Zacarías 9

1Señor Diosmi Hadrac suyu contra riman, Damasco llaqta contrapas rimallantaq. Paymi llapa runata qhawashan, manan Israel llapa ayllukunallatachu. 2Señor Diosqa qhawashallantaqmi Israel tupaypi kaq Hamat llaqtatapas, Tiro llaqtatapas, Sidón llaqtatapas. Tiroqa yachaysapataq chayqa 3pukaratan perqakurqan, ñut'u hallp'ata hinan qolqetapas huñuykurqan, calle t'uruta hinan qoritapas huñuykurqan. 4Chaypas Señor Diosmi llapallanta qechunqa, hinaspan atiyninta lamar-qochaman chinkaykachinqa, llaqtataq ninaq ruphaykusqan kapunqa. 5Ascalón llaqtan chayta rikuspa sinchita mancharikunqa, Gaza llaqtapas llakipakuspan khatatatanqa, Ecrón llaqtaq suyakuyninpas qollupunqan, hinan mancharikunqa, Gaza llaqtaqa mana reyniyoqmi kapunqa, Ascalonpas mana runayoqmi kapunqa. 6Asdod llaqtapiqa karu llaqtayoqkunan tiyanqa, uma hoqariq Filistea runakunatan k'umuykachisaq. 7Siminkumantan yawarniyoq aycha mikhusqankuta horqosaq, mana mikhunapaq kaqtapas siminku ukhumantan aysasaq, chaypas kay Filistea runakunamanta puchuqqa ñoqaqmi kanqa, Judapin huknin aylluy hina kapunqaku, Ecrón runakunapas Jebus runakuna hinan llaqtay kapunqaku. 8Ñoqataq suyuyta hark'aykunaypaq maki qhawasaq, ama pi awqapas chayninta purinanpaq. Manañan sarunchaqpas paykunata muchuchinqachu, kunanqa ñoqan paykunata maki qhawashani, nispa. 9¡Sión llaqtaq ususin, anchata kusikuy! ¡Jerusalén llaqtaq ususin, kusisqa takiy! Kayqa Reyniykin hamushasunki, payqa chaninmi, atipaqmi, payqa huch'uyyaykukuqmi, asnopi sillaykusqan hamushan, china asnoq orqo maltanpin hamushan. 10Señor Diosmi nin: Efrainmantan awqa-tinkuy carretakunata karunchasaq, Jerusalenmantan awqa-tinkuy caballokunatapas wikch'usaq, awqa-tinkuy wach'ina p'eqtatapas p'akirqarisaq. Reyniykin suyukunapurata thak kawsaypi kawsachinqa, Kachi Qochamanta lamar-qochakaman kamachikunqapas, Eufrates mayumanta kay pachaq k'uchunkama. 11Sacrificio yawarwan cheqaqchaspan qanwan rimanakurqani, chaymi ñoqaqa presoykikunata mana unuyoq t'oqomanta horqosaq. 12Suyakushaq presokuna, pukaraykichisman kutipuychis. Kunanmi willashaykichis, imaymana ñak'arisqaykichisman hina astawan qankunata saminchanayta. 13Judatan wach'ina p'eqtayta hina chutasaq, Efraintan wach'inata hina paypaq churasaq. Sión llaqtalláy, qantan maqanakuqpa espadanman tukuchisqayki, wawaykikunatan Grecia runakuna contrata sayarichisaq, nispa. 14Señor Diosmi hawankupi rikhurinqa, wach'isqanpas lliphipishaq ninan lliph-lliph ninqa. Apu Señor Diosmi trompetata waqachinqa, Uraymanta hamuq tutuka hatun wayrapin purinqa. 15Tukuy-atiyniyoq Señor Diosmi paykunata waqaychanqa, warak'asqa rumikunatapas t'ustunqakun, mikhunqakun ukyanqakun, hinaspan vino ukyaqkuna hina warararanqaku, imaynan altar waqrakunaman ch'aqchuykunapaq mankaqa yawar hunt'a, chay hinan paykunaqa vino hunt'a kanqaku. 16Chay p'unchaypin Diosninku Señor Diosqa oveja t'aqata hina llaqtanta qespichinqa, coronapi umiña rumikuna hinataqmi runankunaqa hallp'anpi lliphipinqaku. 17¡Ancha allinmi, may munaymi suyuqa kanqa! Trigon waynakunata sumaqta wiñachinqa, upi vinotaqmi sipaskunatapas sumaqta wiñachinqa.

will be added

X\