Rut 3

1Suegran Noemitaq Rut-ta nirqan: –Ususíy, ¿manachu casarachipuykiman allin kanaykipaq? 2Boozqa parientenchismi riki, ichhuqninkunawanmi llank'amusharqanki. Paymi kay ch'isi cebadata wayrachinqa. 3Chhaynaqa bañakuy, sumaq q'apaq hawinakunawan hawikuy, allinta p'achakuy, hinaspa erata rinki, ichaqa aman chay qhariwan reqsichikunkichu mikhuyta ukyayta tukunankama. 4Mayneqpichus paypa puñusqantan allinta qhawanki, hinaspa puñushaqtin asuykuspa chakinta q'alarispa chayman suchuykunki. Paymi imatachus ruwanaykita nisunki, nispa. 5Hinan Rutqa kutichirqan: –Tukuy niwasqaykitan ruwasaq, nispa. 6Erata rispataq suegranpa nisqanta hina ruwarqan. 7Boozqa mikhuspaña ukyaspaña, kusisqa sonqoyoq ch'uyasqaña cebadaq qayllanman puñuq rirqan. Puñushaqtintaq Rutqa ch'inlla qayllaykurqan, chakinta q'alarispataq suchuykurqan. 8Chawpi tutatataqmi chay runaqa rikch'arirqorqan, hinaspan tiyarimuspa huk warmi hayt'anpi puñushasqanta reparaspa utirayarqan. 9Chaymi payqa nirqan: –¿Pin kanki? nispa. Paytaq kutichirqan: –Ñoqaqa kamachiyki Rutmi kani. Qanqa parienteymi kanki, yanapawanaykin kani, chayrayku ñoqawan imachus ruwanaykita hunt'ay, nispa. 10Paytaq nirqan: –Señor Diosmi saminchasunki, ususíy, munakuq sonqowan kay ruwasqaykiqa aswanraqmi suegraykipaq ruwasqaykimantaqa. Manan waynakunatachu qhawakurqanki, wakchaña qhapaqña kaqtinkupas. 11Chhaynaqa, ama manchakuychu, ususíy, llaqtayqa llapallanmi yachan ancha allin warmi kasqaykita, ñoqaqa ruwasaqmi imatachus niwasqaykita. 12Chaywanpas, ñoqaña qanpaq hunt'ayta atishani chaypas, ñoqamanta aswan qanpaq hunt'ay atiqqa kanraqmi. 13Kaypi samakuy, paqarinña yachasun, pay qanpaq hunt'anqa chayqa, allinmi kanqa. Manachus pay hunt'ayta munanqa chayqa, Señor Diospa ñawpaqenpin prometiyki, ñoqan hunt'asaq. Samakuy paqarinkama, nispa. 14Chaymi Rutqa illarimuykama puñurqan, rankhi-rankhitataq sayarirqan, Boozqa manan munarqanchu eraman warmiq hamusqanta pipas yachananta. 15Chaymantataq Boozqa nirqan: –Llikllaykita horqokuspa mast'ay, nispa. Llikllanta Rut mast'aqtintaq, payqa soqta tupu cebadata qorqan. Hinaspataq Rutman q'epiykachirqan llaqtata ripunanpaq. 16Suegranpa kasqanman chayaqtintaq, suegranqa payta nirqan: –¿Imaynan, ususíy? nispa. Hinan payqa suegranman willarqan imakunatachus chay qhariq paypaq ruwasqanta. 17Nillarqantaq: –Kay soqta tupu cebadatan qoykamuwan, mana imayoqchu suegraykiman ripuwaq, nispa. 18Noemitaq nirqan: –Suyaykullay, ususíy, chay asuntoq imaynachus kananta yachanaykikama. Chay qhariqa manan samaykunqachu chay asuntota mana kunan tukuspaqa, nispa.

will be added

X\