Cantares 6

1Llapa warmikunamantapas aswan munaycha, ¿maytan munakusqaykiqa ripurqan? ¿Maytan wayllukusqaykiqa puriripurqan? Haku payta maskhamusunchis. 2Munakusqayqa huertanmanmi uraykurqan, sumaq q'apashaq huertanman, huertanpi puririkamunanpaq, hamanq'ay t'ikakunata pallarikamunanpaq. 3Ñoqaqa munakusqaypan kani, munakusqaytaqmi ñoqaq, payqa hamanq'ay t'ika-t'ikapin michimushan. 4Munakusqalláy, ancha munaychan qanqa kanki Tirsa llaqta hina, munaychallañan qanqa kanki Jerusalén llaqta hina, wachulla puriq allin kallpasapa soldadokuna hina. 5Amaña qhawapayawaychu, ñawiykiqa sonqoytan suwawan. Chukchaykiqa Galaad qhatakunanta salta-saltarispa uraykamushaq cabra t'aqa hinan. 6Kiruykiqa rutusqa yuraq oveja t'aqa hinan, bañasqamanta lloqsimushaq oveja t'aqa hinan, mellizo uñayoq hinan iskaykama kashan, manataq mayqenpas sapallanchu kashan. 7Uyaykiqa uma qatanayki ukhupi phasmisqa puka granada hinan. 8Soqta chunkan reinakunaqa, pusaq chunkataqmi tiyaqmasin warmikunapas, ancha askhataqmi sipaskunapas, 9ichaqa ch'ullallan urpichallayqa, ch'ullallan munaychallayqa, mamanpa sapan ususillanmi, wachakuqninpa aswan munakusqallanmi. Payta rikuspan sipaskunaqa: ¡Kusisamiyoqmi! nirqanku, reinakunapas tiyaqmasin warmikunapas paytan alabarqanku. Takiqkunan ninku: 10¿Pitaq kayri pacha illarimuq hina lloqsimun, killa hina munaycha, inti hina k'anchashaq, wachulla puriq allin kallpasapa soldadokuna hina? 11Nogal sach'a-sach'amanmi uraykurqani, qheswa wayq'opi q'omer llanllashaqta rikunaypaq, uvas yurakunaq phutumushasqanta rikunaypaq, granada mallkikunaq sisamushasqanta rikunaypaq. 12Chaymantaqa manañan yachapurqanichu imaynapunichus kapusqanta, qhapaq carretanpi umalliywan kuska rikhurinaykama. 13¡Kutirimuy, muyurimuy, Sulamitáy! ¡Kutirimuy, muyurimuy, rikuykuytan munaykiku!

will be added

X\