Rut 1

1Uma qollanakuna Israel suyupi kamachikushaqtinmi yarqay karqan, chaymi Judapi kaq Belén llaqtamanta huk runa warmintin, iskaynin churinkunapiwan Moab suyuman ripurqanku, chaypi tiyarimunankupaq. 2Chay runaq sutinmi Elimelec karqan, warminpataq Noemí, churinkunataq Mahlón, Quelión, paykunan karqanku Judapi kaq Belén Efrata ayllumanta. Moab suyuman chayaspankutaq chaypi qhepakurqanku. 3Ichaqa Elimelecmi wañukapurqan, hinan Noemiqa iskaynin churinkunallantin qhepakapurqan. 4Paykunan Moab suyu warmikunawan casarakurqanku, hukninpa sutinmi karqan Orfa, hukninpa sutintaq Rut. Chunka watata hina chaypi tiyashaqtinkutaq, 5Mahlonpas Quelionpas wañukapullarqankutaq, hinan Noemiqa qheparqan mana qosayoq mana churiyoq. 6Moab suyupitaq Noemiqa uyarirqan Señor Diosqa llaqtanta yuyarimuspa mikhuy qomusqanta, chaymi Moab suyumanta iskaynin qhachuninkunapiwan puririrqanku. 7Tiyasqanku cheqasmanta qhachuninkunantin lloqsispa, Judá suyuman kutipushaspataq, 8Noemiqa qhachuninkunata nirqan: –Ripuychis, kutikapuychis sapankaykichis mamaykichispa wasinman, Señor Diosmantan mañakuni imaynan wañukapuqkunapaqpas ñoqapaqpas ruwasqaykichisman hina khuyapayanasuykichispaq. 9Señor Diosña wakmanta casarachisunkichis, qhepa qosaykichiswan allillan kanaykichispaq, nispa. Hinaspan Noemiqa paykunata much'aykurqan. Paykunataq khuyayta waqaykuspa, 10nirqanku: –¡Manan kutiykumanchu! Ñoqaykuqa qanwanmi llaqtaykita ripusaqkupuni, nispa. 11Noemitaq kutichirqan: –Kutikapuychis, ususiykuna, ¿imamantaq ñoqawan riwaqchis? Manañan wawakunata wachakuymanñachu qosaykichis kananpaq. 12Kutikapuychis, ususiykuna, ripuychis. Ñoqaqa payañan kani casarakunaypaq. Wachakusaqraqmi nispachus niyman, kunan tutataq qosawan puñuyman, qhari wawakunataña wachakuyman chaypas, 13¿qankunaqa wiñanankukama suyakuwaqchischu? ¿Chayraykuchu manaqa casarakapuwaqchis? Manapunin, ususiykuna, Señor Diosmi muchuchishawan, chayraykun llakikuni ñoqawan kuska muchushasqaykichismanta, nispa. 14Hinan paykunaqa wakmanta khuyayta waqaykurqanku, chaymantataq Orfaqa suegranta much'aykuspa ripurqan, Rutmi ichaqa suegranwan qhepakurqan. 15Chaymi Noemiqa nirqan: –Qhawariy, qhachunmasiykin kutikapun llaqtanman diosninmanwan, qanpas kutikapullaytaq, nispa. 16Rut-taq kutichirqan: –Amaña “saqepuway, t'aqakuway” niwayñachu, maytachus qan rinki, chaytan ñoqaqa risaq, maypichus tiyanki, chaypin ñoqaqa tiyasaq. Llaqtaykin llaqtay kanqa, Diosniykin Diosniy kanqa. 17Maypichus qan wañupunki, chaypin ñoqapas wañupusaq, chaypitaqmi p'ampasqapas kasaq. Señor Dios anchata muchuchiwachun, manachus wañuyllaña t'aqawasun chayqa, nispa. 18Chaymi Noemiqa paywan ripunanpaq Rutpa yuyaykukusqanta reparaspa, manaña rimapayarqanñachu. 19Hinan paykunaqa rispanku Belenman chayarqanku. Paykuna haykuqtinkutaq llaqtallantin kuyurirqan, warmikunataq nirqanku: –¿Manachu kayqa Noemí? nispa. 20Noemitaq paykunaman kutichirqan: –Ama Noemí niwaychischu, aswanpas Mara niwaychis, anchatapunin Tukuy-atiyniyoq Diosqa muchuchishawan. 21Kaymantaqa imaymanantinmi rirqani, Señor Diosmi ichaqa mana imayoqta kutichimpuwan. ¿Imanaqtintaq Noemí niwankichis, Tukuy-atiyniyoq Dios huchachawaspa llakichishawaqtinqa? nispa. 22Chay hinatan Noemiqa Moab suyumanta kutimpurqan qhachunin Moab suyu warmi Rutwan kuska. Belenmanmi chayarqanku cebada ichhuy qallariyta.

will be added

X\