Rut 4

1Boozmi llaqta haykunapi huñukuna cheqasman wicharqan, hinaspan chaypi tiyaykurqan. Hinan pimantachus Boozpa rimasqan hunt'ay atiq familiaqa chay rato pasasharqan, chaymi Boozqa waqyarirqan: –Taytáy, hamuy, tiyaykuy, nispa. Paytaq asuykuspa tiyaykurqan. 2Chaymi Boozqa kurak runakunamanta chunka runata waqyarirqan paywan tiyaykunankupaq. Paykuna tiyaykuqtinkutaq 3Boozqa chay hunt'ay atiq familian runata nirqan: –Moab suyumanta kutimuq Noemí warmi vendeyta munashan ayllunchis Elimelecpa hap'isqan chakrata. 4Ñoqataq qanman willaykunaypaq yuyaykurqani, qantaqchus chakrata rantiyta munanki chayqa, kay kurak runakunaq qayllanpi chayta rantiy. Manataqchus munanki chayqa, sut'inta rimariy. Qanmi rantiyta atinki, aswan qaylla parienten kasqaykirayku, mana rantiyta munaqtiykin ichaqa ñoqaman rantina tupawanqa, nispa. Paytaq nirqan: –Ñoqan rantisaq, nispa. 5Hinaqtinmi Boozqa nirqan: –Chakrata Noemimanta rantispaykiqa wañuqpa warmin Moab suyu viuda Rutwanpas casarakullankitaqmi, ahinapin chakraqa wañuqpa viudanpa wawallanpaqpuni kashanqa, nispa. 6Paytaq kutichirqan: –Chhayna kaqtinqa wawaykunaq herencianchá pisiyanman, chayrayku qan rantikuy ñoqaq rantinaytaqa, manan ñoqaqa rantisaqchu, nispa. 7(Israelpiqa hallp'a rantinakuypas hallp'a cambiaypas unaymantañan huk ruway hina kasqa: ima rimanakusqatapas allintapuni sayachinapaqqa hukninmi usut'anta ch'utikuspa qharimasinman haywaq. Chaymi Israelpi sut'i rimasqa señal kaq). 8Hinaspan chay familian qhariqa Boozta nirqan: –Qan rantikuy, nispa. Usut'anta ch'utikuspataq payman haywarqan. 9Hinan Boozqa kurak runakunata hukkunatawan nirqan: –Kay p'unchaymi testigoykuna kankichis, Elimelecpa kaqninkunata, Quelionpa Mahlonpa kaqninkunatapas Noemimanta rantisqaymanta. 10Hinallataq Mahlonpa viudan Moab suyu warmi Rutwan casarakunaymantapas. Chay hinapin hallp'aqa wañuqpa sutinwan sutichasqa wawallapaqpuni kanqa, hinallataq wañuqpa sutinqa ayllun ukhupipas llaqtanpipas mana chinkanqachu. Kay p'unchaymi testigoykuna kankichis, nispa. 11Kurak runakunataq hukkunapiwan nirqanku: –Testigon kayku, casarakunayki warmitaqa Raquelta hina, Leata hina Señor Dios ruwachun, paykunan Israel aylluta paqarichirqanku. Qantaq Efrata ayllupi ancha qhapaq kay, Belenpipas allin reqsisqa kay. 12Señor Diosmi chay sipaspi askha wawakunata qosunki, Farespa ayllun hina kananpaq. Tamarqa Judapaqmi Faresta wachakurqan, nispa. 13Boozmi Rutwan casarakurqan, hinaspan wasinman pusarqan. Paywantaq puñurqan, Señor Diostaq munarqan wiksallikunanta, chaymi qhari wawata wachakurqan. 14Hinan warmikunaqa Noemita nirqanku: –¡Señor Diosqa yupaychasqa kachun! Paymi uywaqniyki nietota kunan p'unchay qosunki, paypa sutin Israelpi ancha reqsisqa kachun. 15Qhachuniykin munakusunki, payqa qanpaq qanchis qhari wawamantapas aswanraqmi, chay wachakusqan wawan sonqochasunki, payaña kaqtiykipas uywasunki, nispa. 16Noemitaq wawata marq'arikuspa oqllaykurqan, wawaq uywaqentaq kapurqan. 17Wasimasin warmikunataq nirqanku: –Noemipaqmi wawa nacen, nispa. Suticharqankutaq: Obed, nispa. Paymi Isaipa taytan, Davidpa abuelon karqan. 18Kaymi Farespa mirayninkuna: Faresmi churiyarqan Hezronta, 19Hezrontaq churiyarqan Ramta, Ramtaq churiyarqan Aminadabta, 20Aminadabtaq churiyarqan Naasonta, Naasontaq churiyarqan Salmonta, 21Salmontaq churiyarqan Boozta, Booztaq churiyarqan Obedta, 22Obedtaq churiyarqan Isaita, Isaitaq churiyarqan Davidta.

will be added

X\