Rut 2

1Noemipa qosan Elimelecpa ayllunmantan huk qhapaq runa karqan, Booz sutiyoq. 2Rut-taq Noemita nirqan: –Valekuykin chakrata kachawanaykita, pichus hinallata qhellachiwanqa chaypa qhepanpi cebadata qhellakamunaypaq, nispa. Hinan Noemiqa nirqan: –Riy, ususíy, nispa. 3Chakrata rispataq ichhuqkunaq qhepanpi qhellarqan, chay chakraqa Elimelecpa parienten Boozpan karqan. 4Chayllamanmi kikin Boozqa Belenmanta chayamurqan, hinaspan ichhuqkunata napaykurqan: –Qankunawan Señor Diosqa kachun, nispa. Paykunataq kutichirqanku: –Qantapas Señor Diosmi saminchasunki, nispa. 5Boozmi ichhuchiq capatazta nirqan: –¿Pitaq chay sipasri? nispa. 6Ichhuchiq capataztaq kutichirqan: –Moab suyumanta Noemiwan hamuq sipasmi. 7Paymi niwan: –Ama hinachu kay, ichhuqkunaq qhepanpi qhellarichiway, nispa. Tutamantapacha haykumuspan kunankama mana samaykuspa qhellashan, nispa. 8Chaymi Boozqa Rut-ta nirqan: –Ususíy, kay chakrallapin qhellakunki, aman kaymanta wakman rinkichu, kaypin ichhuqniykunawan kuska kanki. 9Ichhusqankuta allinta qhawanki, hinaspa ichhuqkunaq qhepanta rinki. Ñoqan ichhuqniykunata kamachiniña ama imaninasuykipaq. Ch'akisuqtiykipas urpukunaman asuykuspa ichhuqkunaq wisimusqan unuta ukyakunki, nispa. 10Hinan Rutqa pampakama k'umuykukuspa nirqan: –¿Imanaqtintaq khuyapayawanki? ¿Imanaqtintaq sumaqta qhawariwanki, ñoqa wak llaqtayoq kashaqtiy? nispa. 11Booztaq nirqan: –Qosaykiq wañukapusqan qhepata tukuy imaymanata suegraykipaq ruwasqaykitan willawarqanku, hinallataq tayta-mamaykitapas nacesqayki llaqtatapas saqerparisparaq mana reqsisqayki llaqtaman hamusqaykitapas. 12Señor Diosmi chay ruwasqaykimanta kutichipusunki, Israelpa Diosninmi hunt'asqata qopusunki, paypa waqaychasqan kanaykipaq hamusqaykirayku, nispa. 13Rut-taq nirqan: –Wiraqocháy, sumaqtan qhawariykuwanki, sonqochaykuwanki, kamachiykiman sumaqta rimaykuwaspayki, manaña huknin kamachiyki kashaqtiypas, nispa. 14Booztaq mikhuna horata Rut-ta nirqan: –Asuykamuy, mikhusunchis, kay t'antata vinagreman challpuykuy, nispa. Hinan payqa ichhuqkunawan kuska tiyaykurqan, Booztaq payman cebada hank'atapas haywallarqantaq. Rutqa saksanankaman mikhurqan, puchuqtataq alzakurqan. 15Chaymantataq Rutqa qhellaq sayarirqan. Booztaq kamachinkunata kamachirqan: –Phichakuna ukhumantapas qhellakullachun, amataq payta hark'aychischu. 16Marq'aykunamantapas huk maki cebadata paypaq urmachillankichistaqmi, hinaspa saqenkichis chayta qhellakunanpaq, amataq phiñarinkichischu, nispa. 17Rutmi chakrapi tutayanankama qhellarqan, hinaspan pallasqanta waqtarqan, hinan iskay chunka kilo cebada karqan. 18Chayta aparikuspan llaqtata ripurqan, suegranmantaq qhellamusqanta rikuchirqan, alzakamusqantapas haywallarqantaq. 19Suegrantaq payta nirqan: –¿Maypitaq kunan qhellamurqanki? ¿Maypitaq llank'amurqanki? Dios saminchapuchun sumaq qhawariqniyki runata, nispa. Hinan payqa suegranman willarqan piqpapichus llank'amusqanta: –Kunan p'unchayqa qhellamuni Booz sutiyoq runaq chakranpin, nispa. 20Noemitaq qhachuninta nirqan: –Boozqa Señor Diospa saminchasqan kachun. Diosqa may khuyapayakuqmi wañuqkunapaqpas kawsaqkunapaqpas, nispa. Chaymantataq Noemiqa Rut-ta nirqan: –Boozqa qaylla parientenchismi, paypa ruwananqa tukuy imapi yanapawananchismi, nispa. 21Rut-taq nirqan: –Payqa nillawantaqmi, ichhuqniykunaq qhepanpi qhellakuy cosechay lliw tukukunankama, nispa. 22Hinan Noemiqa qhachunin Rutman kutichirqan: –Aswan allinmi, ususíy, Boozpa ichhuqninkunawan kanki chayqa, paqtan hukpa chakranpiqa imanasunkikumanpas, nispa. 23Chaymi Rutqa paykunawan qhellarqan cebada ichhuy, trigo ichhuy tukukunankama. Suegranwantaq tiyasharqan.

will be added

X\