Sofonías 2

1Mana p'enqakuq runakuna, huñunakuychis, k'umuykukuychis, 2Señor Diospa unanchasqan p'unchay manaraq chayamushasuqtiykichis, ñut'u paja hina manaraq wayrachisqa kashaqtiykichis, Señor Diospa k'arakllaña phiñakuynin manaraq chayamushasuqtiykichis, Señor Diospa k'arak phiñakuynin p'unchay manaraq chayamushasuqtiykichis. 3Kay pachapi llapa k'umuykukuqkuna, Diospa kamachikusqankunata kasukuqkuna, Señor Diosman kutirikuychis. Chaninkaqta ruwaychis, huch'uyyaykukuychis, ichapas Señor Diospa k'arak phiñakusqan p'unchaypi pakaykusqa kawaqchis. 4Gaza llaqtaqa mana runayoqmi kapunqa, Ascalón llaqtapas raqay-raqayman tukuchisqan kapunqa, Asdod llaqtapi tiyaqkunapas chawpi p'unchaymi qarqosqa kapunqa, Ecrón llaqtapi tiyaqkunapas llapallanmi wikch'usqa kapunqa. 5¡Ay, imaynaraqmi kankichis! lamar-qocha patapi tiyaq Filistea runakuna. Canaán suyu, qanpin Filistea runakuna tiyan, Señor Diosmi qan contra nin: Ñoqan ch'usaqyachisqayki, manan pipas qanpi tiyanqañachu, nispa. 6Chaymi lamar-qocha pata Filistea suyuqa q'achu pampaman tukupunqa, michiqkunaq michinanman, uywa kanchakunamanwan tukupunqa. 7Chaykunaqa Judá suyu puchuq runakunapaqmi kapunqa, chaypin uywa t'aqakunata michinqaku, Ascalón llaqta wasikunapin ch'isinta siriykunqaku, Diosninku Señor Diosmi paykunata waqaychanqa, hinaspan paykunata wakmanta t'ikarichinqa. 8Moab suyu runakunaq k'amipakusqantan uyarirqani, Amón suyu runakunaq k'amipakusqantan uyarirqani. Paykunan llaqtay runakunata k'amirqanku, suyunku hallp'awanpas hatunyaykurqanku. 9Chaymi Israelpa Tukuy-atiyniyoq Señor Diosninqa sutinpi juraspa nin: Moabqa Sodoma llaqta hinan kapunqa, Amón runakunapas Gomorra llaqta hinan kapunqa, kisa-kisaman tukuchisqa, kachi-kachiman tukuchisqa, wiñaypaq purunyachisqan kapunqa. Llaqtaymanta puchuq runakunan paykunata llat'ananqa, llaqtaymanta puchuq runakunan suyukunata hap'ikapunqa, nispa. 10Paykunaqa anchaykacharqankun, Tukuy-atiyniyoq Señor Diospa llaqtan runakunatan k'amispa asipayarqanku, chaymi chay hinata Diosqa paykunata muchuchinqa. 11Kay pacha llapa dioskunata thunispan, Señor Diosqa chay runakunata sinchita mancharichinqa. Lamar-qocha patapi llapa suyukunapas paytan yupaychanqaku, sapankankupas suyunkupikama. 12Qankunapas Etiopía suyupi tiyaqkuna, Señor Diospa espadanwanmi wañuchisqa kankichis. 13Señor Diosqa wichay lado suyuta maqaspan Asiria suyuta thuninqa, Nínive llaqtatan purunyachinqa, ch'inneqta hinan ch'akiman tukuchinqa. 14Perqa qatasqa cedro tablakunan mullphayanqa, wasi punkukunapin rumi soqya kanqa, chay raqaykunapin uywa t'aqakuna puñunqa, imaymana animalkunapas samakunqa. Hukupas, peqpiripas tusa rumikunapin q'esachakunqa, ventanakunamantapas chaykunaq waqasqanmi uyarikunqa. 15Chay llaqtaqa mana imata reparaspan kusisqa karqan, sonqonpin nisqa: ¡Ñoqaqa Diosmi kani! ¡Ñoqamanta wakqa manan kanñachu! nispa. ¡Kunantaq purunyachisqa kapushan! ¡Phiña animalkunaq tiyananmanmi tukupun! Pipas chay qayllanta puriqqa asipayanqan, makinta maywispan: ¡Achacháw! ninqa.

will be added

X\