Cantares 3

1Puñushaspaymi tutakuna ancha munakusqaywan mosqokurqani, paytan maskhashasqani, manataq tarisqanichu. 2Chaymi nishasqani: Sayarispay llaqtata muyumusaq, callen-callenta plazan-plazanta ancha munakusqayta maskhamusaq, nispa. Maskhashasqanin, manataq tarimusqanichu. 3Llaqta muyuq guardiakunawan tupaspaymi paykunata tapurikushasqani: ¿Manachu rikurqankichis ancha munakusqayta? nispa. 4Qayllankumanta asllataraq rishaspaymi ancha munakusqaytaqa tarisqanipacha. Makinmantan hap'iykushasqani, manataq kacharishasqanichu mamaypa wasinman pusaykunaykama, wiksallikuwaqniypa wasinman aysaykunaykama. 5Jerusalén sipaskuna, salqa luychukunarayku, china tarukakunarayku prometewaychis: Munakuytaqa ama rikch'arichiychischu, aswanpas kikillanmanta rikch'arimuchun, nispa. 6¿Imataq chay ch'inneqmanta wichamuspa q'osñi ukhupi hamuqrí? ¿Imataq chay mirrawan inciensowan karumanta apamusqa q'apaq hak'upiwan q'osñichisqa ukhupi hamuqrí? 7¡Chayqa rey Salomonta wantunan! Soqta chunka allin qharikuna ukhupin hamushan, Israelpi aswan kallpasapakuna chawpipin hamushan. 8Llapallankun espada allin hap'iqkama kanku, llapallankun allin maqanakuqkama kanku, sapankan cinturankupi espadayoqkama kanku tutakunapi phawaykuyta manchakuspanku. 9Rey Salomonmi wantunata ruwachikurqan, Libanomanta apamusqa allinkaq kurkumantan ruwachikurqan. 10Sayaq k'aspikunatapas qolqemantan ruwachikurqan, wasanpa k'iraykunantapas qorimantan ruwachikurqan, tiyanantapas sani-puka awasqawanmi qatachirqan, ukhunpas Jerusalén sipaskunaq munakuywan pallayniyoq awasqanmi karqan. 11¡Sión sipaskuna, rey Salomonta qhawaq lloqsimuychis! Casarakusqan p'unchaypin, q'ochukusqan p'unchaypin mamanpa corona churaykusqan kashan.

will be added

X\