1 Qhawarispaymi rikullarqanitaq: Huk qharin tupuna cordelta hap'ishasqa. 2 Hinan payta tapurqani: –¿Maytan rishanki? nispa. Paytaq niwarqan: –Jerusalenta tupuqmi rishani, hayk'a anchoyoqchus hayk'a wask'ayoqchus kasqanta yachanaypaq, nispa. 3 Chaymantataq ñoqawan rimaq angelqa ripurqan, huk angeltaq paywan tupaq hamurqan, 4 hinaspan payta nirqan: –Phaway, tupuna cordelniyoq waynata nimuy: Jerusalenpin askhallaña runapas uywapas tiyanqa, chaymi llaqtaqa manaña perqawan muyuykachisqachu kanqa, nispa. 5 Kikin Señor Diosmi nin: Ñoqaqa chay llaqtapaqmi muyuykuqnin nina perqa hina kasaq, chay ukhupin paykunapaq qhapaq-atiynin kasaq, nispa. 6 Señor Diosmi nin: ¡Lloqsimuychis ayqemuychis wichay suyumanta! Ñoqan hinantinman ch'eqechirqaykichis, ninmi Señor Diosqa. 7 Sión llaqtalláy, Babiloniapi tiyashasqaykichismanta, ¡ayqemuychis! ¡Hampuychis! nispa. 8 Pipas qankunata tupaykuqqa ñawi ruruytan tupaykun, Tukuy-atiyniyoq Señor Diosmi chunkay-chunkata kamachimuwan llat'anaqniykichis suyukuna contra rimanaypaq: 9 Señor Diosmi nin: Qankuna contran sayarisaq, kikin kamachillaykichiswantaqmi qankunata llat'anachisqaykichis, nispa. Ahinapin yachankichis Tukuy-atiyniyoq Señor Diospa kachamuwasqanta. 10 Señor Diosmi nin: Sión llaqtapi tiyaqkuna, kusisqa qapariychis q'ochukuychis, hamushaniñan, qankuna ukhupin tiyasaq, nispa. 11 Chay p'unchaypin askha suyukuna Señor Diosman huñuykukunqaku, paykunapas llaqtallantaqmi kapunqaku. Tukuy-atiyniyoq Señor Diosmi qankuna ukhupi tiyanqa, ahinapin yachankichis paypa qankunaman kachamuwasqanta. 12 Señor Diosmi Judá suyuta ch'uya hallp'api wakmanta hap'ikapunqa kaqnin kananpaq, Jerusalentapas wakmantan akllakapunqa. 13 Señor Diosmi ch'uya tiyananmanta sayarimun, chayrayku llapa runa paypa qayllanpi upallachun.
