Cantares 2

1Ñoqaqa Sharón pampa rosas t'ikan kani, qheswapi hamanq'ay t'ikan kani. 2Imaynan hamanq'ay t'ikaqa khiska-khiska ukhupi, chay hinan munakusqay warmiqa sipaskuna ukhupi. 3Imaynan manzana sach'aqa sach'a-sach'a ukhupi, chay hinan munakusqayqa waynakuna ukhupi. ¡Ancha sumaqmi llanthunpi tiyaykuyniyqa! ¡Ancha misk'in mikhunaypaq rurusqanqa! 4Hatun mikhuna wasimanmi pusawarqan, munakuyllanwanpunin qhawapayawarqan. 5Pasaswan kallpachawaychis, manzanawan kallpachawaychis, munaykuwananmantan onqoshani. 6Lloq'e makinpin umay samaykun, paña makinwantaq oqllaykuwan. Qharin nin: 7Jerusalén sipaskuna, salqa luychukunarayku, china tarukakunarayku prometewaychis: Munakuytaqa ama rikch'arichiychischu, aswanpas kikillanmanta rikch'arichun, nispa. 8¡Kunkanta uyariychis! ¡Hamushanñan munakusqayqa! ¡Qhawariychis! ¡Haqayqá! Orqon-orqonta p'itaspan hamushan, moqon-moqonta saltaspan hamushan. 9Munakusqayqa taruka hinan, wayllukusqayqa luychu hinan. ¡Qhawariychis! Perqa qhepapiñan sayashan, ventanamantan qhawapakamushan, Perqa k'aktukunamantan qhawapakamushan. 10Munakusqaymi niwarqan: Munakusqalláy, sayarillayña, munaychalláy, hakullaña. 11Kayqa, chiri tiempopas pasarqonñan, paray tiempopas ripunñan. 12Ñan t'ikapas campopi t'ikarinña, ñan takina p'unchaykunapas chayamunña, ñan llaqtanchispi kullkuq takisqanpas uyarikunña. 13Ñan higos sach'apas higosninta phutuchimunña, ñan sisashaq uvaskunapas q'aparimunña. ¡Munakusqalláy, sayarillayña! ¡Munaychalláy, hakullaña! 14Urpichalláy, qaqa k'aktukunapin pakakushanki, qhatapi pakakunaykikunamanta uyaykita qhawarichimuway, kunkaykita uyarichiway. Kunkaykiqa sonqo suwallañan, uyaykipas munaychallañan, nispa. 15Uvas chakraykuqa t'ikaykushanñan, chayrayku hap'imuychis atoqkunata, chay huch'uy atoqkunaqa uvas chakraykutan mast'anman. 16Ñoqaqmi munakusqayqa, ñoqataq paypa kani. Payqa hamanq'ay-hamanq'aypin michishan. 17P'unchay manaraq illarimushaqtin, laqhayaqpas manaraq chinkaripushaqtin, kutimpullayña, munakusqalláy, orqokuna patapi orqo taruka hina kay, luychu hina kay.

will be added

X\