Sofonías 3

1¡Ay, Jerusalén llaqtamanta! Payqa manan Diosta kasunchu, payqa qhellin, runa sarunchaqmi. 2Manan Diospa rimasqanta kasukunchu, manataqmi anyaykusqantapas hap'ikunchu, manan Señor Diosman hap'ipakunchu, manan Diosninman asuykunchu. 3Kamachikuqninkunaqa qaparishaq leonkunan, juezninkunaqa tuta puriq lobokunan, paykunaqa manan illarimuypaq huk tullullatapas puchunkuchu. 4Profetankunaqa anchaykachaqkunan, siminku mana hunt'aq runakunan kanku. Sacerdotenkunaqa Dios yupaychana wasitan qhellichanku, Diospa kamachikuy simintan waqllichinku. 5Señor Diosqa chay llaqta ukhupin kashan, payqa chaninpunin, manan ima mana allintapas ruwanchu, sapa paqarmi runakunapaq chaninkaqta ruwan, sapa paqarmi payqa hunt'allanpuni, chaypas millay runaqa manan p'enqarikunchu. 6Señor Diosmi nin: Suyukunatan chinkachirqani, hatunkaray torrenkunatan kumparqani, callenkunatan ch'inman tukuchirqani, manan pipas chayninta purinñachu. Llaqtankuqa thunisqan kashan, manañan ima runapas kapunchu. 7Yuyarqanin: Jerusalenqa manchakuwanqapunichá, anyaykusqaytaqa hap'ikunqapunichá, nispa. Chay hina kaqtinqa, tiyananqa manan thunisqachu kanman karqan, tukuy chaykunamantaqa manan muchuchiymanchu karqan, paykunataq ichaqa tukuy ruwayninkupi waqlliyta munashallarqankupuni, nispa. 8Señor Diosmi nin: Chayrayku suyaykuwaychis, llaqtakuna huchachanay p'unchayta suyaykuychis. Yuyaykunin hatun suyukunata, llaqtakunata huñuykuyta, paykunaman tukuy k'arak phiñakuyniyta chayachinaypaq. Rawrashaq sienteq phiñakuyniymi kay pachantinta ruphaykunqa. 9Chay tiempo chayamuqtinmi, suyukunaq sonqonta mosoqyachisaq, hinan llapallan ñoqa Señor Diosmanta mañakamuwanqaku, llapallan huk-nisqalla serviwanqaku. 10Yupaychawaqniy runakunaqa Etiopía suyu mayukunaq chimpanmanraqmi ch'eqechisqa karqan, chaymantapachan ofrendakunata apamuwanqaku. 11Llaqtalláy, chay p'unchaypiqa manan p'enqachisqachu kanki ñoqa contra sayarispayki ruwasqaykikunamanta, chaypachan qan ukhumanta wikch'usaq kusisqa k'ankaykachaqkunata. Manañataqmi hayk'aqpas ch'uya orqoypi anchaykachankiñachu. 12Qan ukhupin k'umuykukuqkunata wakchakunata qhepachisaq, paykunan ñoqa Señor Diosman hap'ipakamuwanqaku. 13Israel llaqtamanta puchuqkunaqa manan mana chanintaqa ruwanqakuñachu, manan llullakunqakupaschu, manan astawanpas q'otunqakuchu. Paykunaqa mikhunqakun, samakunqakun, manataqmi imapas mancharichiqninku kanqachu, nispa. 14Sión llaqtaq ususin, takiykuy, Israel suyu kusisqa qapariy, Jerusalén llaqtaq ususin, q'ochukuy, tukuy sonqo kusikuy. 15Señor Diosmi manaña muchuchisunkiñachu, awqaykikunatapas wikch'upunmi. Israelpa reynin Señor Diosmi qanwan kashan, manan ima mana allinkaqtapas manchakunkiñachu. 16Chay p'unchaymi Jerusalenta ninqaku: Sión llaqta, ama manchakuychu, makiykipas ama pisi kallpayachunchu. 17Diosniyki Señor Diosqa qanwanmi kashan, payqa kallpasapallañan, qespichisunkin. Payqa qan hawan kusisqa q'ochukunqa, qanta munakuspan kawsarichisunki, takispan qanmanta kusikunqa, nispa. 18Señor Diosmi nin: Fiesta mana kaqtin llakisqa kasqaykitan karunchasaq, ancha p'enqachisqa kasqaykitan chinkachisaq. 19Chay p'unchaypin llapa sarunchaqniykikunata muchuchisaq, wist'uspa puriqkunatan qespichisaq, chinkasqa kaqkunatan pusakampusaq, pisichasqa kasqaykichis llapa suyukunapitaq hatunchasqa allin mentasqa kankichis. 20Chay p'unchaykunapin ñoqa pusakampusqaykichis, chay p'unchaykunapin ñoqa huñuykampusqaykichis, qhawashaqtiykichismi wakmanta t'ikarichisqaykichis, hinan kay pachantinpi allin mentasqa, hatunchasqa kankichis, nispa. Señor Diosmi chayta nin.

will be added

X\