Zacarías 7

1Rey Darío tawakaq watapiña kamachikushaqtinmi, Quisleu nisqa isqonkaq killaq tawakaq p'unchayninpi Zacariasman Señor Diosqa rimaykurqan. 2Chay pachan Betel llaqta runakunaqa Sarezerta Regem-melecta runankunatawan Tukuy-atiyniyoq Señor Diospa wasinman kacharqanku paymanta mañakamunankupaq, 3Señor Diospa wasinpi kashaq sacerdotekunata profetakunata tapukamunankupaq: ¿Wakin watakunapi ruwamusqaykuta hinachu sapa wata phisqakaq killapi waqaspa ayunashallasaqku? nispa. 4Hinan Tukuy-atiyniyoq Señor Diosqa niwarqan: 5Suyuntin runakunatapas sacerdotekunatapas tapumuy: Kay qanchis chunkantin wata phisqakaq killapipas qanchiskaq killapipas ayunaspaykichis waqaspaykichisqa, ¿ñoqallapaqchu ayunarqankichis? 6Mikhuspaykichispas ukyaspaykichispas, ¿manachu allinniykichispaq mikhurqankichispas ukyarqankichispas? 7¿Manachu qankunaqa yachankichis ñawpaq profetakunata Señor Diospa rimaykusqanta, Jerusalenpas muyuriqnin llaqtakunapas runa hunt'ataq thak-nisqataq kashaqtin, Neguev ch'inneqpas Shefela moqo-moqopas runa hunt'a kashaqtin? nispa. 8Señor Diosmi ñoqa Zacariasta nillawarqantaq: 9Ñoqa Tukuy-atiyniyoq Señor Diosmi llaqtaytaqa ñawpaqtaña nirqani: Chanintapuni juzgaychis, khuyapayanakuychis, llakipayanakuychis. 10Ama sarunchaychischu viudatapas, mana tayta-mamayoqtapas, wak llaqtayoqtapas, wakchatapas. Amataq sonqoykichispi yuyaykuychischu mana allinta runamasiykichis contra mana allin ruwayta, nispa. 11Ichaqa manan kasukuyta munarqankuchu, aswanpas qheparpariwarqankun, uyariq roqt'un kapurqankupas. 12Sonqonkutapas ch'ila rumiman hinan tukuchirqanku yachachikuy simitapas kamachikuykunatapas mana uyarinankupaq, chaykunatan Espirituyqa ñawpa profetakunawan willachirqan. Chaymi ñoqa Tukuy-atiyniyoq Señor Diosqa sinchita phiñakurqani. 13Imaynan paykunaman waqyakuqtiy mana uyariwarqankuchu, chhaynatan ñoqapas waqyakamuwaqtinku mana uyarirqanichu. Ñoqa Tukuy-atiyniyoq Señor Diosmi chayta nini. 14Aswanmi mana rikusqanku llapa suyukunaman muyuq wayrawan hina paykunataqa ch'eqechirqani. Chay suyunkutaq mana pipas tiyaq kapuqtin qhepankuta purunyapurqan. ¡Chay hina sumaq suyutan purunman tukuchipurqanku! nispa.

will be added

X\