1 Llaqtalláy, yachachisqayta uyariy, simi rimarisqayta maki uyariy. 2 Rikch'anachiy simikunatan rimarisaq, ñawpa tiempopi mana yachasqakunatan sut'inchasaq. 3 Uyarispayku yachasqaykutapas tayta-mamaykuq willawasqankutapas sut'inchasaqmi. 4 Manan chaykunata wawaykuman pakasaqkuchu, aswanmi Señor Diospa atiynintapas musphana ruwasqantapas qhepa mirayman willasaqku. 5 Diosmi Jacobpaq kamachikuy simita churarqan, Israelpitaq imaymana kawsanata churarqan, ñawpa taytanchiskunatan kamachirqan, chayta wawankuman yachachinankupaq, 6 qhepaman naceq wawakuna chayta yachanankupaq, paykunapas chayta wawankuman yachachinankupaq. 7 Chaymi Diosman sonqollikunqaku, manan ruwasqankunatapas qonqapunqakuchu, kamachikusqankunatapas hunt'anqakun. 8 Manan ñawpa taytanku hinañachu kanqaku, mana kasukuq k'ullukuna, maynillanpi munakuq sonqoyoqkuna, Diosta wasancharpariqkuna. 9 Efraín ayllu runakunan allin wach'iqkuna kashaspankupas awqa-tinkuy p'unchaypi kutirikapurqanku. 10 Manan Dioswan rimanakusqankuta hunt'arqankuchu, manan yachachikuyninkunata kasukuytapas munarqankuchu. 11 Paypa ruwasqantan qonqapurqanku, paykunaman rikuchisqan musphana ruwasqankunatan qonqapurqanku. 12 Ñawpa taytankuq qayllanpin Diosqa utirayanakunata ruwarqan, Egipto suyu Zoán pampapi. 13 Iskaymanmi lamar-qochata t'aqarqan, hinaspan unuta perqata hina sayachispa chayninta paykunata chimpachirqan. 14 P'unchaymi paykunata phuyuwan pusarqan, tutataq nina k'anchaywan pusarqan. 15 Qaqakunatan ch'inneqpi ch'eqtarqan, mayuta hinan unuta phawachirqan. 16 Diosqa qaqamantan unuta phullpuchimurqan, mayuta hinan unuta phaqchachimurqan. 17 Chaypas paykunaqa Dios contran huchallikushallarqankupuni, Ancha Hatun Dios contran ch'inneqpi hatarirqanku. 18 Munasqanku mikhunata mañakuspankun Diosta sonqonkupi wateqarqanku. 19 Dios contran rimarqanku: ¿Diosri ch'inneqpi mikhunata mast'apuwasunmanchu? 20 Arí, payqa qaqatan ch'eqtarqan, chay qaqamantan mayu hinaraq unu phullpumurqan, hinaspan pampantin qochayaykurqan. Chayri, ¿t'antatapas aychatapas llaqtanman qollanmantaqchu? nispanku. 21 Chaymi chayta uyarispa Señor Diosqa phiñakurqan, Jacob contra nina hina rawrarirqan, Israel contra k'arakta phiñakurqan. 22 Manan Diospi iñirqankuchu, manallataq yanapayninpipas creerqankuchu. 23 Chaywanpas, Diosmi phuyukunata kamachirqan hanaq pacha punkukunata kicharinanpaq, 24 maná nisqa mikhunatan parachimurqan mikhunankupaq, hanaq pacha mikhuytan qomurqan. 25 Angelkunaq t'antantan runa mikhurqan, saksanankukaman Diosqa mikhunata qorqan. 26 Hanaq pachapin inti lloqsimuy wayratapas uray wayratapas atiyninwan wayrachimurqan, 27 paykunapaqmi aychata ñut'u hallp'ata hinaraq parachimurqan, phalaq animalkunatan lamar-qocha aqota hinaraq rikhurichimurqan. 28 Chaykunatan karpa-karpaman chayachimurqan, tiyananku muyuriqmanpas urmaykachimurqan. 29 Saksanankukamaraqmi mikhurqanku, chhaynatan Diosqa munapakusqankuta qorqan. 30 Ichaqa manan munapakusqankuwan amikurqankuchu, simillankupiraq mikhunaqa hunt'a kashaqtinmi, 31 Diosqa k'arakta paykunapaq phiñakurqan, aswan kallpasapakunatan wañurqarichirqan, Israelpi aswan allinninkunatan sipirqarirqan. 32 Chaywanpas huchallikushallarqankun, manan musphana ruwasqankunatapas creerqankuchu. 33 Chaymi samayta hinalla Diosqa kawsayninkuta qechurqan, manchay ñak'ariywanmi qonqaylla paykunata wañuchirqan. 34 Wakinninkuta Dios wañuchiqtinqa, paymanmi wakinqa kutirikapurqanku, yuyayta hap'ispankun Diosmanta tukuy sonqo mañakurqanku. 35 Paykunan yuyarirqanku Diosqa pakaykuqninku kasqanta, Ancha Hatun Diosqa kacharichimuqninku kasqanta. 36 Ichaqa siminkuwanmi llunk'upayarqanku, qallunkuwanmi q'oturqanku, 37 manan paypaq sut'i sonqochu karqanku, manallataq rimanakuyninpipas hunt'aqchu karqanku. 38 Diosmi ichaqa khuyapayakuq kaspa huchallikusqankuta pampachallaqpuni, manataq paykunata tukurparirqanchu. Askha kutin mana phiñakurqanchu, mayninpiqa pisillatan phiñakurqan. 39 Runalla kasqankutan yuyarirqan, ripuspa mana kutimuq wayra hinalla kasqankuta. 40 ¡Hayk'a kutitan ch'inneqpi payta mana kasurqankuchu! ¡Hayk'a kutitan chay ch'inneq cheqaspi payta llakichirqanku! 41 Yapapas-yapan Diostaqa wateqarqanku, Israelpa Ch'uya Diosnintan phiñachirqanku. 42 Manan atiyninta yuyarqankuchu, manallataq awqankumanta qespichimusqan p'unchaytapas yuyarqankuchu, 43 chaypachan Egipto suyupi utirayanakunata ruwarqan, Zoán pampapi musphanakunata ruwarqan. 44 Mayunkutapas yawarman tukuchirqan, hinan Egipto runakunaqa mana ukyayta atirqankuchu. 45 Paykunamanmi tankaylluta wakwaykachirqan, chaykunan paykunata kanirqan, hinallataq k'ayratapas wakwaykachirqan, chaykunan hallp'ankupi asnarirqan. 46 Cosechankutapas kurumanmi qaraykurqan, llank'asqankutapas langostawanmi mikhuchirqan. 47 Chikchiwanmi uvas chakrankuta saqtachirqan, higos sach'ankutapas qasawanmi qasachirqan. 48 Chikchiwanmi wakankuta wañuchirqan, ovejankutapas illapawanmi sipichirqan. 49 Diosmi sinchitapuni paykunata muchuchirqan, k'arakta phiñakuspa, rawraqta phiñakuspa, paymi angelninkunata kacharqan wañuchimunankupaq. 50 Payqa phiñakurqanpunin, manan kawsayninkuta wañuymanta hark'arqanchu, aswanmi paykunata onqoywan wañuchirqan. 51 Egiptopin llapa phiwita wañuchirqan, llapa kurak qhari wawakunata Cam miray karpakunapi wañuchirqan. 52 Hinaspan Israel runakunata oveja t'aqata hina horqomurqan, llaqtantan ch'inneqninta pusamurqan. 53 Waqaychaspanmi paykunata pusamurqan, chaymi mana manchakurqankuchu, awqankutataq ichaqa lamar-qocha p'ampaykurqan. 54 Ch'uya hallp'anmanmi llaqtanta pusampurqan, paypa hap'isqan orqo-orqomanmi chayachimpurqan. 55 Israelpa qayllanmantan suyukunata wikch'urqan, sorteaspan ayllunkuman hallp'ata rakirqan, hinaspanmi paykunata tiyanankupi tiyachirqan. 56 Paykunataq ichaqa Ancha Hatun Diosta wateqarqanku phiñachirqanku, manataq kamachikusqan simikunata kasurqankuchu, 57 aswanpas mana hunt'aqmi kapurqanku, ñawpa taytanku hinan awqa sayarirqanku, mana allin ruwasqa p'eqta hinan waqllipurqanku. 58 Orqo patapi yupaychana cheqaswanmi payta phiñachirqanku, idolokunata yupaychaspan payta phiñachirqanku. 59 Diosmi chayta rikuspa phiñakurqan, hinaspan Israelmanta hukpaqkama t'aqakapurqan. 60 Silopi kaq tiyanantan saqepurqan, runakuna chawpipi tiyasqan karpatapas saqepurqan. 61 Awqanwanmi rimanakuynin arcata qechuchirqan, qhapaq-atiynin rikch'aytan hap'ichirqan. 62 Anchatapunin llaqtanpaq phiñakurqan, awqaq espadanmanmi paykunata qaraykurqan. 63 Waynakunan kanasqa wañurqanku, sipaskunapaqtaq casarakuy takita manaña takirqankuchu. 64 Sacerdotekunan espadawan wañuchisqa karqanku, viudankutaq mana waqarqankuchu. 65 Chaypachan Señor Diosqa puñuymanta hina rikch'arirqan, vinowan loqheyaq kallpasapa hina, 66 hinaspanmi awqankunata atipaspa qatirirqan, wiñaypaqmi paykunata p'enqachirqan. 67 Josepa miraynintapas manan munarqanchu, Efraín ayllutapas manan akllakurqanchu, 68 aswanmi Judá aylluta akllakurqan, munakusqan Sión orqotapas akllakurqan. 69 Ch'uya wasintan wasichachirqan hatun hanaq pachata hina, wiñaypaq takyachisqan kay pachata hina. 70 Oveja michiq kamachin Davidtan akllakurqan, 71 uñayoq oveja michinamantan waqyamurqan llaqtan Jacobta qhawananpaq, herencian Israelta michinanpaq. 72 Davidqa chanin sonqonwanmi paykunata michirqan, allin yachaq makinwanmi paykunata kamachirqan.
