Cantares 5

1¡Panalláy, yanalláy! Ñan huertayman haykuniña, ñan mirraytapas q'apaqniytapas pallamuniña, ñan lachiwanaymanta miel misk'itapas malliniña, ñan vinoytapas lecheytapas ukyaniña. Munanakuqkuna, mikhuychis ukyaychis, amikunaykichiskama munanakuychis. 2Ñoqaqa puñusharqanin, sonqoymi ichaqa rikch'asharqan. Munakuwaqniyqa mosqoypin waqyamushawasqa, munakuwaqniyqa punkutan takamushasqa. ¡Panalláy, munakusqalláy, kicharimuway! ¡Urpichalláy, munaychalláy, kicharimuway! Umaytan sullaykushawan, tuta sullan chukchaymanta sut'urimushan, nispa. 3Ñan p'achaytapas ch'utikuniña, ¡wakmantaraqchá p'achakuyman! Ñan chakiyta maqchikuniña, ¡wakmantachá qhellichakuyman! 4Munakusqayqa wasiy punku k'aktuntan p'utiman makinta haywaykamushasqa, chaywanmi sonqoyqa phataqeshasqa. 5Chaymi munakusqayta kicharimunaypaq sayarishasqani, punku p'utiman lloqllaykuq mirran makiymanta sut'urishasqa, dedoykunamantapas sut'urishasqa. 6Munakusqaypaqmi punkuta kicharishasqani, ichaqa ñan munakusqayqa ripusqaña, ñan chinkaripusqaña, rimasqanta uyariqtiymi sonqoyqa chiriyashasqaraq. Maskhashasqanin manataq tarisqanichu, waqyakushasqanin manataq kutichimuwasqachu. 7Llaqta muyuq guardiakunan tariwaspanku maqashawasqaku, k'irishawasqaku, llaqta perqa qhawaqkunan llikllayta qechushawasqaku. 8Jerusalén sipaskuna ama hinachu kaychis, munakusqayta tarispaykichisqa willaykapuwaychis munakuymanta onqoshasqayta. 9Llapa warmikunamantapas aswan munaycha, ¿imapitaq munakusqayki qhariqa huk qharikunamantapas aswan allin? ¿Imapitaq wayllukusqayki qhariqa hukkunamantapas huk-niraq chay hinatapuni valekuwanaykikupaq? 10Munakusqayqa munay rikch'ayniyoq puka uyan, chunka waranqa ukhupipas sut'i reqsisqan. 11Umanqa ancha ch'uya qori hinaraqmi, chukchanqa k'upan, suweq'ara hina yanan, 12ñawinqa phawaq unu patapi iskay urpi tiyashaq hinan, lechewan maqchisqapas kashankuman hinan, iskay ch'olqochisqa umiña hinan. 13Uyanqa sumaq q'apaq t'ikayoq huerta hinan, siminqa q'apashaq mirra sut'umuq hamanq'ay t'ika hinan, 14makinkunaqa q'ellu umiñawan ch'olqochisqa qori champi hinan, qhasqonqa q'oyu umiñakaman, llusk'achasqa marfil hinan. 15Phakankunaqa ch'uya qorimanta teqsipi sayachisqa mármol tusakuna hinan, rikch'ayninqa Líbano orqokuna hinan, siklla kayninqa Líbano cedro sach'akuna hinan. 16Siminqa misk'illañan, payqa sonqo suwallañan. Jerusalén sipaskuna, chay hinan munakusqayqa, chay hinan sonqo ruruyqa.

will be added

X\