Zacarías 1

1Iskaykaq watapiña rey Darío kamachikushaqtinmi pusaqkaq killapi Iddoq nieton Berequiaspa churin profeta Zacariasta Señor Diosqa rimaykurqan: 2Ñoqa Señor Diosmi ñawpa taytaykichispaq k'araktapuni phiñakurqani. 3Chayrayku, llaqtayta nimuy, Tukuy-atiyniyoq Señor Diosmi nin: Kutirikamuwaychis, nispa. Tukuy-atiyniyoq Señor Diosmi nin: Ñoqapas kutirimusqaykichismi, nispa. 4Ama ñawpa taytaykichiskuna hinachu kaychis, paykunamanmi ñawpa profetakunaqa kunkayoqta nirqanku: ¡Millay kawsasqaykichismanta, millay ruwasqaykichismanta kutirikamuwaychis! nispanku. Ichaqa manan uyariwarqankuchu, manan kasuwarqankuchu. Ninmi Tukuy-atiyniyoq Señor Diosqa. 5Kunanri, ¿maytaq chay ñawpa taytaykichiskuna? ¿Wiñaytachu profetakunari kawsanqa? 6Kamachiy profetakunawanmi ñawpa taytaykichisman willachirqani simiykunata kamachikuyniykunata. Chaykunan paykuna contra hunt'akurqan, chaymi paykunaqa kutirikamuwaspa nirqanku: Imaynan Tukuy-atiyniyoq Señor Diosqa yuyaykurqan purisqanchisman hina, ruwasqanchisman hina ruwayta, ahinatan ñoqanchista muchuchiwarqanchis, nispa. 7Iskay kaq watapiña rey Darío kamachikushaqtinmi, Sebat nisqa chunka hukniyoq killaq iskay chunka tawayoq p'unchayninpi ñoqa Iddoq nieton, Berequiaspa churin profeta Zacariasta Señor Diosqa rimaykuwarqan. 8Tutan rikhuriyta rikurqani: Huk runan puka-ch'umpi caballopi sillaykusqa kashasqa, paymi wayq'o k'aktupi arrayán-arrayanpi sayashasqa, qhepanpitaq kashasqa puka-ch'umpi caballokuna, ch'umpi caballokuna, yuraq caballokuna. 9Chaymi tapurqani: –Wiraqocháy, ¿imakunataq kaykunari? nispa. Hinan ñoqawan rimaq angelqa niwarqan: –Ñoqan rikuchisqayki imakunachus chaykunaqa kasqanta, nispa. 10Arrayán-arrayanpi kashaq runataq nirqan: –Chaykunaqa teqsimuyuntin pachata purimunankupaq Señor Diospa kamachisqankunan, nispa. 11Hinan paykunaqa arrayán-arrayanpi kashaq Señor Diospa angelninta nirqanku: –Teqsimuyuntin pachatan purimuyku, llapa pachantinmi allillan thak-kayapi kawsashanku, nispa. 12Chaymi Señor Diospa angelninqa nirqan: –Tukuy-atiyniyoq Señor Diosnilláy, ¿hayk'aqkamataq mana khuyallikunkichu Jerusalentapas Judá llaqtakunatapas? Chaykunapaqmi qanchis chunka wataña phiñasqa kashanki, nispa. 13Hinaqtinmi Señor Diosqa ñoqawan rimaq angelman kusichikuq sumaq simikunata kutichirqan. 14Chaymantataq ñoqawan rimaq angelqa kayta willanaypaq kamachiwarqan: –Tukuy-atiyniyoq Señor Diosmi nin: Sientenipunin Jerusalenmantapas Sión orqomantapas. 15Chayraykun k'araktapuni phiñakuni chay llakhi tiyashaq suyukunapaq, ñoqa asllata phiñakushaqtiymi paykunaqa llaqtayta sinchita ñak'arichirqanku. 16Chaymi ñoqa Señor Diosqa Jerusalenta wakmanta khuyapayasaq, chaypin wasiyqa wakmanta perqasqa kanqa. Chay hinaqa perqanapaqmi cordelwan tupunqaku, nispa. Ñoqa Tukuy-atiyniyoq Señor Diosmi chayta nini. 17Chay angelqa nillawarqantaqmi, Willamullaytaq: Tukuy-atiyniyoq Señor Diosmi nin: Anchatapunin llaqtaykunataqa wakmanta t'ikarichisaq, Siontaqa wakmantan sonqochasaq, Jerusalentaqa wakmantan akllakusaq, nispa. 18Chaymantataq qhawarispa rikurqani tawa waqra kashaqta. 19Chaymi ñoqawan rimaq angelta tapurqani: –¿Imataq chay waqrakunari? nispa. Paytaq niwarqan: –Chaykunaqa Judapi, Israelpi, Jerusalenpi tiyaqkunata ch'eqechiq atiyniyoq suyukunan, nispa. 20Chaymantataq Señor Diosqa tawa herrerota rikuchiwarqan. 21Ñoqataq tapurqani: –¿Imamantaq kaykunari hamunku? nispa. Hinan payqa niwarqan: –Waqrakunaqa Judá suyuta ch'eqechispan k'uytupachirqanku, kay herrerokunataq ichaqa hamunku chay Judá suyuta ch'eqechiq suyukunata khatatatachispa atipanankupaq, nispa.

will be added

X\