Zacarías 11

1Yaw, Líbano, punkuykikunata kichariy, cedro sach'aykikunata nina ruphaykunanpaq. 2Yaw, ciprés sach'a, waqaykuy, cedro sach'a kumpakapusqanrayku, ancha hatun sach'akuna kumpakapusqanrayku. Yaw, Basanpi encina sach'akuna waqaykuychis, k'iski sach'a-sach'a chaqosqa kapusqanrayku. 3Michiqkunan qaparispa waqaykunku, munay q'achukuna chaqosqa kasqanrayku. ¡Leonkunaq qaparisqanta uyariychis, Jordán mayupi mat'i sach'a-sach'an chaqosqa kapushan! 4Diosniy Señor Diosmi niwarqan: Nak'anapaq kaq ovejakunata michiy. 5Chaykunatan rantiqninkunaqa nak'an, manataqmi huchallikushaqpaq qhawasqachu kanku. Vendeqninkupas ninkun: Yupaychasqa Señor Diosqa kachun, qhapaqyaykapunin, nispa. Michiqninkupas manan chaykunataqa llakipayanchu. 6Señor Diosmi nin: Ñoqaqa manañan chay suyupi tiyaqkunata llakipayasaqchu, aswanpas ñoqan runakunata sapankata runamasinman reyninmanpas hap'iykachisaq. Chaykunan suyuta sarunchanqaku, manataqmi mayqenninkutapas makinkumanta kacharichisaqchu, nispa. 7Hinan nak'anapaq t'aqasqa ovejakunata michirqani oveja rantiqkunapaq. Iskay tawnatataq hap'irqani, huknintan “Khuyakuq” nisqata suticharqani, huknintataq “Hukllachay” nisqata suticharqani. Hinaspan ovejakunata michirqani. 8Huk killallapin kinsa michiqkunata qarqorqani. Ovejakunan sinchita umayta nanachiwarqanku, ñoqatapas cheqnikuwarqankun. 9Chaymi nirqani: Manañan michisqaykichisñachu. Mayqenpas wañunanpaq kaqqa wañuchun, mayqentapas nak'anqaku chayqa nak'achunku, qhepaqkunapas mikhunakuchunku, nispa. 10Hinaspan “Khuyakuq” nisqa tawnata hap'ispa p'akirqani, tukuy llaqtakunawan Señor Diospa rimanakusqan p'akisqa kasqan rikhurinanpaq. 11Chay p'unchaypin rimanakusqaqa yanqayachipusqa karqan, chhaynapin qhawarimuwaqniy oveja rantiqkunaqa yacharqanku Señor Diospa simin kasqanta. 12Hinamantataq paykunata nirqani: Allinpaqchus hap'inkichis chayqa, pagoyta qopuwaychis, mana chaytaq, saqepuychis, nispa. Hinaqtinmi kinsa chunka qolqeta pagawarqanku. 13Chayqa ancha askha qolqetapas qowankuman hinan paykunapaqqa. Chaymi Señor Diosqa niwarqan: Dios yupaychana wasipi qolqe unuyachiqman qoy, nispa. Chaymi chay kinsa chunka qolqeta hap'ispay, Señor Diospa wasinpi kaq qolqe unuyachiqman qorqani. 14Hinamantataq hukkaq “Hukllachay” nisqa tawnata p'akirqani, Judá suyuwan Israel suyuwan wawqepura kasqankuta t'aqarparinapaq. 15Huktawanmi Señor Diosqa niwarqan: Huk mana yuyayniyoq michiqman hina tukuy. 16Kayqa, ñoqan huk michiqta kay suyupi churasaq. Payqa manan chinkasqata watukunqachu, manan pantapuqtapas maskhanqachu, manan k'irisqatapas hampinqachu, manan qhali ovejatapas mikhuchinqachu, aswanmi wira ovejakunaq aychanta mikhunqa, manan phapatullantapas puchuchinqachu. 17¡Ay, uywan saqerpariq mana yuyayniyoq michiq! ¡Ay, mana valeq michiq! ¡Espada makintapas paña ñawintapas k'irichun! ¡Llapallan makinqa ch'akichun, paña ñawinpas ñawsayaykapuchun! nispa.

will be added

X\