio-Pilato gobernador caycargan Judea provinciacho. Herodisnami mandag caycargan Galilea provinciacho. Herodispa wauguin Felipe mandag caycargan Iturea y Traconite nishgancho. Tsaynogmi Lisaniaspis mandag caycargan Abiliniacho. Jerusalenchönami Anaswan Caifás más mandag cüra caycargan. 3Tsaymi Jordán mayu naupancho cag marcacunapa Juan purergan caynog wilacushpan: “Tayta Diosnintsi perdonashunayquipag jutsa rurashgayquita cacharir bautizacäriy.” 4Juan Bautista manarag yuriptinmi Tayta Diosnintsipa profëtan Isaías paypita escribergan caynog nir: “Chunyag jircachömi juc runa fuertipa wilaconga caynog nir: ‘Mandag runa shamuptin chasquicunayquipag caminuta pitsar camaricushgayquinog jutsa ruraycunata cacharir camaricäriy Tayta Diosnintsi shamuptin chasquicärinayquipag. 5Tsaynog camaricäriy ragracunata pampatsagnog, jircacunata pampatsagnog, wicsu nänicunata derechagnog y uchcu uchcu nänita pampatsagnogpis. 6Tsaynogpami lapan runacuna tantyacärenga Tayta Diosnintsi salvananpag cashganta.’ ” 7Runacuna bautizacärinanpag shamuptinmi Juan caynog nergan: “¡Culebra casta runacuna! ¿Imanirtag gamcuna yarparcaycanqui jutsayog captiquipis Tayta Diosnintsi infiernuman mana gaycushunayquipag cashganta? 8Tayta Diosnintsi infiernuman mana gaycushunayquipäga jutsa rurayta cacharir pay munashgannogna cawapäcuy. Ama yarpapäcuytsu Abrahampa castan cashgalayquipita Tayta Diosnintsi salvashunayquipag cashganta. Tayta Dios munarga cay rumicunatapis Abrahampa castanman ticraratsinmanmi. 9Mana ali wayog yöracunata sapipita muturir ninaman gaycushgantsinogmi Tayta Diosnintsega jutsa ruragcunata infiernuman gaycunanpag listuna caycan.” 10Juan tsaynog niptinmi runacuna caynog tapupäcorgan: “Tsauraga ¿imatatag rurapäcöman salvacunäpag?” 11Tsaynog tapuptinmi caynog nergan: “Ishcay trucana röpayog carga jucag cag röpayquita goycuy röpaynag cagta. Tsaynogpis micuyniyog carga raquipaycuy micuyniynag cagta.” 12Tsaynoglami impuestuta cobragcunapis, bautizacunanpag shamur, caynog tapupäcorgan: “Tayta, nogacunaga ¿imatatag rurapäcöman salvacunäpag?” 13Tsauraga Juan caynog nergan: “Cobranayquipag cashganpita mastaga ama cobrapäcunquitsu.” 14Tsaynoglami taporgan soldäducunapis caynog nir: “Nogacunaga ¿imatatag rurapäcöman salvacunäpag?” Tsaymi Juan caynog nergan: “Ama pipa guellaynintapis guechupäcunquitsu. Tsaynog ama pipagpis manacagtaga tumpanquitsu. Arushgayquipita chasquishgalayquiwan contentacärinqui.” 15Tsauraga Cristo cay patsaman shamunanpag cashganta shuyarag runacuna yarpachacushpan caynog nergan: “¿Juantsurag Tayta Dios cachamushgan Cristo caycan?” 16Tsaymi Juan caynog nergan: “Cristoga tsayragmi shamonga. Nogaga yaculawanmi gamcunata bautizä. Tayta Diosnintsi cachamushgan Cristumi itsanga Santu Espirituwan y ninawanpis bautizapäcushunquipag. Nogaga manami paynog munayniyogtsu caycä. 17Payga jurquëtan aptashgami caycan trïguta wayrananpag. Nircurmi trïgu cagta churanga wayinman. Y punshantana gayconga imaypis mana upeg ninaman tsaycho rupananpag.” 18Tsaynog parlaparmi Juan yachatsergan Tayta Diosnintsipa wilacuyninta. 19Tsaynogpis runacunata Juan caynog nergan: “Wauguin Felipipa warminta suwapar rey Herodes jutsatami rurashga. Tsaynoglami más jutsatapis payga ruraycan.” 20Tsaynog parlaycashganta musyarmi Juanta prësu tsarircatsir Herodes wichgatsergan carcilman. Tsaynog wichgatsirmi más jutsayog ricacushga. 21Carcilman Juan manarag yaycurmi runacunata bautizaycaptin Jesuspis chayargan bautizacunanpag. Bautizacurcur Tayta Diosta manacuycaptinmi jana patsa quichacäcorgan. 22Tsaychömi Jesusman Santu Espíritu urämorgan palomanog. Tsaymi ciëlupita mayacämorgan Tayta Dios caynog nimushgan: “Gamga cuyay tsurëmi canqui. Noga munashgänog lapanta cumpliptiquimi cushishga caycä.” 23Quimsa chunca (30) watayognogna caycar bautizacurcurmi Jesús wilacuyta galaycorgan Tayta Diosnintsipa wilacuyninta. Paypäga runacuna yarpargan Josëpa tsurin cashgantami. Josënami Elïpa tsurin cargan. 24Elïmi cargan Matatpa tsurin. Matatmi cargan Levïpa tsurin. Levïmi cargan Melquipa tsurin. Melquimi cargan Janapa tsurin. Janami cargan Josëpa tsurin. 25Josëmi cargan Matatiaspa tsurin. Matatiasmi cargan Amospa tsurin. Amosmi cargan Nahumpa tsurin. Nahummi cargan Eslipa tsurin. Eslimi cargan Nagaipa tsurin. 26Nagaimi cargan Maatpa tsurin. Maatmi cargan Matatiaspa tsurin. Matatiasmi cargan Semeipa tsurin. Semeimi cargan Josëpa tsurin. Josëmi cargan Judäpa tsurin. 27Judämi cargan Joanapa tsurin. Joanami cargan Resapa tsurin. Resami cargan Zorobabelpa tsurin. Zorobabelmi cargan Salatielpa tsurin. Salatielmi cargan Neripa tsurin. 28Nerimi cargan Melquipa tsurin. Melquimi cargan Adipa tsurin. Adimi cargan Cosampa tsurin. Cosammi cargan Elmodampa tsurin. Elmodammi cargan Erpa tsurin. 29Ermi cargan Josuëpa tsurin. Josuëmi cargan Eliezerpa tsurin. Eliezermi cargan Jorimpa tsurin. Jorimmi cargan Matatpa tsurin. 30Matatmi cargan Levïpa tsurin. Levïmi cargan Simeonpa tsurin. Simeonmi cargan Judäpa tsurin. Judämi cargan Josëpa tsurin. Josëmi cargan Jonanpa tsurin. Jonanmi cargan Eliaquimpa tsurin. 31Eliaquimmi cargan Meleapa tsurin. Meleami cargan Mainanpa tsurin. Mainanmi cargan Matatapa tsurin. Matatami cargan Natanpa tsurin. 32Natanmi cargan Davidpa tsurin. Davidmi cargan Isaïpa tsurin. Isaïmi cargan Obedpa tsurin. Obedmi cargan Boozpa tsurin. Boozmi cargan Salmonpa tsurin. Salmonmi cargan Naasonpa tsurin. 33Naasonmi cargan Aminadabpa tsurin. Aminadabmi cargan Arampa tsurin. Arammi cargan Esrompa tsurin. Esrommi cargan Farespa tsurin. Faresmi cargan Judäpa tsurin. 34Judämi cargan Jacobpa tsurin. Jacobmi cargan Isaacpa tsurin. Isaacmi cargan Abrahampa tsurin. Abrahammi cargan Tarëpa tsurin. Tarëmi cargan Nacorpa tsurin. 35Nacormi cargan Serugpa tsurin. Serugmi cargan Ragaupa tsurin. Ragaumi cargan Pelegpa tsurin. Pelegmi cargan Heberpa tsurin. Hebermi cargan Salapa tsurin. 36Salami cargan Cainanpa tsurin. Cainanmi cargan Arfaxadpa tsurin. Arfaxadmi cargan Sempa tsurin. Semmi cargan Noëpa tsurin. Noëmi cargan Lamecpa tsurin. 37Lamecmi cargan Matusalenpa tsurin. Matusalenmi cargan Enocpa tsurin. Enocmi cargan Jaredpa tsurin. Jaredmi cargan Mahalaleelpa tsurin. Mahalaleelmi cargan Cainanpa tsurin. 38Cainanmi cargan Enospa tsurin. Enosmi cargan Setpa tsurin. Setmi cargan Adanpa tsurin. Y Adanmi cargan Tayta Diosnintsi camashgan.

will be added

X\