Cantares 7

1Reypa ususin, ¡imayna munaychan usut'ayoq chakiykiqa! Puriqtiykin teqniykikunaqa alhajakunaman rikch'akun, allin yachaqpa ruwasqan alhajakunaman rikch'akun. 2Pupuykiqa muyu vaso hinan, chaypiqa sumaq vinoqa kashallanpunin. Wiksaykiqa hamanq'ay t'ikawan muyuykachisqa trigo huñusqa hinan. 3Iskaynin ñuñuykiqa luychu mellizo uñakuna hinan. 4Kunkaykiqa marfil torre hinan. Ñawiykiqa Hesbón llaqtapi Bat-Rabim punku qayllapi iskay unu p'uytu hinan. Senqaykiqa Damasco llaqtaman qhawaq Líbano orqopi torre hinan. 5Umaykiqa Carmelo orqo hinan munayman rikch'achisunki, pakasqa chukchaykipas sani-pukamanmi saman, chay chukchaykin reypa sonqonta suwan. 6Sonqolláy, ima sumaqmi kanki, sonqo suwan kanki, q'ochurichiwaqniymi kanki 7Palmera sach'a hina sikllan kanki, ñuñuykipas palmera rurukuna hina p'utiy-p'utin. 8Ñoqan nirqani: Palmeraman wichasaq, palmera rurukunata pallasaq, nispa. Ñuñuykiqa rurusapa uvas ch'ampa hina kachun, samasqaykipas manzana hina q'apachun, 9simiykiqa sumaq vino hina kachun. Chay hinaqa, munakusqallaypaq chay vinoqa kachun, siminpaqpas kirunpaqpas llamp'ullaña kachun. 10Ñoqaqa munakusqaypaqmi kani, sonqonpas aysakamushallawanpunin. 11Munakusqalláy, haku campota risun, alheña t'ika-t'ika ukhupi puñukamusun. 12Tutallamanta uvas chakrakunaman risun, ichapaschá ch'ikchishanmanña, ichapaschá mukmunkuna phanchishanmanña, ichapaschá granada mallkikuna t'ikashanmanña, chaypin munakamusqayki. 13Munakusqalláy, mandrágora t'ikakunan q'aparishan, punkunchispitaqmi imaymana misk'i fruta kashan, unay pallamusqatapas chayllaraq poqosqatapas waqaychapurqaykin.

will be added

X\