Cantares 4

1Munakusqalláy, ¡ima munaymi kanki! ¡Ima sumaq rikch'ayniyoqmi kanki! Ñawiykipas uma qatanayki ukhupi iskay urpikuna hinan. Chukchaykipas Galaad qhatakunamanta salta-saltarispa uraykamushaq cabrachakuna hinan. 2Kiruykipas rutusqa yuraq oveja t'aqa hinan, bañasqamanta lloqsimushaq oveja t'aqa hinan, mellizo hinan iskaykama kashan, manataq mayqenpas sapallanchu kashan. 3Simiykipas sansaq-puka q'aytu hinan, rimayniykiqa munay llamp'ullañan. Uyaykipas uma qatanayki ukhupi phasmisqa puka granada hinan. 4Kunkaykiqa munay sikllan Davidpa sumaq perqasqa torren hina. Waranqa escudon warkurayashan, sapankan kallpasapakunaq hatun escudon hina. 5Iskaynin ñuñuykiqa iskay uña luychu hinan, hamanq'ay t'ika-t'ika ukhupi mikhushaq mellizo uña taruka hinan. 6P'unchay manaraq illarimushaqtinmi laqhayaqpas manaraq chinkaripushaqtinmi mirraq q'apanan orqoman seqasaq, inciensoq q'apanan moqoman wichasaq. 7Munakusqalláy, chakiykimanta umaykikaman munaychallaña kanki, manan qanpiqa ima millaypas kanchu. 8Yanalláy, Líbano orqomanta ñoqawan uraykusun, Libanomanta kuska haykusun. Amana nisqa orqomantapacha uraykamuy, Senir orqo patamantapacha, Hermón orqo patamantapacha, leonkunaq tiyanan t'oqomantapacha, leopardokunaq tiyanan orqomantapacha. 9¡Panalláy, yanalláy! Sonqoytan suwawarqanki, hukta qhawarispallaraqmi sonqoyta suwawarqanki, kunka walqanaykiq huknin umiñanwanmi sonqoyta suwawarqanki. 10¡Panalláy, yanalláy! May sumaqmi munaykukuyniykiqa. Vinomantapas aswan misk'iraqmi munaykukuyniykiqa, q'apaq hawikunaykipas ancha sumaqpunin, manan imapas chay hinataqa q'apanchu. 11Yanalláy, miel misk'in simiykiqa, miel misk'illañan lechellañan simiykiqa, p'achaykipas Líbano orqo-orqo hinan q'aparishan. 12¡Panalláy, yanalláy! Wisq'asqa huertan kanki, kanchachasqa p'uytun kanki, allin waqaychasqa pukyun kanki. 13Chaypin askha granada mallkikuna sumaqllataña rurun, alheñapas nardopas munaytan t'ikashan. 14Kanmi nardo t'ikapas, azafrán t'ikapas, q'apaq cañapas, canela sach'apas, imaymana niraq incienso mallkikunapas, mirra t'ikapas, áloe sach'apas, llapa sumaq q'apaqkunapas. 15Huerta pukyun kanki, phullpumushaq pukyun kanki, Libanomanta phaqchamushaq unun kanki. 16¡Wichay wayra, wayrarimuy! ¡Uray wayra, phukurimuy! Huertayman wayramuy, anchata q'aparichiy. Munakusqalláy, huertaykiman hamuy, misk'illaña frutakunata mikhuykuy.

will be added

X\