1 ¡Turallaychus qanqa kawaq karqan, mamaypa ñuñunta ñuñuq! Chaypachan hawapi tupaspay much'aykuykiman karqan, manataqmi pipas pisichawanmanchu karqan. 2 Ñoqan pusaykiman, mamaypa wasinmanmi haykuchiykiman chaypitaq yachachiwankiman. Ñoqan q'apashaq vinota ukyachiykiman, granadaykuna ch'irwasqatan haywaykiman. 3 Lloq'e makinpin umay samaykun, paña makinwantaq oqllaykuwan. 4 Jerusalén sipaskuna, prometewaychis: Munakuytaqa ama rikch'arichiychischu, aswanpas kikillanmanta sayarichun, nispa. 5 ¿Pitaq chay munakusqan qhariman k'iraykukuspa ch'inneqmanta wichamuqri? Manzana sach'a k'uchupin rikch'arichirqayki, chaypin mamaykiqa wiksallikurqasunki, chaypin nanaywan hap'ichikuspa wachakurqasunki. Warmin nin: 6 Ñoqallata sonqoykipi hap'ikuway, ñoqallata makiykipi apakuway. Wañuy hinan munakuyqa kallpasapa, Wañuy-pacha hinan sinchi loqhellaña, sansariyninpas nina rawray hinan, qallushaq nina rawray hinan. 7 Askha unupas munakuytaqa manan thasnuyta atinmanchu, manan mayukunapas millp'uyta atinmanchu. Pipas kay munakuypaq llapa wasi kawsayninta qonman chayqa, pisichasqapunin rikukunman. 8 Kanmi sullk'a panachanchis, mana ñuñullayoqraqmi. ¿Imanasunmi panachanchista, pay rimaykukuq hamuqtinku? 9 Paychus perqa kanman chayqa, perqa patapin qolqe torrekunata sayarichisunman, paychus punku kanman chayqa, cedro tablakunawanmi muyuchisunman. 10 Ñoqaqa perqa hinan kani, ñuñuykunataq torrekuna hina, chaymi paypaqqa sumaq kusichiqnin kani. 11 Baal-hamonpin Salomonpa uvas chakran karqan, chaytan qhawaqkunaman qorqan, sapankankutaq rurusqanmanta waranqa qolqeta payman apamurqanku. 12 Salomonlláy, waranqa qolqeqa qanpaq kachun, iskay pachak qolqetaq chakra qhawaqkunapaq kachun. Ñoqaqa kikiymi uvas chakrayta qhawakuni. 13 Urpilláy, qanqa huertakunapin tiyashanki, qharimasiykunaqa makin uyarishanku, ñoqaman kunkaykita uyariykachiway. 14 ¡Munakusqalláy! Orqo taruka hina phawamuy, luychu hina p'itamuy, q'apashaq orqo-orqo patankunanta.
