Zacarías 4

1Ñoqawan rimaq angelmi kutimurqan, hinaspan rikch'arichiwarqan puñushaq runata rikch'achiq hina. 2Tapuykuwarqantaq: –¿Imatan rikushanki? nispa. Hinan kutichirqani: –Qorimanta candelerotan rikushani, patanpi aceite churanayoqta. Aceite churana muyuriqpitaq qanchis lamparachakunata rikushani, sapankata mechapaq wirp'ayoqtakama. 3Candelero qayllapin iskay olivo sach'a kashasqa, hukninmi pañanpi, huknintaq lloq'enpi, nispa. 4Huktawanmi ñoqawan rimaq angelta tapurqani: –Wiraqocháy, ¿ima ninantan chaykunaqa nin? nispa. 5Paytaq niwarqan: –¿Manachu yachanki chaykunaq imachus kasqanta? nispa. Ñoqataq: –Manan yachanichu wiraqocháy, nirqani. 6Chaymi payqa niwarqan: –Tukuy-atiyniyoq Señor Diosmi Zorobabelta nin: Kay ruwaytaqa manan ejercitowanchu, manan runaq kallpawanchu, aswanpas Espirituywanmi tukunki. 7Hatunkaray orqotan: ¿Imataq qanri kanki? ninki, ñawpaqeykipin, Zorobabel, chay orqoqa pampayachisqa kanqa. Wasi perqa allin hap'iq rumita churaykushaqtiykin, runakunaqa kusisqa qaparinqaku: ¡Ima sumaqmi! ¡Ima munaymi! nispanku. 8Chaymantataq Señor Diosqa rimaykuwarqan: 9Zorobabelmi kay wasi teqsita churarqan, payllataqmi tukunqapas. Chaymi llaqtayqa yachanqa ñoqa Tukuy-atiyniyoq Señor Dios, qanta paykunaman kachasqayta. 10Wasi perqay qallariypin pisillata ruwasqata qhawarispa wakin pisicharqanku, paykunan wasita Zorobabelpa tukusqanta rikuspa kusikunqaku, nispa. Angelmi nillawarqantaq: –Chay qanchis lamparachakunaqa Señor Diospa ñawinkunan, chaykunan teqsimuyuntinta qhawashan, nispa. 11Astawanmi tapuykurqani: –¿Iman chay candeleroq pañanpi lloq'enpi kashaq iskay olivo sach'akunaqa? nispa. 12Tapuykullarqanitaq: –¿Imataq chay iskay olivo k'allmari? Chaykunan iskay qori toqorokuna qayllapi kashan, chay toqorokunamantan qori color aceite lloqsin, nispa. 13Angelmi niwarqan: –¿Manachu chaykunaq imachus kasqanta yachanki? nispa. Chaymi nirqani: –Manan yachanichu wiraqocháy, nispa. 14Paytaq niwarqan: –Chaykunaqa kay pachantinpa Señor Diosninta servinankupaq aceitewan hawisqa iskaynin qharikunan, nispa.

will be added

X\