Sofonías 1

1Amonpa churin rey Josías Judá suyupi kamachikushaqtinmi, Señor Diosqa Sofoniasman rimaykurqan. Sofoniasqa Cusiq churinmi karqan, Cusitaq Gedaliaspa churin karqan, Gedaliastaq Amariaspa churin karqan, Amariastaq Ezequiaspa churin karqan. 2Señor Diosmi nin: Ch'usaqyachisaqmi kay pachapi kaq tukuy imaymanata, 3wañuchisaqmi runakunatapas uywakunatapas, wañuchisaqmi phalaq animalkunatapas lamar-qochapi challwakunatapas, qolluchisaqmi millay runakunatapas, chinkachisaqmi kay pachamanta runakunatapas. Ñoqa Señor Diosmi chayta nini. 4Judá runakunatan muchuchisaq, Jerusalenpi llapa tiyaqkunatan ñak'arichisaq. Jerusalenmantan Baal dios yupaychayta llapanta chinkachisaq, ídolo yupaychaq sacerdotekunaq sutintapas chinkachisaqmi. 5Wakin runakunan wasi patakunapi k'umuykukuspa ch'askakunata, killata, intita yupaychanku. Wakin runakunan yupaychawaspanku sutiypi juranku, Milcom diospa sutinpipas jurallankutaqmi. 6Wakinninkutaq ñoqamanta t'aqakuwanku, manan maskhawankuchu, manataqmi tapukuwankupaschu, paykunatan llapallankuta wañuchisaq, nispa. 7Apu Señor Diospa muchuchinan p'unchaymi sispaykamushanña, chayrayku paypa ñawpaqenpi upallakuychis. Señor Diosmi Judá runakunata sacrificananpaq wakichishanña, waqyaspanmi paykunata haywananpaq t'aqanña. 8Señor Diosmi nin: Sacrificasqay p'unchaypin muchuchisaq umalli runakunatapas, reypa churinkunatapas, wak llaqta p'achawan llapa p'achakuqkunatapas. 9Chay p'unchaypiqa muchuchillasaqtaqmi wasikunaman suwakuq phawaykuqkunata, diosninkuq wasinman suwakusqankuwan q'otusqankuwan hunt'achiqkunatapas, nispa. 10Señor Diosmi nin: Chay p'unchaypin Jerusalenpi Challwa Punkumantapacha qaparinqaku, yapasqa mosoq llaqtamantapacha qaparkachanqaku, moqokunamantapacha raqhaqaqayta uyarinqaku. 11Qhatuna cheqas qayllapi tiyaqkuna waqaychis, chaypi kaq llapa qhatuqkunan wañunqa, qolqewan llapa negociaqkunan wañuchisqa kanqaku. 12Chay p'unchaykunapin lamparata hap'ispa Jerusalén llaqtapi k'uchun-k'uchunta maskhasaq, hinaspan vinoq qonchun hina llakhi tiyaq runakunata muchuchisaq, paykunan sonqonkupi ninku: Manan Señor Diosqa allintapas mana allintapas ruwanqachu, nispa. 13Chaymi qhapaq kayninkuqa qechusqa kanqa, wasinkupas raqayman tukuchisqa kanqa. Wasikunatan perqanqaku, ichaqa manan chaykunapi tiyanqakuchu, uvas chakratan ruwanqaku, ichaqa manan vinota ukyanqakuchu. 14Señor Diospa hatun p'unchayninqa qayllaykamushanñan, sispaykamushanñan, usqhamushanñan. ¡Uyariychis! Chay sinchi manchakuy p'unchayqa chayamushanñan, kallpasapa runapas khuyaytan qaparinqa. 15Chay p'unchayqa k'arak phiñakuy p'unchaymi kanqa llaki-phutiy manchapakuy p'unchaymi kanqa, thuniy purunyachiy p'unchaymi kanqa, tutayaq laqhayaq p'unchaymi kanqa, yana phuyu llanthu p'unchaymi kanqa. 16Chay p'unchaypin trompetata tocanqaku, soldadokunatan waqyanqaku: Allin waqaychasqa llaqtakuna contra, hatunkaray torrekuna contra phawaykuychis, nispa. 17Señor Diosmi nin: Ñoqa contra huchallikusqankuraykun runakunata llakiwan ñit'ichisaq, chaymi ñawsa hina purinqaku. Yawarninkun unu hina hich'asqa kanqa, ayankupas hatun hisp'ay hinan wikch'usqa kanqa, nispa. 18Señor Diospa k'arak phiñakusqan p'unchaypiqa manan qolqenkupas qorinkupas paykunataqa qespichinqachu, Señor Diosqa sienteq kaspanmi kay pachantinta ruphaykachinqa, payqa hukpaqkaman kay pachapi tiyaq llapa runakunata wañuchinqa.

will be added

X\